ភ្នំពេញ ៖ ទោះបីជាបំណុលសាធារណៈកម្ពុជាមានការកើនដល់ ១២,០៣ ប៊ីលានដុល្លារក៏ដោយ ប៉ុន្តែចំនួននេះនៅតែមានភាពល្អប្រសើរជាងប្រទេសប្រទេសជិតខាងមួយចំនួននៅឡើយ។ នេះបើយោងតាមអ្នកជំនាញសេដ្ឋកិច្ចប្រចាំរាជបណ្ឌិត្យសភាកម្ពុជា។

យោងតាមព្រឹត្តិបត្តិស្ថិតិបំណុលសាធារណៈចេញផ្សារនៅ​ពេលថ្មីៗនេះដោយក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រហូតដល់ដំណាច់ឆ្នាំ២០២៤កន្លងទៅថ្មីៗនេះ កម្ពុជាមានបំណុលសាធារណៈ ១២,០៣ប៊ីលានដុល្លារ ដែលមានការកើនឡើងប្រមាណជា ០,២% ធៀបនឹងឆ្នាំ២០២៣។

លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃរាជបណ្ឌិត្យសភាកម្ពុជាមានប្រសាសន៍ថា ទោះជាបំណុលកម្ពុជាកើនឡើងដល់ ១២,០៣ប៊ីលានដុល្លារក៏ដោយ ក៏ចំនួននេះនៅតែមានភាពល្អប្រសើរជាងប្រទេសជិតខាង ដូចជា ប្រទេសថៃ ឡាវ និងប្រទេសសិរីលង្ការជាដើម។ ចំនួនបំណុលសាធារណៈរបស់កម្ពុជា​ បើធៀបជាមួយផលិតផលសរុបក្នុងស្រុក(GDP) ស្ថិតក្នុងចន្លោះ៣០%-៤០%ប៉ុណ្ណោះ ប៉ុន្តែសម្រាប់ប្រទេសថៃកើនឡើងដល់៧០% ធៀបនឹង GDP របស់ខ្លួន ហើយប្រទេសជិតខាងមួយចំនួនទៀត បំណុលសាធារណៈកើនឡើងដល់ ៧០% ទៅ ៨០% ជាពិសេសប្រទេសសិរីលង្ការ និងប្រទេសឡាវជាដើម បំណុលសាធារណៈកើនដល់បន្ទាត់ក្រហម ដែលមានន័យថា រដ្ឋាភិបាលមានភាពស្មុគស្មាញក្នុងកាតបង្វិលលុយសងបំណុលបរទេស ចំណែកអតិផិរណាក្នុងស្រុកមានការកើនឡើងខ្ពស់ ប្រជាពលរដ្ឋជួបបញ្ហាកង្វះខាតស្បៀង ដែលត្រូវបង្ខំចិត្តធ្វើចំណាកស្រុករកការងារធ្វើក្រៅប្រទេស និងពលរដ្ឋខ្លះត្រូវការបន្ថយការហូបចុកជាដើម។

លោកបណ្ឌិតបញ្ជាក់ថា ៖

«ទោះកម្ពុជាស្ថិតក្នុងដំណាក់កាលនេះក៏ដោយ ក៍៏កម្ពុជាស្ថិតក្នុងកម្ចីមានគុណភាពល្អ នៅតែមានលទ្ធភាពអាចបន្តកម្ចីថែមទៀតពីស្ថាប័នបរទេស ដូចជា ធនា​គា​រពិភពលោក (World Bank) ធនាគារអភិវឌ្ឍន៍អាស៊ី (ADB) ខ្ចីពីប្រទេសជាដៃគូ ដូចជា ជប៉ុន កូរ៉េ ចិន ដែលមានន័យថា កម្ចីនៅមិនទាន់ឈានដល់បន្ទាត់ក្រហម ឬចំណុចដែលគួរឱ្យព្រួយបារម្មណ៍ខ្លាំងនោះទេ ប៉ុន្តែរដ្ឋាភិបាលក៏ត្រូវថ្លឹងថ្លែងពិចារណាក្នុងទិដ្ឋភាពវិជ្ជមានឱ្យបានម៉ត់ចត់ថែមទៀត ព្រោះថាបំណុលកើន ក៏មិនមែនជាកិច្ចការល្អសម្រាប់ប្រទេសជាតិនោះដែរ។ ដូច្នេះ មុននឹងខ្ចីបុរបរទេស ត្រូវគិតគូរឱ្យបានច្បាស់លាស់ក្នុងការខ្ចីយកមកប្រើកម្ចីឱ្យចំគោលដៅ»។

លោកបានបន្តឱ្យដឹងថា ៖ គ្រួសារមួយក៏ដោយ ប្រទេសជាតិមួយក៏ដោយ កាលណាស្ថិតក្នុងបំណុល ស្ថិតនៅក្រោមកញ្ចប់នៃបំណុលច្រើន ការអភិវឌ្ឍន៍នោះឯងមិនជាលឿន មិនរហ័ស ដូចបណ្តាប្រទេសមានបំណុលតិចតួច ឬប្រទេសមិនមានបំណុលនោះទេ។ កម្ចីមិនមានន័យថាអាក្រក់ណាទេ ព្រោះថាប្រទេសកំពុងអភិវឌ្ឍន៍ គឺខ្ចីយកមកអភិវឌ្ឍន៍ប្រទេស ជាពិសេស កសាងហេដ្ឋារចនាសម្ព័ន្ធក្នុងប្រទេស ធ្វើយ៉ាងណាទាក់ទាញអ្នកវិនិយោគឱ្យបានកាន់តែច្រើន ក្នុងគោលដៅអភិវឌ្ឍន៍ប្រទេសឱ្យខ្លាំង ដើរតាមឱ្យទាន់ប្រទេសជឿនលឿន។

គួរបញ្ជាក់ថា នៅក្នុងឆ្នាំ២០២៤ រដ្ឋាភិបាលបានទូទាត់សេវាបំណុលសរុបចំនួន ៥៥៨,៧៧ លានដុល្លារអាមេរិក ក្នុងនោះទូទាត់សងដូចជា ទី ១.ក្រប​ខ័ណ្ឌបំណុលសាធារណៈក្រៅប្រទេស មានចំនួន ៥៤២,៧៩លានដុល្លារអាមេរិក ក្នុងនោះប្រាក់ដើមមានចំនួន ៤១៩,១៤លានដុល្លារអាមេរិក ការប្រាក់ និងកម្រៃផ្សេងៗមានចំនួន ១២៣,៦៥លានដុល្លារអាមេរិក និងទី២.ក្របខ័ណ្ឌបំណុលសាធារណៈក្នុងប្រទេសមានចំនួនប្រមាណ១៥,៩៨លានដុល្លារអាមេរិក ក្នុងនោះប្រាក់ដើម ១២,៧២លានដុល្លារអាមេរិក និងការប្រាក់៣,២៧ លានដុល្លារអាមេរិក៕ ដោយ ៖ វិន ឈុនហ៊ាត