ភ្នំពេញ ៖ អត្រាឥណទានមិនដំណើរការ (NPL) នៅក្នុងវិស័យមីក្រូហិរញ្ញវត្ថុ បានកើនឡើងដល់ ៩% នៅក្នុងត្រីមាសទី២ ឆ្នាំ២០២៤ ប៉ុន្តែអត្រានេះមិនទាន់ដល់ចំណុចក្រហមនោះទេ ដោយហេតុថា វិស័យនេះមិនទាន់មានបញ្ហាកង្វះសាច់ប្រាក់ ខណៈប្រាក់បញ្ញើមានការកើនឡើង។ នេះបើតាមការលើកឡើងរបស់អ្នកនាំពាក្យសមាគមមីក្រូហិរញ្ញវត្ថុកម្ពុជា។

យោងតាមរបាយការណ៍របស់សមាគមមីក្រូហិរញ្ញវត្ថុកម្ពុជា មកទល់បច្ចុប្បន្ន ពលរដ្ឋកម្ពុជា ប្រមាណ ១លាន ៥សែន នាក់​កំពុងប្រើប្រាស់ឥណទានរបស់គ្រឹះស្ថានមីក្រូហិរញ្ញវត្ថុ ក្នុងទំហំប្រាក់សរុបប្រមាណ ៥.១ ប៊ីលានដុល្លារ ដោយក្នុងនោះអត្រាឥណទានមិនដំណើរការ (NPL) មានប្រមាណ ៩% ក្នុងត្រីមាសទី២ ឆ្នាំ២០២៤។ ចំណែកការដាក់ប្រាក់បញ្ញើនៅតាមបណ្តាគ្រឹះស្ថានមីក្រូហិរញ្ញវត្ថុវិញ គិតត្រឹមត្រីមាសទី២ ឆ្នាំ២០២៤ ចំនួនអតិថិជនដែលបានដាក់បញ្ញើនៅក្នុងវិស័យមីក្រូហិរញ្ញវត្ថុមានប្រមាណជាង​ ១.៩៩លាននាក់ ជាមួយនឹងទំហំប្រាក់បញ្ញើជាង ២.២១ពាន់លានដុល្លារ បើធៀបទៅនឹងត្រីមាសទី១នៃឆ្នាំនេះ មានការកើនឡើងប្រមាណ១% ។

លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា បានឱ្យដឹងថា អត្រាឥណទានមិនដំណើរការ គឺគេមើលទៅលើអតិថិជនបង់សងត្រឡប់យឺតលើសពី ៣០ ថ្ងៃ ហើយក្នុងត្រីមាសទី២ កន្លងទៅ អត្រាឥណទានមិនដំណើរការក្នុងវិស័យមីក្រូហិរញ្ញវត្ថុបានកើនឡើងដល់ ៩% ដែលកម្រិតនេះមិនធ្លាប់ជួបពីមុនមកនោះទេ ប៉ុន្តែបើនិយាយពីស្ថានភាពសេដ្ឋកិច្ចនាពេលបច្ចុប្បន្ន ៩% នេះ គឺមិនចម្លែកនោះទេ ហើយបើប្រៀបធៀបជាមួយបណ្តាប្រទេសនៅក្នុងតំបន់ និងអន្តរជាតិ ៩% នេះ គឺកម្រិតនៅទាបជាងគេ ហើយក៏មិនមែនជាសម្ពាធធ្ងន់ធ្ងរនោះដែរ។

លោកបានថ្លែងបន្តថា ៖

«ប្រសិនបើយើងមើលទៅលើតម្រូវឥណទានមានការថយចុះប្រហែល ១% ក្នុងត្រីមាសទី២ ឆ្នាំ២០២៤ ធៀបនឹងត្រីមាសទី១ ដូច្នេះកាលណាតម្រូវការមានការថយចុះ វាមានន័យថា គ្រឹះស្ថានមានទុនបម្រុងកើនជាងមុន ដែលជាសូចនាករបញ្ជាក់ថា ស្ថានភាពគ្រឹះស្ថាននៅល្អ ព្រោះនៅពេលដែលអត្រាបង់សងត្រឡប់យឺតកើនឡើង វាអាចប្រឈមនឹងការកង្វះសាច់ប្រាក់ ប៉ុន្តែនេះគឺតម្រូវឥណទានមានការថយចុះ ទុនបម្រុងមានការកើនឡើងវិញ»។

លោក កាំង តុងងី បានឱ្យដឹងទៀតថា ក្នុងពេលជាមួយគ្នានេះ ការដាក់ប្រាក់បញ្ញើរបស់ប្រជាពលរដ្ឋមានការកើនឡើងជិត ១% នៅក្នុងត្រីមាសទី២ ធៀបនឹងត្រីមាសទី១ ដូច្នេះបញ្ជាក់ថា គ្រឹះស្ថានរឹតតែមានប្រាក់ និងមានទុនបន្ថែមទៀត ដើម្បីទ្រទ្រង់ដល់អាជីវកម្មនៅក្នុងវិស័យ។ កត្តាទាំងអស់នេះហើយដែលបញ្ជាក់ថា គ្រឹះស្ថាន និងវិស័យមីក្រូហិរញ្ញវត្ថុ នៅតែបន្តមានស្ថិរភាពល្អ ។

លោកបានពន្យល់ថា នៅក្នុងវិស័យធនាគារ បញ្ហាប្រឈមធំជាងគេគឺការកង្វះសាច់ប្រាក់នៅពេលដែលអតិថិជនដកប្រាក់ក្នុងពេលតែមួយ ប៉ុន្តែនៅក្នុងស្ថានភាពនេះ បើទោះបីមានសញ្ញាមិនល្អខ្លះក៏ដោយ ប៉ុន្តែទុន ឬសាច់បម្រុងរបស់គ្រឹះស្ថានមានការកើនឡើង។ នេះគឺជាកត្តាបង្ហាញថា វិស័យនេះមានស្ថិរភាពល្អ។

អ្នកនាំពាក្យរូបនេះបានបញ្ជាក់ថា ៖

«ក្នុងដំណាក់កាលនេះ សមាគមនឹងតាមដានការវិវត្តន៍របស់វិស័យដោយយកចិត្តទុកដាក់ ហើយយើងធ្វើការជាមួយសមាជិករបស់យើងក្នុងការពង្រឹងគុណភាពនៃការផ្តល់សេវា ជាពិសេស គុណភាពក្នុងការវាយតម្លៃឥណទាន គឺយើងត្រូវតែធ្វើដោយយកចិត្តទុកដាក់ និងភាពប្រុងប្រយ័ត្ន​បំផុត»។

លោកបានថ្លែងបន្តថា ស្របពេលជាមួយគ្នានេះ ថ្នាក់ដឹកនាំក៏កំពុងជជែកពិភាក្សារកដំណោះស្រាយបន្ថែមលើការសម្រាលបន្ទុក និងការលំបាករបស់អតិថិជនដែរ ព្រោះថា ស្ថានភាពនេះ អតិថិជនក៏កំពុងជួបការលំបាក ខណៈពេលកន្លងមកនេះ សមាគមមីក្រូហិរញ្ញវត្ថុកម្ពុជា បានចេញនូវគោលការណ៍ផ្ទៃក្នុងមួយចំនួន ដើម្បីឱ្យគ្រឹះស្ថានធ្វើការដោយមានភាពទន់ភ្លន់ជាមួយអតិថិជនរបស់ខ្លួននៅក្នុងកាលៈទេសៈដែលលំបាក៕