ភ្នំពេញ៖ គិតត្រឹមចុងខែកក្កដា ឆ្នាំ២០២៦ សាជីវកម្មធានាឥណទានកម្ពុជា (CGCC) បានសម្រេចធានាឥណទានជូនដល់សហគ្រាស និងអាជីវកម្មក្នុងស្រុកសរុបចំនួន ១០.២៨៩ គណនី ជាមួយទំហំទឹកប្រាក់កម្ចីកើនឡើងដល់ប្រមាណ ៦០២,៩៥ លានដុល្លារអាមេរិក។ សមិទ្ធផលមួយនេះបានឆ្លុះបញ្ចាំងពីតួនាទីយ៉ាងសំខាន់របស់ CGCC ក្នុងការដោះស្រាយបញ្ហាប្រឈមលើកង្វះទ្រព្យធានា និងការបង្កើនលទ្ធភាពទទួលបានហិរញ្ញប្បទានផ្លូវការនៅកម្ពុជាសម្រាប់ម្ចាស់សហគ្រាស ក៏ដូចជាអាជីវកម្មខ្នាតតូច និងមធ្យម។

យោងតាមព្រឹត្តិបត្រព័ត៌មានចុងក្រោយរបស់ CGCC​ បានឱ្យដឹងថា ទិន្នន័យនៃការធានាឥណទាន គិតចាប់តាំងពីការដាក់ឱ្យដំណើរការគម្រោងដំបូងកាលពីអំឡុងខែមករា ឆ្នាំ២០២១ រហូតដល់ថ្ងៃទី៣១ ខែកក្កដា ឆ្នាំ២០២៦ មានការរីកចម្រើនជាលំដាប់ ដោយចំនួនគណនីមានការកើនឡើងពី ៩.៨៤១ គណនីក្នុងខែឧសភា មក ៩.៨៩១ គណនីក្នុងខែមិថុនា និងបន្តកើនដល់ ១០.២៨៩ គណនីនៅចុងខែកក្កដា ឆ្នាំ២០២៦។

តាមរយៈការវិភាគលើទិន្នន័យហិរញ្ញវត្ថុ ក្នុងចំណោមទំហំឥណទានដែលមានការធានា (Guaranteed Loan Amount – GLN) ទាំង ៦០២,៩៥ លានដុល្លារអាមេរិក គឺមានសន្និធិឥណទាន (Guaranteed Outstanding) ប្រមាណ ២៥៨,៦០ លានដុល្លារអាមេរិក ខណៈដែលសន្និធិទំហំការធានាឥណទាន (Guarantees Outstanding) មានចំនួន ១៧៧,៧៩ លានដុល្លារអាមេរិក។ ទន្ទឹមនឹងភាពរីកចម្រើននៃកម្ចី ឥណទានមិនដំណើរការដែលមានការធានា (Non-Performing Guarantee – NPG) ស្ថិតក្នុងអត្រា ៩,៧០% ដែលទាមទារឱ្យមានការគ្រប់គ្រងហានិភ័យប្រកបដោយប្រុងប្រយ័ត្នបន្ថែមទៀត។

ពាក់ព័ន្ធនឹងទិសដៅយុទ្ធសាស្ត្រ CGCC ក៏បានចូលរួមយ៉ាងសកម្មនៅក្នុង «វេទិកាថ្នាក់ជាតិស្តីពីហិរញ្ញប្បទានសម្រាប់ធុរកិច្ច ឆ្នាំ២០២៦» ដែលបានរៀបចំកាលពីពេលកន្លងទៅនៅសណ្ឋាគារ សុខា ភ្នំពេញ រយៈពេល២ថ្ងៃ ក្រោមវត្តមានថ្នាក់ដឹកនាំនៃក្រសួង ស្ថាប័ន ពាក់ព័ន្ធ រួមទាំងវិស័យឯកជន ដែលមានជំនាញសេដ្ឋកិច្ច និងហិរញ្ញវត្ថុជាច្រើននាក់ ។

ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC បានចាត់ទុកវេទិកាមួយនេះជាថ្នាលយុទ្ធសាស្ត្រដ៏សំខាន់សម្រាប់ការពង្រឹងកិច្ចសហប្រតិបត្តិការរវាងស្ថាប័នពាក់ព័ន្ធ ការប្រមូលមតិយោបល់ពីវិស័យឯកជន និងការបន្តកែលម្អយន្តការគាំទ្រផ្នែកហិរញ្ញប្បទានរបស់រាជរដ្ឋាភិបាលឱ្យកាន់តែមានប្រសិទ្ធភាព និងឆ្លើយតបនឹងតម្រូវការរបស់ធុរកិច្ចកម្ពុជា ជាពិសេស សហគ្រាសធុនមីក្រូ តូច និងមធ្យម (MSMEs) នៅកម្ពុជា។

សូមរំលឹកដែរថា នៅក្នុងវេទិកាដែលបានរៀបចំដូចបានជម្រាបខាងលើនេះ លោកស្រី ជុន សុថានី ប្រធាននាយកដ្ឋានយុទ្ធសាស្ត្រ និងអភិវឌ្ឍន៍អាជីវកម្មរបស់ CGCC បានដឹកនាំកិច្ចពិភាក្សាជាមួយតំណាងសហគ្រាសធុនតូច និងមធ្យម ដើម្បីស្វែងយល់ពីតម្រូវការហិរញ្ញវត្ថុជាក់ស្តែង ហើយជាលទ្ធផលទទួលបានពីកិច្ចពិភាក្សានេះ នឹងត្រូវយកទៅប្រើប្រាស់ជាធាតុចូលដ៏សំខាន់សម្រាប់ CGCC និងស្ថាប័នពាក់ព័ន្ធ ដើម្បីរៀបចំយុទ្ធសាស្ត្រ គោលនយោបាយថ្មីៗ ដែលមានលក្ខណៈប្រទាក់ក្រឡាគ្នា សំដៅលើកកម្ពស់បរិយាបន្នហិរញ្ញវត្ថុ និងបង្កើតភាពធន់មាំសម្រាប់សេដ្ឋកិច្ចជាតិក្នុងរយៈពេលវែង។

លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិ រាជបណ្ឌិត្យ​សភាកម្ពុជា បានមានប្រសាសន៍ថា​ សមិទ្ធផលនេះបានឆ្លុះបញ្ចាំងយ៉ាងច្បាស់ពីតួនាទីយ៉ាងសំខាន់របស់ CGCC ក្នុងការដោះស្រាយបញ្ហាប្រឈមលើកង្វះទ្រព្យធានារបស់ម្ចាស់អាជីវកម្ម និងការបង្កើនលទ្ធភាពទទួលបានហិរញ្ញប្បទានផ្លូវការនៅកម្ពុជាឱ្យកាន់តែមានភាពទូលំទូលាយ។

លោកបណ្ឌិត បានគូសបញ្ជាក់ថា ការកើនឡើងជាលំដាប់នៃចំនួនគណនីពី ៩.៨៤១ គណនីក្នុងខែឧសភា រហូតដល់ ១០.២៨៩ គណនីនៅចុងខែកក្កដា ឆ្នាំ២០២៦ គឺជាសូចនាករវិជ្ជមានដ៏ច្បាស់លាស់មួយដែលបង្ហាញថា CGCC បាន និងកំពុងបំពេញតួនាទីជាស្ពានចងភ្ជាប់រវាងស្ថាប័នហិរញ្ញវត្ថុ និងសហគ្រាសធុនមីក្រូ តូច និងមធ្យម (MSMEs) ព្រមតាំងឆ្លើយតបទៅនឹងគោលនោយបាយ រាជរដ្ឋាភិបាលដែលកំពុងជំរុញ និងលើកស្ទួយដល់MSMEs ។ ការស្ដាប់ និងការរៀបចំយុទ្ធសាស្ត្រប្រទាក់ក្រឡា ជាមួយតំណាង SMEs គឺដើម្បីស្វែងយល់ពីតម្រូវការហិរញ្ញវត្ថុពិតប្រាកដ ហើយវានឹងជួយឱ្យ CGCC អាចបង្កើតផលិតផលធានាឥណទានថ្មីៗ មានភាពបត់បែន ឆ្លើយតបចំតម្រូវការអាជីវកម្ម ៕