សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ធំ៖ ជប៉ុនគ្រោងនាំយកបច្ចេកវិទ្យាចម្រាញ់ប្រេងសំបកស្វាយចន្ទី (CNSL) មកកាន់ខេត្តកំពង់ធំ ដើម្បីសាកល្បងផលិតប្រេងពីសំបកស្វាយចន្ទី និងកែច្នៃកាកសំណល់ដែលនៅសល់ទៅជាផលិតផលមានមូលដ្ឋានពីកាបូន ខណៈគម្រោងនេះត្រូវបានគេរំពឹងថានឹងបើកឱកាសថ្មីសម្រាប់ការបង្កើតតម្លៃបន្ថែមក្នុងវិស័យស្វាយចន្ទីកម្ពុជា។
នៅថ្ងៃទី២៦ ខែសីហា សមាគមស្វាយចន្ទីកម្ពុជា (សសក) បានជួបពិភាក្សាការងារជាមួយមជ្ឈមណ្ឌលសហប្រតិបត្តិការជប៉ុនសម្រាប់ប្រេង និងថាមពលប្រកបដោយចីរភាព (JCCP) និងក្រុមហ៊ុន Top Planning Japan Co., Ltd. (TPJ) នៅការិយាល័យកណ្តាលរបស់ សសក ក្នុងខេត្តកំពង់ធំ ដោយផ្តោតលើការបង្កើតឱកាសថាមពលកកើតឡើងវិញពីអនុផលនៃការកែច្នៃស្វាយចន្ទី។
JCCP តំណាងដោយលោកបណ្ឌិត Okamura និងក្រុមហ៊ុន TPJ បានចែករំលែកផែនការនាំយករោងចក្រសាកល្បងមកកាន់ខេត្តកំពង់ធំ។ គម្រោងនេះនឹងសាកល្បងបច្ចេកវិទ្យាចម្រាញ់ប្រេង CNSL ពីសំបកស្វាយចន្ទី និងវាយតម្លៃឱកាសសម្រាប់កិច្ចសហប្រតិបត្តិការនាពេលអនាគតជាមួយ សសក និងឧស្សាហកម្មកែច្នៃស្វាយចន្ទីរបស់កម្ពុជា។
យោងតាម JCCP បច្ចេកវិទ្យាចុងក្រោយរបស់ជប៉ុនអាចចម្រាញ់យកប្រេង CNSL ត្រឹមតែពីរដំណាក់កាល ខណៈប្រព័ន្ធធម្មតាអាចត្រូវការរហូតដល់ប្រាំដំណាក់កាល។ បច្ចេកវិទ្យានេះក៏ត្រូវបានរចនាឡើងឱ្យប្រើប្រាស់អគ្គិសនីតិច ត្រូវការទីធ្លាតូច និងកាត់បន្ថយផលប៉ះពាល់ដល់បរិស្ថាន រួមទាំងការភាយក្លិនផងដែរ។
គម្រោងសាកល្បងបង្ហាញប្រេង CNSL នៅរោងចក្រ Mirarth ក្នុងខេត្តកំពង់ធំ គ្រោងនឹងចាប់ផ្តើមដំណើរការនៅខែធ្នូ ឆ្នាំ២០២៦។ រោងចក្រនេះនឹងក្លាយជារោងចក្រចម្រាញ់ប្រេង CNSL ទីពីរនៅកម្ពុជា បន្ទាប់ពីរោងចក្រខ្នាតមធ្យមមួយដែលត្រូវបានបង្កើតឡើងដោយក្រុមហ៊ុនចិននៅក្នុងខេត្តកំពង់ធំ។
ក្រៅពីការចម្រាញ់ប្រេង CNSL ភាគីពាក់ព័ន្ធក៏បានពិភាក្សាពីសក្តានុពលនៃការកែច្នៃកាកសំណល់សំបកដែលនៅសល់ទៅជាធ្យូងជីវសាស្ត្រ (biochar) សម្រាប់ប្រើប្រាស់ក្នុងវិស័យកសិកម្ម ឬឧស្សាហកម្ម។
តាមគំរូកែច្នៃគ្រាប់ស្វាយចន្ទីឆៅ ១០០ គីឡូក្រាម អាចផលិតបានសាច់គ្រាប់ប្រមាណ ២៥ គីឡូក្រាម និងសំបក ៧៥ គីឡូក្រាម។ ពីសំបកទាំងនោះ អាចទទួលបានប្រេង CNSL ប្រមាណ ១៥ គីឡូក្រាម និងកាកសំណល់សំបកចំនួន ៦០ គីឡូក្រាម។
លោកបណ្ឌិត Okamura បានលើកឡើងថា ធ្យូងជីវសាស្ត្រពីសំបកស្វាយចន្ទីអាចមានផ្ទុកកាបូនរហូតដល់ ៩០ ភាគរយ បើប្រៀបធៀបនឹងធ្យូងអង្កាមដែលមានប្រហែល ៥០ ភាគរយ។ ធ្យូងជីវសាស្ត្រកសិកម្មអាចប្រើប្រាស់ដើម្បីកែលម្អសុខភាព និងជីជាតិដី ព្រមទាំងបង្កើនការស្រូបយកសារធាតុចិញ្ចឹមរបស់ដំណាំ។
ការកែច្នៃអនុផលទាំងនេះអាចបង្កើតខ្សែច្រវាក់តម្លៃបន្ថែមមួយទៀតសម្រាប់វិស័យស្វាយចន្ទី ដោយអនុញ្ញាតឱ្យអ្នកកែច្នៃបង្កើតប្រាក់ចំណូលពីសំបក និងកាកសំណល់ដែលកន្លងមកត្រូវបានចាត់ទុកជាសំណល់។
គម្រោងនេះក៏ត្រូវបានចាត់ទុកថាមានសក្តានុពលសម្រាប់សន្តិសុខថាមពលរបស់កម្ពុជា។ លោកបណ្ឌិត Okamura បានមានប្រសាសន៍ថា ប្រេង CNSL អាចនឹងត្រូវបានយកទៅលាយជាមួយប្រេងម៉ាស៊ូត ដោយល្បាយប្រេង CNSL ៨០ ភាគរយ និងប្រេងម៉ាស៊ូត ២០ ភាគរយ កំពុងត្រូវបានសិក្សាជាប្រេងឥន្ធនៈជំនួសដែលអាចធ្វើទៅបាន។
ប្រសិនបើបច្ចេកវិទ្យានេះបង្ហាញពីលទ្ធភាពជោគជ័យផ្នែកពាណិជ្ជកម្ម និងបច្ចេកទេស វាអាចជួយកាត់បន្ថយការពឹងផ្អែករបស់កម្ពុជាលើការនាំចូលផលិតផលប្រេងកាត។
ក្រុមហ៊ុន TPJ មានផែនការស្វែងរកការគាំទ្រ និងកិច្ចសហប្រតិបត្តិការបន្ថែមពីភាគីពាក់ព័ន្ធ រួមទាំងក្រសួងទទួលបន្ទុកវិស័យឧស្សាហកម្ម និងថាមពលរបស់កម្ពុជា ខណៈកំពុងជំរុញគម្រោងសាកល្បងនេះ។
សម្រាប់វិស័យស្វាយចន្ទីកម្ពុជា គំនិតផ្តួចផ្តើមនេះអាចជួយជំរុញការអភិវឌ្ឍឧស្សាហកម្មកែច្នៃដែលមានសមាហរណកម្មកាន់តែខ្ពស់ ដោយសាច់គ្រាប់ ប្រេង CNSL ធ្យូងជីវសាស្ត្រ និងអនុផលផ្សេងទៀត អាចចូលរួមចំណែកដល់ការបង្កើនតម្លៃសេដ្ឋកិច្ចពីគ្រាប់ស្វាយចន្ទីដែលត្រូវបានកែច្នៃនៅក្នុងស្រុក៕
Account
Security
Favourite Content