ភ្នំពេញ ៖ ក្រោមកិច្ចសម្របសម្រួលនីតិវិធី និងការផ្សារភ្ជាប់ទីផ្សារក្រៅស្រុកពីរដ្ឋាភិបាលតាមរយៈស្ថាប័នពាក់ព័ន្ធ សហគ្រាសកែច្នៃគ្រាប់ស្វាយចន្ទី ហ៊ែនក្រាហ្វធីត ឃែស៊ូ ណាត់ ស្ទឹងត្រែង (HCST) បាន និងកំពុងខិតខំកែច្នៃគ្រាប់ស្វាយចន្ទី ដើម្បីនាំចេញទៅកាន់រាជាណាចក្ររួមនៃព្រីតថេន(អតីតចក្រភពអង់គ្លេស) និងប្រទេសជប៉ុន ជាផលិតផលសម្រេច ក្នុងទំហំរហូតដល់ ១២៥ តោនក្រោយមានការទទួលស្គាល់ពីគុណភាព រសជាតិឆ្ងាញ់ និងស្របតាមស្ដង់ដារចំណីអាហារ ។

លោកស្រី មុត ចរិយា នាយិកាគ្រប់គ្រង ដែលជាម្ចាស់សហគ្រាស HCST បានប្រាប់បណ្តាញសារព័ត៌មាន AMS នាថ្ងៃទី៥ ខែសីហា ឆ្នាំ២០២៦ ឱ្យដឹងថា នាពេលបច្ចុប្បន្ននេះ ក្រុមហ៊ុនមានសមត្ថភាពអាចកែច្នៃ និងផលិតគ្រាប់ស្វាយចន្ទីបានប្រមាណ ១០តោនក្នុងមួយថ្ងៃ ជាមួយចំនួនបុគ្គលិកបម្រើការងារឱ្យសង្វាក់ផលិតកម្មគ្រប់ផ្នែកសរុប ៦៧នាក់។ ជាការកត់សម្គាល់ ផលិតផលសម្រេចនៃការកែច្នៃគ្រាប់ស្វាយចន្ទីរបស់សហគ្រាសមួយនេះ បានផ្គត់ផ្គង់នៅលើទីផ្សារក្នុងស្រុកតិចបំផុត ពោលគឺមានដាក់លក់តែនៅក្នុងផ្សារទំនើប អ៊ីអន ភ្នំពេញ តែប៉ុណ្ណោះ ក្រៅពីនេះ ចំណែកទីផ្សារភាគច្រើនគឺត្រូវបាននាំចេញទៅកាន់ទីផ្សារក្រៅប្រទេស។ ជាក់ស្ដែង នាពេលបច្ចុប្បន្ននេះ សហគ្រាសកំពុងមមាញឹកផលិតសម្រាប់នាំចេញទៅកាន់ទីផ្សារចក្រភពអង់គ្លេស ឬ រាជាណាចក្ររួមនៃព្រីតថេន ព្រមទាំងប្រទេសជប៉ុន សរុបចំនួន ១២៥តោន។

ម្ចាស់សិប្បកម្មកែច្នៃគ្រាប់ស្វាយចន្ទីដែលកំពុងមានទីផ្សារក្រៅស្រុករូបនេះបានបញ្ជាក់ថា ៖

«នេះជាលើកទី ៣ ហើយដែលខ្ញុំនាំចេញទៅអង់គ្លេស ដោយតាមគម្រោង យើងត្រូវនាំចេញចំនួន ១២៥តោន ហើយសម្រាប់តែអង់គ្លេសមានចំនួន ៨០តោន នៅសល់ប៉ុន្មានគឺសម្រាប់នាំចេញទៅជប៉ុនក្នុងឆ្នាំ២០២៦នេះ។ ក្រៅពីប្រទេសទាំង២ យើងក៏កំពុងពិភាក្សាជាមួយអ្នកបញ្ជាទិញនៅប្រទេសអាល្លឺម៉ង់ អ៊ីស្រាអែល និងសហរដ្ឋអាមេរិកផងដែរ»។

ស្ថានទូតចក្រភពអង់គ្លេសប្រចាំកម្ពុជា បានបញ្ជាក់ឱ្យដឹងថា ចំពោះការនាំចេញចន្ទីរបស់សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង ក៏ដូចជាការដឹកជញ្ជូន គឺមានការគាំទ្រពីទីភ្នាក់ងារឥណទាននាំចេញរបស់រដ្ឋាភិបាលចក្រភពអង់គ្លេស (United Kingdom’s Export Finance) ដែលជាស្ថាប័នផ្តល់ការគាំទ្រផ្នែកហិរញ្ញវត្ថុ និងការធានាពាណិជ្ជកម្ម ដើម្បីជំរុញការនាំចេញ និងការវិនិយោគអន្តរជាតិ។ ដូច្នេះ សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង អាចពង្រីកការនាំចូលទៅកាន់ទីផ្សារចក្រភពអង់គ្លេសដោយជោគជ័យ ដែលឆ្លុះបញ្ចាំងពីគុណភាព ស្តង់ដារ និងសក្ដានុពលនៃវិស័យកែច្នៃកសិផលរបស់កម្ពុជា។

ជាមួយគ្នានេះ ស្ថានទូតចក្រភពអង់គ្លេសប្រចាំកម្ពុជា ក៏បានអបអរសាទរដល់ក្រុមការងាររបស់សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង និងបានបង្ហាញក្តីរំពឹងថា នឹងមានផលិតផលកម្ពុជាកាន់តែច្រើនបង្ហាញវត្តមាននៅលើធ្នើលក់ក្នុងហាងនានាទូទាំងចក្រភពអង់គ្លេសនាពេលខាងមុខនេះ។

សូមជម្រាបថា តាមរយៈការនាំចេញផលិតផលសម្រេចនៃគ្រាប់ស្វាយចន្ទីរបស់ សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង នាពេលនេះ មិនត្រឹមតែនាំយកផលិតផលកម្ពុជាដែលមានគុណភាពខ្ពស់ទៅកាន់ទីផ្សារអន្តរជាតិប៉ុណ្ណោះទេ ប៉ុន្តែថែមទាំងផ្សព្វផ្សាយពីស្នាដៃ មោទនភាព និងសក្ដានុពលរបស់កម្ពុជាទៅកាន់ពិភពលោកផងដែរ។ សហគ្រាសកែច្នៃមួយនេះបានអះអាងថា នេះជាការបន្តពង្រីកទីផ្សារ និងលើកកម្ពស់តម្លៃបន្ថែមសម្រាប់ផលិតផលស្វាយចន្ទីកម្ពុជានៅលើឆាកអន្តរជាតិ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានលើកឡើងថា ការដឹកជញ្ជូនផលិតផលស្វាយចន្ទីរបស់សហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង ទៅកាន់ទីផ្សារចក្រភពអង់គ្លេស គឺជាមោទនភាពសម្រាប់វិស័យស្វាយចន្ទីកម្ពុជា។

លោកបានបញ្ជាក់ថា ការនាំផលិតផលកែច្នៃរបស់កម្ពុជាទៅកាន់ទីផ្សារអឺរ៉ុប មិនមែនជារឿងងាយស្រួលនោះទេ ដោយសារគេតម្រូវការស្តង់ដារគុណភាព និងសុវត្ថិភាពស្បៀងអាហារមានភាពតឹងរ៉ឹង។ ដូច្នេះ ការណ៍ដែលសហគ្រាស ហ៊ែនក្រាហ្វធីត ឃែស៊ូ ណាត់ ស្ទឹងត្រែង អាចនាំផលិតផលទៅដល់ទីផ្សារចក្រភពអង់គ្លេសបាន គឺជាជំហានដ៏សំខាន់មួយក្នុងការលើកកម្ពស់តម្លៃបន្ថែម និងកេរ្តិ៍ឈ្មោះផលិតផលស្វាយចន្ទីកម្ពុជា។

យោងតាមសមាគមស្វាយចន្ទីកម្ពុជា បានឱ្យដឹងថា ចាប់តាំងពីខែមករា ដល់ខែមិថុនា ឆ្នាំ២០២៦ កម្ពុជាបាននាំចេញគ្រាប់ស្វាយចន្ទីឆៅទៅកាន់ទីផ្សារអន្តរជាតិជាង ១,០៣០,០០០តោន ដែលមានតម្លៃប្រមាណ ១.៧៥១ពាន់លានដុល្លារ កើនឡើង ២៨.៩ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥។ នៅឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅប្រមាណ ១លានតោន ទៅកាន់ទីផ្សារអន្តរជាតិ ដែលមានតម្លៃប្រមាណ ១.៥ពាន់លានដុល្លារ កើនឡើង ២៧ភាគរយ បើធៀបនឹងឆ្នាំ២០២៤។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា ក្នុងនោះខេត្តចំនួន ១០ របស់កម្ពុជា មានផ្ទៃដីដាំដុះស្វាយចន្ទីច្រើនជាងគេរួមមាន ខេត្តកំពង់ធំ ចំនួន ១៤៧ ៧០៣ហិកតា, ខេត្តក្រចេះ ១០២ ៥២០ ហិកតា, ខេត្តរតនគិរីចំនួន ៩៧ ២៥៨ ហិកតា, ខេត្តកំពង់ចាម ៤៦ ៥៨២ ហិកតា, ស្ទឹងត្រែង ៤៤ ២៥០ ហិកតា, ខេត្តត្បូងឃ្មុំ ៣៦ ៤០៣ ហិកតា, ខេត្តសៀមរាប ៣៥ ៩១៤ ហិកតា, ខេត្តព្រះវិហារ ២៨ ៩៦៥ ហិកតា, ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

​