សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផលិតផលឥណទានសម្បូរបែបពីសំណាក់គ្រឹះស្ថានមីក្រូហិរញ្ញវត្ថុ បាន និងកំពុងជួយលើកស្ទួយជីវភាពរបស់ប្រជាជន ពិសេសជួយដល់អាជីវកម្មខ្នាតតូចៗ ដែលត្រូវការដើមទុនក្នុងការពង្រីការអាជីវកម្មរបស់ខ្លួន ខណៈការប្រើប្រាស់កម្ចី ឬឥណទានទាមទារឱ្យមានផែនការច្បាស់លាស់បើមិនចង់ធ្លាក់ចូលក្នុងបំណុលលើសលប់។
អ្នកស្រី រ៉ង គន្ធា អាយុ ៣៤ឆ្នាំ ប្រកបរបរជាជាងកាត់ដេរ និងស្វាមីមានមុខរបរជាជាងម៉ូតូ មានសមាជិកគ្រួសារចំនួន ៤នាក់ បានឱ្យដឹងថា អ្នកស្រីប្រកបរបរនេះតាំងពីឆ្នាំ២០១៦ មកម្ល៉េះ ហើយមកដល់ឆ្នាំ២០១៩ អាជីវកម្មរបស់អ្នកស្រីត្រូវការដើមទុនបន្ថែម។ គ្រានោះអ្នកស្រីមិនដឹងថា គួរតែស្នើកម្ចីពីស្ថាប័នណាដែលមិនតម្រូវឱ្យមានទ្រព្យដាក់ធានានោះទេ ម៉្យាងវិញទៀតអ្នកស្រីក៏មិនចង់ខ្ចីប្រាក់ពីអ្នកចងការក្នុងភូមិ ព្រោះថាអត្រាការប្រាក់ខ្ពស់ តែជាសំណាងល្អ អ្នកស្រីបានស្គាល់គ្រឹះស្ថានមីក្រូហិរញ្ញវត្ថុមួយតាមរយៈម្តាយរបស់អ្នកស្រី ហើយក៏បានសម្រេចចិត្តប្រើប្រាស់កម្ចីជាលើកដំបូងចំនួន ២លានរៀល ដើម្បីទៅទិញសាច់ក្រណាត់បន្ថែម។
អ្នកស្រីបានឱ្យដឹងថា ពីមួយឆ្នាំទៅមួយឆ្នាំ អ្នកស្រីបានប្រើប្រាស់កម្ចីជាមួយគ្រឹះស្ថានមីក្រូហិរញ្ញវត្ថុនោះជាបន្តបន្ទាប់ ព្រោះថាគ្រឹះស្ថានមានផលិតផលឥណទានសម្បូរបែប ដែលធ្វើឱ្យអ្នកស្រីមានភាពងាយស្រួលក្នុងការប្រើប្រាស់កម្ចី ជាពិសេស មិនចាំបាច់មានទ្រព្យដាក់ធានាកម្ចី។ អ្នកស្រីបានប្រើប្រាស់កម្ចីជាមួយគ្រឹះស្ថាននោះរហូតលើកទី៦ ចំនួន ៤លានរៀល ក្នុងគោលបំណងគាំទ្រមុខរបរស្វាមីរបស់អ្នកស្រីក្នុងការទិញគ្រឿងបន្លាស់ម៉ូតូសម្រាប់ជួសជុលបន្ថែម។
អ្នកស្រីបានបន្តថា ប៉ុន្មានឆ្នាំកន្លងមកនេះជីវភាពគ្រួសាររបស់អ្នកស្រីកាន់តែមានភាពប្រសើរឡើង ចាប់តាំងពីគ្រួសារអ្នកស្រីមានអាជីវកម្មតែមួយរហូតដល់មានអាជីវកម្មច្រើនផ្សេងទៀតក្នុងគ្រួសារដូចជាការចិញ្ចឹមជ្រូកជាដើម។ ចំពោះបញ្ហាកូវីដ-១៩ សម្រាប់គ្រួសារអ្នកស្រីរងក៏ផលប៉ះពាល់បន្តិចបន្តួចដែរ តែចំណូលដែលរកបានអាចទប់ទល់បាន ពីព្រោះគ្រួសារអ្នកស្រីមិនពឹងផ្អែកតែប្រភពចំណូលតែមួយនោះឡើយ។
អ្នកស្រីបានបន្តទៀតថា ពីមុនមួយថ្ងៃអាចរកចំណូលបានត្រឹមតែ ៤០ ០០០ ទៅ ៥០ ០០០ រៀល ប៉ុន្តែបើប្រៀបធៀបនឹងបច្ចុប្បន្នចំណូលដែលរកបានពី ៨០ ០០០ ទៅ ១០០ ០០០ រៀលនៃប្រាក់ចំណេញដុល។ តទៅថ្ងៃអនាគត អ្នកស្រីមានបំណងចង់ពង្រីកមុខររបរនេះឲ្យកាន់តែធំជាងនេះ និងកែលម្អគេហដ្ឋានឲ្យបានល្អប្រសើរជាងនេះ។
ទាក់ទងនឹងការប្រើប្រាស់កម្ចី លោកជំទាវបណ្ឌិត ជា សិរី ទេសាភិបាលរងធនាគារជាតិនៃកម្ពុជា ធ្លាប់បានពន្យល់ថា ការប្រើប្រាស់កម្ចីពីបណ្ដាគ្រឹះស្ថានធនាគារ និងមីក្រូហិរញ្ញវត្ថុមានច្បាប់ត្រឹមត្រូវ មិនមែនជារឿងអាក្រក់នោះទេ ក៏ព្រោះថាប្រសិនបើកម្ចីទៅប្រើប្រាស់ចំគោលដៅ មិនត្រឹមតែមានលទ្ធភាព ក្នុងការសងត្រឡប់នោះទេ ថែមទាំងជួយបង្កើនចំណូល ដែលជួយដល់ជីវភាពក្រុមគ្រួសារទៀតផង។
លោកជំទាវបណ្ឌិត ជា សិរី បានថ្លែងថា ៖
“កម្ពុជាមានធនាគារជាច្រើន ហើយក៏នាំឱ្យប្រជាពលរដ្ឋជំពាក់ធនាគារច្រើន។ ជាការពិត ការជំពាក់លុយគេមិនមែនសុទ្ធតែជារឿងអាក្រក់ទាំងអស់នោះទេ ក៏ព្រោះថា នៅពេលខ្ចីលុយ យើងត្រូវដឹងជាមុនថា តើយើងយកលុយដែលបានខ្ចីនេះទៅធ្វើអ្វី? ប្រសិនបើកម្ចីទៅលើការរកស៊ី ដើម្បីបានចំណូល បង្កើនចំណូល ហើយមានលទ្ធភាពសងត្រឡប់ទៅកាន់ម្ចាស់បំណុល នោះការជំពាក់ ឬខ្ចីលុយគេជារឿងល្អ ក៏ប៉ុន្ដែប្រសិនបើការខ្ចីលុយយកទៅប្រើប្រាស់ខុសគោលដៅ ដូចជា ឡើងស៊េរីទូរស័ព្ទ, ទិញម៉ូតូ ឬឡានថ្មី ទាំងនេះជាហានិភ័យ បង្កគ្រោះថ្នាក់ឈានដល់ការជាប់បំណុលលើសលប់ជាមិនខាន៕”
Account
Security
Favourite Content