ភ្នំពេញ ៖ ក្នុង​រយៈពេល ៣ ខែ ឬត្រីមាសទី ១​ ឆ្នាំ ២០២៦ កន្លងទៅនេះ កម្ពុជា​សម្រេច​បានការនាំចេញសំបកកង់រថយន្ត ទៅកាន់ទីផ្សារ​អន្តរជាតិក្នុងទំហំទឹកប្រាក់ ​៤៧២ លានដុល្លារអាម៉េរិក បើធៀបនឹង​ត្រីមាសទី ១ ឆ្នាំ ២០២៥​ កើនឡើង​ប្រមាណជាង ​១៤០ លានដុល្លារ ឬប្រមាណ ៤២,៣៧ ភាគរយ។ ​នេះបើតាម​របាយការណ៍របស់អគ្គនាយកដ្ឋានគយ និងរដ្ឋាករ​កម្ពុជា។​

យោងតាមរបាយការណ៍របស់អគ្គនាយកដ្ឋានគយ​និងរដ្ឋាករ​កម្ពុជា បានបង្ហាញថា  ប្រទេស​ចំនួន ​១០ ដែល​ទទួល​ទិញសំបក​កង់ឡាន​ពីកម្ពុជា​ច្រើនជាង​គេ​ ក្នុងនោះ ប្រទេស​អាម៉េរិក​ ជាប់ចំណាត់ថ្នាក់ទី ១ ដែលទិញសំបកកង់ឡានពីកម្ពុជា​ក្នុងទំហំទឹកប្រាក់​រហូតដល់​ ៣៥៨ លានដុល្លារអាម៉េរិក ឬប្រមាណ ៧៥,៨៤ ភាគរយ​នៃទីផ្សារ​នាំចេញសំបក​កង់ឡានពីកម្ពុជា​សរុប។ ​ក្រៅពីទីផ្សារអាម៉េរិក​ កម្ពុជា​បាននាំចេញសំបក​កង់ឡាន​ទៅកាន់ប្រទេស ប្រេស៊ីល កាណាដា បារាំង ចក្រភពអង់គ្លេស ហូឡង់ អេស្ប៉ាញ​ អ៊ីតាលី សាធារណរដ្ឋ​អាហ្វ្រិក​ខាង​ត្បូង និងប្រទេស​ម៉ិច​ស៊ិចកូ។​

លោក ​គិន ឧត្តមមុនីស៊ីណា នាយក​ប្រតិបត្តិ​ក្រុមហ៊ុន Sailun បានមានប្រសាសន៍ថា សំបកកង់រថយន្ត​របស់​ Sailun ដែលផលិត​នៅកម្ពុជា បានរួម​ចំណែកទីផ្សារធំ ទាំង​ទីផ្សារ​នាំចេញ និងក្នុងស្រុក ជាក់ស្ដែង​ក្នុងរយៈពេល​ ៣ ខែ ​ដើមឆ្នាំនេះ គ្រាន់តែទីផ្សារ​ក្នុង​ប្រទេសកម្ពុជា Sailun បានលក់​សំបក​កង់​រថយន្ត​សរុបប្រមាណ​ជិត ​១០ ម៉ឺន​គ្រាប់ ហើយនៅក្នុង​ឆ្នាំ ២០២៦ ពេញមួយឆ្នាំ​ ក្រុមហ៊ុនរំពឹងថា នឹងអាចចែកចាយលើទីផ្សារ​បាន​ប្រមាណ ៣០ ម៉ឺនគ្រាប់។

លោក​បានបន្តថា សម្រាប់​ការនាំចេញ​ក្នុងរយៈពេល​ ៣ ខែនេះ Sailun ក៏បាន​រួម​ចំណែក​ខ្ពស់​ជាង​គេ​ក្នុង​ចំណោម​រោងចក្រ​ ដែលកំពុង​មានដំណើរការផលិត​នៅកម្ពុជា​ផងដែរ។ លោក​ថា​៖

“ក្នុងមួយឆ្នាំ​ Sailun អាចផលិត​សំបកកង់រថយន្ត​ប្រភេទកង់តូច ​បានប្រមាណ​ជិត ២១ លាន​គ្រាប់ ហើយ​សំបកកងរថយន្តធំបានប្រមាណ​ ១ លាន ៦៥ ម៉ឺន​គ្រាប់​ ដោយយើងអាច​ចែកចាយក្នុង​ស្រុកបានប្រមាណ​ ៣០ ម៉ឺន​ទៅ ៤០ ម៉ឺន​គ្រាប់​ ក្រៅពីនោះ​គឺនាំចេញទៅក្រៅប្រទេស​ទាំងអស់។”​

លោកបន្ថែមថា ​ទីផ្សារ​របស់សំបក​កង់​រថយន្ត ​Sailun ផលិត​នៅកម្ពុជា​នាពេល​បច្ចុប្បន្ន​នេះ គឺបាននាំចេញទៅកាន់​ប្រទេស​ប្រមាណ ៣០ ប្រទេស​លើពិភពលោក ដែលធ្វើឱ្យប្រទេស​ទាំង​នោះបានស្គាល់ និងប្រើប្រាស់ផលិតផលដែលផលិតផលនៅក្នុងប្រទេស​កម្ពុជា។ តាមរយៈការផលិតផលសំបកកង់រថយន្តរបស់​ Sailun នៅកម្ពុជា​នេះដែរ បានធ្វើឱ្យតម្រូវការ​កៅស៊ូ​ក្នុងស្រុកមានកំណើន​ឡើងមួយកម្រិតទៀត​។

លោក​ឆេង ថុង ប្រធានក្រុមប្រឹក្សា​ភិបាល​នៃ​សហគមន៍​កសិកម្ម​សំបូរ​មានជ័យ បានមានប្រសាសន៍ប្រាប់បណ្ដាញ​ព័ត៌មាន AMS ឱ្យដឹងថា ចាប់តាំង​ពីមានវត្តមាន​រោងចក្រផលិត​សំបកកង់​រថយន្ត​នៅកម្ពុជា លោក​កត់​សម្គាល់ឃើញថា​ ទីផ្សារ​កៅស៊ូ​របស់សហគមន៍បានហាក់​មាន​លំនឹង​ល្អ ដោយតម្លៃ​ក៏ល្អប្រសើរ​ជាង​មុន ធ្វើឱ្យ​កសិករ​ក្នុងសហគមន៍​បានទទួលផល​ចំណេញពីរបរ​ដាំដុះដំណាំកៅស៊ូ។

លោក​បានបន្តថា ក្នុង​ឆ្នាំ ២០២៦ នេះ កសិករ​ក្នុង​សហគមន៍ បាន​ចាប់ផ្ដើម​ពង្រីកការ​ដាំដុះបន្ថែមទៀត។ ដោយឡែក​ ដើមកៅស៊ូណា​ដែល​ចាស់ៗ​ចៀរជ័​រលែង​បាន​ ក៏ត្រូវកាប់ចោល​ដើម្បីដាំថ្មី ដោយរំពឹងថា​តម្លៃកៅស៊ូ​នឹង​នៅតែល្អប្រសើរ​ដូចបច្ចុប្បន្ន​​នេះ​បន្តទៀត​។​

គិតត្រឹមឆ្នាំ២០២៦នេះ កម្ពុជា​មានរោងចក្រផលិតសំបក​កង់ឡាន​សរុប​ចំនួន ៨ ដោយ​មានទីតាំងស្ថិតនៅក្នុង​តំបន់​សេដ្ឋកិច្ចពិសេស​ចំនួន​ ៥ ក្នុង​ខេត្តស្វាយរៀង ព្រះសីហនុ និង​ក្រចេះ។ តាមរយៈរោងចក្រផលិត​សំបកកង់ឡាន​ទាំង​ ៨ ​ដែលមានវត្តមាននៅកម្ពុជា​នាពេលនេះ នឹង​អាច​រួមចំណែកដល់ផលិត​និងនាំចេញ​របស់កម្ពុជា ធ្វើឱ្យតម្រូវការ​កម្លាំង​ពលកម្ម​កើនឡើង ផ្ដល់​ប្រាក់ចំណូលដល់​កម្មករ​និយោជិត ជាពិសេស ​បានរួចចំណែកដល់ការទិញជ័រ​កៅស៊ូពីកសិករ៕