សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅត្រឹមត្រីមាសទី២ នៃឆ្នាំ២០២៣នេះ សមិទ្ធផលឥណទានលក្ខណៈបុគ្គល សម្រេចបាននូវកំណើនដ៏រឹងមាំ ដោយសមតុល្យឥណទាន និងចំនួនគណនីឥណទាន មានការកើនឡើងនៅគ្រប់តំបន់ ខណៈចំនួននៃការស្នើសុំឥណទានបុគ្គល មានការថមថយក្នុងត្រីមាសទី២ បើប្រៀបធៀបនឹងត្រីមាសមុន។
ពាក្យស្នើសុំឥណទានលក្ខណៈបុគ្គលបង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទានក្នុងលក្ខណៈជាឥណទានសម្រាប់ប្រើប្រាស់ផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ។
យោងតាមរបាយការណ៍របស់ក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី នៅត្រឹមត្រីមាសទី២ នៃឆ្នាំ២០២៣នេះ ចំនួនអតិថិជនដែលព្យាយាមស្នើសុំឥណទាន ក្នុងទម្រង់៣ផ្សេងៗគ្នាដូចជា ឥណទានសម្រាប់ប្រើប្រាស់ផ្ទាល់ខ្លួន (Personal Finance) ប័ណ្ណឥណទាន (Credit Cards) និងកម្ចីអចលនទ្រព្យ (Mortgage)។ ពាក្យស្នើសុំឥណទានលក្ខណៈបុគ្គល បានធ្លាក់ចុះជារួម -១១%។
ការថយចុះនៃពាក្យស្នើសុំកម្ចីប្រើប្រាស់ផ្ទាល់ខ្លួនមានចំនួន -១០% ក្នុងនេះមានការថយចុះខ្លាំងនៅតំបន់ឆ្នេរមានចំនួន -១៥% និងការស្នើសុំកម្ចីអចលនទ្រព្យថយចុះខ្លាំងចំនួន -២២%។ ការស្នើសុំប័ណ្ណឥណទាន មានការកើនឡើង +២៩%នៅតំបន់ឆ្នេរ +២៥%នៅតំបន់ទន្លេសាប +២៤នៅតំបន់ខ្ពង់រាប និង +១៧%នៅតំបន់ទំនាប។
បម្រែបម្រួលជាភាគរយទំហំទឹកប្រាក់នៃការស្នើសុំឥណទាន ក៏មានការថយចុះចំនួន -១,០% ដែលចំនួននេះថយចុះខ្លាំងពីត្រីមាសមុន +១៦%។ បម្រែបម្រួលនេះបណ្តាលមកពីការថយចុះនៃទំហំទឹកប្រាក់នៃការស្នើសុំកម្ចីផ្ទាល់ខ្លួន -១០% និងកម្ចីអចលនទ្រព្យ ធ្លាក់ចុះចំនួន -២២% ខណៈដែលប័ណ្ណឥណទានកើនឡើងចំនួន +១៩% ។
គិតត្រឹមខែមិថុនា ឆ្នាំ២០២៣ ចំនួនគណនីឥណទានលក្ខណៈបុគ្គលមានការកើនឡើងគួរសម ចំនួន +៣,៩៦% ប្រៀបពីត្រីមាសមុនដែលធ្វើឲ្យ ចំនួនគណនីនៅទូទាំងប្រទេសសរុបមានចំនួន ១,៦៥ លានគណនី។ ក្នុងចំណោមចំនួននេះ ៧៩,៨៤% ជាឥណទានសម្រាប់ប្រើប្រាស់ផ្ទាល់ខ្លួន ខណៈចំណែកតូចជាងគេគឺកម្ចីប័ណ្ណឥណទាន ៨,០១% និងកម្ចីអចលនទ្រព្យ ១២,១៥%។ កំណើននេះត្រូវបានគេមើលឃើញនៅក្នុងគ្រប់តំបន់ នៃព្រះរាជាណាចក្រកម្ពុជា (+៤,៦%នៅតំបន់ទន្លេសាប +៣,៦%នៅតំបន់ឆ្នេរ +៣,០%នៅតំបន់ខ្ពង់រាប ហើយ +៣,៨%នៅតំបន់ទំនាប)។
សមតុល្យឥណទានលក្ខណៈបុគ្គល ក៏បានបន្តកើនឡើងជាលំដាប់ក្នុងកម្រិត +១,២៤% គិតត្រឹមពីខែមិថុនា ឆ្នាំ២០២៣។ នៅចុងត្រីមាសនេះ សមតុល្យឥណទានលក្ខណៈបុគ្គលមានចំនួន ១៤,៧៦ ប៊ីលានដុល្លារអាមេរិក។
បើទោះបីជា ចំនួនគណនីនៃកម្ចីអចលនទ្រព្យមានត្រឹមតែ ១២,១៥% នៃចំនួនគណនីសរុបក៏ដោយ កម្ចីអចលនទ្រព្យនៅតែមានលើសពីពាក់កណ្តាលនៃសមតុល្យឥណទានលក្ខណៈបុគ្គលសរុប ៥៥,២៧% ចំណែកឯសមតុល្យឥណទានប្រើប្រាស់ផ្ទាល់ខ្លួនមានចំណែក ៤៣,៨១%។ សមតុល្យប័ណ្ណឥណទានមានចំណែកតូចគឺត្រឹមតែ ០,៩១% តែប៉ុណ្ណោះ។ និយាយជារួម សមតុល្យឥណទានមានការកើនឡើងជាវិជ្ជមាននៅបីតំបន់ដូចជា +៤,៦%តំបន់ទន្លេសាប +០,២%តំបន់ឆ្នេរ +០,៦%ទំនាប ប៉ុន្តែនៅតំបន់ខ្ពង់រាបមានការធ្លាក់ចុះចំនួន -០,៨% ។
គុណភាពឥណទានលក្ខណៈបុគ្គលបានមកពីអនុបាតនៃគណនីឥណទានជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់ ដែលជា30+ DPD។ វាបង្ហាញពីលទ្ធភាពនៃការបង់សង និង ហានិភ័យនៃការខកខាននៅក្នុងត្រីមាស។
អនុបាត 30+DPD ធ្លាក់ចុះពី ៣,៩៦% នៅក្នុងត្រីមាសនេះ ពី ៣,២៨% ក្នុងត្រីមាសទីមួយ ឆ្នាំ២០២៣។ ក្នុងចំណោមផលិតផលទាំងបីនោះ ផលិតផលដែលមាន អនុបាត ៣០+DPD ខ្ពស់បំផុតគឺ ឥណទានប្រើប្រាស់ផ្ទាល់ខ្លួនជាមួយនឹង អនុបាតចំនួន ៥,៥៤%។
ចំនួនសមតុល្យឥណទានមិនដំណើរការលើសពី៣០ថ្ងៃ មានការកើនឡើងជារួម +២២,២% នៅទូទាំងតំបន់។ ការកើនឡើងដែលច្រើនជាងគេនៃចំនួនទឹកប្រាក់ឥណទានសំណងយឺតលើសពី៣០ថ្ងៃគឺនៅ តំបន់ឆ្នេរកើនឡើងចំនួន +៩៩%, តំបន់ខ្ពង់រាបកើនឡើងចំនួន +២០%, តំបន់ទំនាបមានការកើនឡើងចំនួន +១៧% ហើយតំបន់ទន្លេសាបវិញមានការកើនឡើង +១៧%។
ចំនួនអតិថិជនដែលមានកម្ចីតែមួយស្ថាប័ននៅតែមានកម្រិតខ្ពស់គឺ ៧០,៦៣%នៃចំនួនអតិថិជនទាំងអស់។ ចំណែកឯអតិថិជនដែលមានកម្ចីច្រើនស្ថាប័ននៅតែមានកម្រិតទាបដដែលត្រឹម ២៩,៣៧%។
អតិថិជនប្រើប្រាស់ឥណទានលក្ខណៈបុគ្គលដែលមានគណនីចំនួន ១ មាន ៥៨,៤៨%, អ្នកមានគណនីឥណទានចំនួន ២ មានចំនួន ២៨,០៨% អ្នកដែលមានគណនីឥណទានចំនួន ៣ មានចំនួន ៩,៨៣% ហើយអ្នកដែលមានគណនីឥណទានច្រើនជាង៣ មានចំនួន ៣,៦១% នៃចំនួនអតិថិជនទាំងអស់។
លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីបានមានប្រសាសន៍ថា “តម្រូវការពាក្យស្នើសុំឥណទានបុគ្គលមានការថយចុះ ប៉ុន្តែសមិទ្ធផលឥណទានលក្ខណៈបុគ្គលនៅតែវិជ្ជាមាន ជាមួយនឹងចំនួនគណនី និងសមតុល្យកម្ចីក្នុងត្រីមាសទីពីរនេះ បើប្រៀបធៀបនឹងត្រីមាសមុន”។
លោកបានបន្ថែមទៀតថា គុណភាពឥណទានមានការធ្លាក់ចុះ ជាមួយនឹងការកើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាលបរិច្ឆេទកំណត់ ពី៣,២៨% ក្នុងត្រីមាសទីមួយក្នុងឆ្នាំ២០២៣ មក៣,៩៦% ក្នុងត្រីមាសនេះ៕
Account
Security
Favourite Content