ភ្នំពេញ៖ កម្ពុជា នៅតែអាចរក្សាបានភាពធន់ផ្នែកសេដ្ឋកិច្ចបើទោះជាស្ថិតនៅក្នុងបរិការណ៍ដែលសកលលោកកំពុងជួបប្រទះបញ្ហាប្រឈមមួយចំនួនដូចជា ជម្លោះភូមិសាស្រ្តនយោបាយ និងការឡើងថ្លៃតម្លៃថាមពលក៏ដោយ។ នេះជាការលើកឡើងរបស់លោក Yasuto Watanabe ប្រធានអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) នៅក្នុងជំនួបពិភាក្សាការងារជាមួយ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា កាលពីថ្ងៃទី២៨ ខែមេសា ឆ្នាំ២០២៦។

លោក Yasuto Watanabe បានលើកឡើងថា ឥទ្ធិពលនៃកត្តាប្រឈមថ្មីៗ អាចធ្វើឱ្យសន្ទុះកំណើនសេដ្ឋកិច្ចកម្ពុជាមានភាពថមថយខ្លះៗ ប៉ុន្តែនៅតែអាចរក្សាបាននូវអត្រាកំណើនល្អ ដោយសារមានមូលដ្ឋានសេដ្ឋកិច្ចរឹងមាំ និងការឆ្លើយតបគោលនយោបាយមានប្រសិទ្ធភាព។ បន្ថែមពីនេះ កម្ពុជា ក៏អាចរក្សាបានទំនុកចិត្តលើប្រព័ន្ធធនាគារ ស្ថានភាពគុណភាពឥណទាន និងការអនុវត្តវិធានការមួយចំនួន ដែលទាំងអស់នេះសុទ្ធតែមានសារៈសំខាន់សម្រាប់សេដ្ឋកិច្ច។

លោកជំទាវ បណ្ឌិត ជា សិរី ទេសាភិបាល ធនាគារជាតិនៃកម្ពុជា បានលើកឡើងថា គោលនយោបាយរបស់រាជរដ្ឋាភិបាលពាក់ព័ន្ធនឹងការអភិវឌ្ឍវិស័យថាមពល គឺផ្តោតលើប្រភពផ្គត់ផ្គង់គ្រប់គ្រាន់ និងថាមពលស្អាត ដែលជាកត្តាសំខាន់ក្នុងការកាត់បន្ថយផលប៉ះពាល់ពីការកើនឡើងតម្លៃប្រេងឥន្ធនៈ។ បន្ថែមលើនេះ ការពង្រីកឥណទានដល់សហគ្រាសខ្នាតតូច និងមធ្យម (SMEs) និងការលើកកម្ពស់​សេវាហិរញ្ញវត្ថុប្រកបដោយចីរភាពគឺជាចំណុចអាទិភាព។

សូមជម្រាបថា តាមរយៈទស្សនវិស័យសេដ្ឋកិច្ចតំបន់អាស៊ាន+៣ របស់ AMRO កំណើនសេដ្ឋកិច្ចរបស់ប្រទេសកម្ពុជា ត្រូវបានព្យាករថា នឹងកើនឡើងត្រឹម ៤,៩ ភាគរយ ជាមួយនឹងអត្រាអតិផរណា ២,៩ ភាគរយនៅឆ្នាំ២០២៦ ដោយសារភាពមិនប្រាកដប្រជាពីខាងក្រៅដែលអាចជះឥទ្ធិពលដល់សន្ទុះកំណើនសេដ្ឋកិច្ច។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់នៅក្នុងសារលិខិតអបអរខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ ឧសភា ថា កំណើនសេដ្ឋកិច្ចកម្ពុជា ឆ្នាំ២០២៦ ដែលត្រូវបានស្ថាប័នជាតិ និងអន្តរជាតិ ធ្វើការព្យាករថា​នឹងមានភាពរឹងមាំ គឺជាសក្ខីភាពឆ្លុះបញ្ចាំងពីភាពធន់ និងម្ចាស់ការនៃសេដ្ឋកិច្ចជាតិ បើទោះបីជាត្រូវប្រឈមមុខនឹងឥទ្ធិពលអវិជ្ជមានពីការប្រែប្រួលភូមិសាស្ត្រនយោបាយ និងវិបត្តិថាម​ពលសកលក៏ដោយ។

សម្ដេចធិបតី បានអះអាងថា៖

«ទោះបីត្រូវប្រឈមនឹងភាពមិនប្រាកដប្រជានៃវិបត្តិសកល ក៏ដូចជាការរំលោភបំពានពីប្រទេសជិតខាងក្តី សេដ្ឋកិច្ចកម្ពុជាបានស្ទុះងើបឡើងវិញយ៉ាងឆាប់រហ័ស និងបន្តស្ថិតលើមាគ៌ាកំណើនដ៏រឹងមាំក្នុងអត្រាប្រមាណ ៥,២% ក្នុងឆ្នាំ២០២៥។ សម្រាប់ឆ្នាំ២០២៦ កំណើនសេដ្ឋកិច្ចកម្ពុជា ក៏ត្រូវបានព្យាករថានឹងរក្សាអត្រាកំណើនខ្ពស់ ដែលលទ្ធផលនេះបានឆ្លុះបញ្ចាំងយ៉ាងច្បាស់ពីភាពធន់នៃសេដ្ឋកិច្ចជាតិក្នុងបរិការណ៍នៃការវិវឌ្ឍយ៉ាងស្មុគស្មាញនៃសេដ្ឋកិច្ច និងនយោបាយទាំងក្នុងតំបន់ និងសកលលោក»។

គួរកត់សម្គាល់ដែរថា​​ នៅក្នុងរយៈពេល២ខែឆ្នាំនេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគផ្ទាល់ពីបរទេសរហូតដល់ ១០៥គម្រោង ជាមួយទុនវិនិយោគសរុបជិត១ពាន់លានដុល្លារអាម៉េរិក។ ការអនុ​ម័តគម្រោងថ្មីៗជាបន្តបន្ទាប់នេះបានជំរុញឱ្យចំនួនសហគ្រាស ក្រុមហ៊ុន និងរោងចក្រនៅកម្ពុជាកើនដល់ជាង ៤៧ ០០០ទីតាំងគិតត្រឹមត្រីមាសទី១ ដែលកំពុងផ្ដល់ដង្ហើមសេដ្ឋកិច្ច និងការងារដោយផ្ទាល់ដល់ប្រជាពលរដ្ឋប្រមាណ ២,៣លាននាក់។ យ៉ាងណាមិញ ស្ថាប័នហិរញ្ញវត្ថុអន្តរជាតិធំៗនៅតែបន្តរក្សាការព្យាករវិជ្ជមានសម្រាប់កំណើនសេដ្ឋកិច្ចកម្ពុជា បើទោះជាវិបត្តិប្រេងឥន្ធនៈបង្កឡើងដោយសង្គ្រាមនៅមជ្ឈិមបូព៌ាកំពុងគំរាមកំហែងដល់សេដ្ឋកិច្ចពិភពលោក រួមទាំងកម្ពុជាក៏ដោយ។

ធនាគារអភិវឌ្ឍន៍អាស៊ី (ADB) បានរក្សាការព្យាករណ៍កំណើនសេដ្ឋកិច្ចកម្ពុជាក្នុងកម្រិតវិជ្ជមាន ៤,៥% សម្រាប់ឆ្នាំ២០២៦ ប្រសិនបើផលរំខានពីបញ្ហាសង្គ្រាមនៅមជ្ឈិមបូព៌ាទៅលើទីផ្សារសកលមិនអូសបន្លាយពេលយូរ។ ការព្យាករនេះ ផ្អែកលើការងើបឡើងវិញនៃវិស័យសេវាកម្ម និងឧស្សាហកម្មមិនមែនកាត់ដេរ។ ដោយឡែក ធនាគារពិភពលោក (World Bank) បានទម្លាក់ការព្យាករសេដ្ឋកិច្ចកម្ពុជាបន្តិច ពី ៤,៣% មកនៅត្រឹម ៣,៩% សម្រាប់ឆ្នាំ២០២៦ ហើយរំពឹងថា នឹងងើបឡើងវិញដល់ ៤,៩% នៅឆ្នាំ២០២៧។ ការទម្លាក់ការព្យាករនេះ បណ្តាលមកពីសម្ពាធនៃតម្លៃថាមពល និងការធ្លាក់ចុះនៃអំណាចទិញពីទីផ្សារអន្តរជាតិ។ ទោះជាយ៉ាងណា រាជរដ្ឋាភិបាលកម្ពុជានៅតែបន្តអនុវត្តវិធានការកែទម្រង់មុតស្រួច ដើម្បីធានាថា នាវាសេដ្ឋកិច្ចកម្ពុជានឹងនៅតែអាចពុះពាររលកវិបត្តិ និងរក្សាបាននូវកំណើនប្រកបដោយចីរភាព។

ដោយឡែក លោកស្រី Yasmin Siddiqi នាយិកាប្រចាំប្រទេសកម្ពុជារបស់ធនាគារអភិវឌ្ឍន៍អាស៊ី(ADB​) នៅក្នុងវេទិកាពាណិជ្ជកម្មពហុភាគីឆ្នាំ២០២៦ បានលើកឡើង​ថា កម្ពុជាបានបង្ហាញពីភាពធន់របស់ខ្លួនអស់រយៈពេលជាច្រើនទសវត្សរ៍មកហើយ ទោះបីជាធ្លាប់ឆ្លងកាត់ប្រវត្តិសាស្ត្រដែលពោរពេញដោយបញ្ហាប្រឈមក៏ដោយ។ មុនពេលមានវិបត្តិជំងឺកូវីដ-១៩ សេដ្ឋកិច្ចកម្ពុជា គឺជាសេដ្ឋកិច្ចមួយដែលរីកចម្រើនលឿនបំផុត ដោយមានអត្រាកំណើនប្រចាំឆ្នាំចន្លោះពី ៥ ភាគរយ ទៅ ៧ ភាគរយ។ ក្នុងដំណាក់កាលស្តារឡើងវិញ កម្ពុជានៅតែបន្តបង្ហាញភាពរឹងមាំ ទោះបីជាមានផលរប៉ះទង្គិចពីខាងក្រៅ ដូចជា ការបិទព្រំដែន ជម្លោះអន្តរជាតិ និងការដំឡើងពន្ធពាណិជ្ជកម្មពីប្រទេសផ្សេងៗក៏ដោយ។

លោកស្រីបានបញ្ជាក់ថា៖

«ទោះបីជាមានសម្ពាធពីសេដ្ឋកិច្ចសកលក៏ដោយ ក៏កម្ពុជានៅតែត្រូវបានមើលឃើញថា ជាប្រទេសដែលមានភាពរឹងមាំ និងមានសមត្ថភាពក្នុងការឆ្លើយតបទៅនឹងវិបត្តិបានយ៉ាងល្អប្រសើរ»៕