ភ្នំពេញ ៖ បច្ចុប្បន្ននេះ ប្រជាកសិករក្នុងស្រុកហាក់ផ្លាស់ប្ដូរពីការប្រើប្រាស់ជីគីមី មកប្រើប្រាស់ជីសរីរាង្គលើដំណាំជំនួសវិញ ដែលការប្រែប្រួលនេះ ក៏ដោយសារតែពួកគេមើលឃើញ​អំពីអត្ថប្រយោជន៍​នៃជីសរីរាង្គ​ចំពោះសុខភាពអ្នកបរិភោគ។

ជាមួយគ្នានេះ ការផលិតជីសរីរាង្គដើម្បីផ្គត់ផ្គង់ការធ្វើកសិកម្មក្នុងស្រុក ក៏កាន់តែមានកំណើនគួរឱ្យ​កត់សម្គាល់ផងដែរ ដែលនេះគឺជាការចំណេញមួយផ្នែកដល់សេដ្ឋកិច្ចកម្ពុជា។

យោងតាមការចុះផ្សាយរបស់ក្រសួងកសិកម្ម បានឱ្យដឹងថា ប្រទេសកម្ពុជាមានក្រុមហ៊ុន​ និង​សិប្បកម្ម​​ខ្នាតមធ្យមជាង១០​ ដែលបាន និងកំពុងផលិតជីសរីរាង្គក្នុងស្រុក​ ក្នុងបរិមាណ​ជាង៤មុឺន​តោន​ ក្នុងមួយឆ្នាំ​ ដេីម្បីផ្គត់ផ្គង់ដល់ប្រជាកសិករ​។

យ៉ាងណាមិញ ដោយទទួលបាន​ការគាំទ្រជាបន្តបន្ទាប់​ ក្រុមហ៊ុន​ និងសិប្បកម្មភាគច្រេីនកំពុងពង្រីកខ្សែច្រវាក់ផលិតកម្ម​ និងបង្កេីនការផលិត ដេីម្បីឆ្លេីយតប​ទៅនឹងតម្រូវ​ការទីផ្សារដែលខ្លួនមានស្រាប់។

លោក ពៅ ធួន នាយកក្រុមហ៊ុនផលិតជីសរីរាង្គបានឱ្យដឹងពីអត្ថប្រយោជន៍របស់ជីសរីរាង្គថា ជីសរីរាង្គវាជួយឱ្យដីធូរ ដីទន់ ដីមានអុកស៊ីសែន មានជីវជាតិល្អ កាលណាដីមានអុកស៊ីសែន វាមានជន្លេន និងសត្វមានប្រយោជន៍ច្រើននៅក្នុងដីនោះ ហើយនៅពេលដែលដីមានសត្វជន្លេនរស់នៅ ប្រាកដណាស់ វានឹងធ្វើឱ្យដំណាំអាចចាប់ឬសបានវែង ស្រូបយកសារធាតុចិញ្ចឹមពីក្នុងដី បានច្រើន ធ្វើឱ្យដំណាំទទួលបានទិន្នផលខ្ពស់ជាងធម្មតា។

លោក ពៅ ធួន​ បានបន្តឱ្យដឹងទៀតថា៖

«វត្ថុជាតិដើមក្នុងការផលិតជីសរីរាង្គទាំងនេះទៀតសោត គឺអាចរកបាននៅក្នុងស្រុក ដូចជាលាមកសត្វ កន្ទក់ ធ្យូងអង្កាម និងស្លឹករុក្ខជាតិមានប្រយោជន៍ជា ច្រើនទៀត…រីឯតម្លៃរបស់ជីសរីរាង្គគឺថោកជាងជីគីមីដល់ទៅពាក់កណ្ដាល»។

គួររំលឹកផងដែរថា គិតត្រឹមថ្ងៃទី២៧ ខែធ្នូ កន្លងទៅថ្មីៗនេះ ក្រសួងកសិកម្មបានធ្វើទស្សនកិច្ច​ដោយចុះពិនិត្យខ្សែច្រវាក់​ផលិតកម្ម និងផ្តល់ការគាំទ្រដល់ក្រុមហ៊ុនផលិតជីក្នុងស្រុក​ចំនួន៤ជុំ រួចមកហើយ នៅក្នុងខេត្តកសិកម្មមួយចំនួនរួមមាន៖ ខេត្តកំពង់ស្ពឺ​ សៀមរាប​ ឧត្តរមានជ័យ​ កំពង់ធំ​ តាកែវ​ ខេត្តកណ្តាល និងខេត្តពោធិ៍សាត់។

តាមរយ:ទស្សនកិច្ចចំនួន៤លេីកនេះ​ ក្រុមការងារក្រសួងបានប្រមូលធាតុចូល​ល្អៗ​ ទទួល​សំណូម​ពរសមស្របមួយចំនួនពីម្ចាស់ក្រុមហ៊ុន​ និងសិប្បកម្ម​ ដេីម្បីលេីកយោបល់ជូនក្រសួង​ និង​រាជរដ្ឋា​ភិបាល​ សំដៅពិនិត្យលទ្ធភាព​បង្កេីនការគាំទ្រដល់ការផលិត​ និងការប្រេីប្រាស់ជីសរីរាង្គផលិត​ក្នុងស្រុកឱ្យកាន់តែទូលំទូលាយថែមទៀត​ ដេីម្បីកាត់​បន្ថយថ្លៃដេីមផលិត​ បង្កេីនប្រាក់ចំណេញ​ និងលេីកកម្ពស់ជីវភាពប្រជាកសិករ​។

បើតាមក្រសួងកសិកម្ម ការផលិត​ និងប្រេីប្រាស់ជីសរីរាង្គក្នុងស្រុក​ជួយដោះស្រាយបញ្ហាបរិស្ថាន​ បង្កេីតការងារសម្រាប់ពលរដ្ឋខ្មែរ​ កាត់បន្ថយការប្រេីប្រាស់ជីគីមី​នាំចូលពីបរទេស និងរក្សានិរន្តរភាព​គុណភាពដីកសិកម្មផងដែរ​ ស្របតាមគោលនយោបាយ របស់ក្រសួង​កសិកម្ម​ រុក្ខាប្រមាញ់​ និងនេសាទ​។

ក្រសួងកសិកម្មក៏បានបន្តលើកទឹកចិត្តដល់ម្ចាស់ក្រុមហ៊ុន​ និងសិប្បកម្មជីសរីរាង្គក្នុងស្រុកទាំងអស់​ឱ្យរក្សាការផលិតដែលស្របទៅតាមស្តង់ដារ​បច្ចេកទេស​ ដេីម្បីធានាគុណភាព​ និងចែកចាយក្នុង​តម្លៃសមរម្យជូនប្រជាកសិករ ប្រេីប្រាស់កាន់តែទូលំទូលាយថែមទៀត៕