ក្រោយការទន្ទឹងរងចាំអស់រយៈពេលជាយូរទីបំផុតហ្គេមស្តេចស្វាអ៊ូខុង ឬ Black Myth Wukong បានបង្ហាញវត្តមានជាផ្លុវការហើយ។ក្នុងរយៈពេលតែប៉ុន្មានថ្ងៃប៉ុណ្ណោះហ្គេមនេះត្រូវបានគេចុះឈ្មោះលេងដល់ទៅរាប់សិបលាននាក់ធ្វើឲ្យប្រាក់ចំណូលរបស់ក្រុមហ៊ុនអ្នកផលិតចិនដែលទទួលបានមានចំនួនទៅដល់រាប់រយលានដុល្លាររួចទៅហើយ។

ដំណើរឆ្ពោះទៅភាគខាងលិច”Journey to the West” ដែលជាគំរូរឿងនិទានរបស់ចិនដែលមានតួអង្គសេ្តចអ៊ូខុងកន្លងមកត្រូវបានគេយកមកផលិតជារឿងសំដែងរឿងភាគផងហ្គេមផងប៉ុន្តែនៅមិនទាន់មានក្រុមហ៊ុនអ្នកផលិតហ្គេមក្នុងស្រុកចិនរបស់ខ្លួនជាអ្នកផលិតដោយខ្លួនឯងនៅឡើយទេដែលនេះបានក្លាយទៅជាលើកដំបូងដែលហ្គេមស្តេចស្វាអ៊ូខុងត្រូវបានក្រុមហ៊ុនក្នុងស្រុកGame Scienceដែលមានមូលដ្ឋាននៅក្នុងទីក្រុង Shenzhenជាអ្នកអភិវឌ្ឍ។

ត្រឹមរយៈពេល៨៣ម៉ោងចុងក្រោយនេះ Black Myth Wukong បានលក់ដាច់ចេញបានរហូតទៅដល់ជាង១០លានដងរួចទៅហើយដែលក្នុងនោះតម្លៃជាទូទៅគឺប្រហែលជា៦០ដុល្លារក្នុងមួយហ្គេមហើយជឿជាក់ថាចំនួននេះនឹងនៅតែអាចបន្តកើនឡើងបន្ថែមទៀតនៅក្នុងសប្តាហ៍នេះ។

Black Myth Wukong ត្រូវបានគេទទួលស្គាល់ថាជាហ្គេមកម្រិត AAA ដំបូងរបស់ប្រទេសចិននិងផលិតក្នុងប្រទេសចិនផ្ទាល់ផង។ហ្គេមកម្រិត AAA គឺជាប្រភេទហ្គេមដែលមានការវិនិយោគនិងចំណាយលើការអភិវឌ្ឍន៍កម្រិតខ្ពស់ ផលិតកម្មប្រើប្រាស់រយៈពេលយូរពីសំណាក់ក្រុមហ៊ុនដែលមានកេរ្ត៍ឈ្មោះល្បីល្បាញនៅក្នុងទីផ្សារផលិតហ្គេមឬមានតម្លៃចន្លោះពី៤០ទៅ៥០លានដុល្លារក្នុងមួយហ្គេម។

គួរឲ្យដឹងដែរថា Game Science បើកប្រកាសបើកលក់ជាមុន Pre-Sale តាំងតែពីខែមិថុនាមកម្ល៉េះហើយគិតត្រឹមតែចំណូលពីការបញ្ជាទិញជាមុននេះក្រុមហ៊ុនទទួលបានប្រមាណជា៤០០លានយ័នឬត្រូវជា៥៦លានដុល្លាររួចទៅហើយ។

ស្ថាបនិកក្រុមហ៊ុន Game Science លោក Feng Ji បានអះអាងថាពិភពលោកបានបង្ហាញការភ្ញាក់ផ្អើលយ៉ាងខ្លាំងលើសពីការរំពឹងទុករបស់ពួកគេដូច្នេះក្រុមការងាររបស់យើងនឹងបន្តផលិតនិងអភិវឌ្ឍហ្គេមប្រភេទនេះបន្ថែមជាច្រើនទៀត។

ក្នុងពេលជាមួយគ្នានេះក្រុមអ្នកជំនាញហ្គេមល្បីៗរបស់ពិភពលោកជឿជាក់ថាឧស្សាហកម្មផលិតហ្គេមកម្រិត AAA របស់ចិននឹងអាចវាយលុកចូលទីផ្សារកាន់តែឆាប់រហ័សឡើងនៅពេលខាងមុខពោលគឺចាប់ពីពេលនេះតទៅ។

យ៉ាងណាក្តីក្រៅតែពីប្រាក់ចំណេញដែលរំពឹងទុកថានឹងអាចកើនឡើងទៅដល់ខ្ទង់ពាន់លានដុល្លារនោះហ្គេម Black Myth Wukong ក៏បានក្លាយទៅជាអ្នកជួយផ្សព្វផ្សាយពីវប្បធម៍ចិនបានយ៉ាងផុសផុលផងដែរពីព្រោះថានៅក្នុងវគ្គនីមួយៗនៃហ្គេមសុទ្ធតែជាទីតាំងដែលដកស្រង់ចេញពីទីតាំងទេសចរណ៍បុរាណនិងសម័យនៅទូទាំងប្រទេសចិនហើយមិនត្រឹមតែប៉ុណ្ណោះមនុស្សរាប់លាននាក់នឹងបានបញ្ជៀបកាន់តែខ្លាំងថែមទៀតទៅលើវិស័យក្បាច់គុណចិនដែលមាននៅក្នុងតួអង្គនីមួយៗនៅក្នុងហ្គេមដ៏អស្ចារ្យនេះផងដែរ៕