សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ គិតត្រឹមរយៈពេលពេញមួយឆ្នាំ២០២៤កន្លងទៅ អ្នកធ្វើដំណើរតាមជើងយន្តហោះនៅអាកាសយានដ្ឋានអន្តរជាតិសៀមរាប-អង្គរ មានប្រមាណជា ១,៤លាននាក់ ហើយរំពឹងថាឆ្នាំថ្មី២០២៥នេះ ចំនួនអ្នកដំណើរតាមជើងយន្តហោះនឹងកើនឡើងច្រើនជាងនេះ។
លោក ប៊ុន រដ្ឋា នាយកគ្រប់គ្រងអាកាសយានដ្ឋានអន្តរជាតិសៀមរាប-អង្គរ បានមានប្រសាសន៍ថា ចំនួនអ្នកធ្វើដំណើរតាមជើងយន្តហោះមានប្រមាណជា១,៤លាននាក់ ក្នុងឆ្នាំ២០២៤ ហើយរំពឹងថានឹងកើនឡើងដល់ ១,៨លាននាក់ក្នុងឆ្នាំ២០២៥ ស្របតាមកំណើនសេដ្ឋកិច្ច និងកំណើនទេសចរងើបឡើងវិញបណ្តើរៗ។
លោកបញ្ជាក់ថា ចំនួនអ្នកដំណើរតាមជើងយន្តហោះ ភាគច្រើនជាជនបរទេសមកពីប្រទេសអ៊ឺរ៉ុប និងអាស៊ីមួយចំនួន ចំណែកប្រជាជនកម្ពុជា នៅមិនទាន់មានទំនោរធ្វើដំណើរតាមជើងយន្តហោះច្រើននៅឡើយទេ ដោយសារក្រុងសៀមរាបជាតំបន់ទេសចរណ៍ ពួកគេត្រូវការជិះរថយន្តកម្សាន្តតាមប្រាង្គប្រាសាទ និងតំបន់ទេសចរណ៍នានា។
កញ្ញា SUN YUAN នាយករងគ្រប់គ្រងព្រលានយន្តហោះ SAI នៃក្រុមហ៊ុន YUNNAN AVIATION INDUSTRY INVESTMENT GROUP CO,LTD (YAG) នៃក្រុមហ៊ុនចិនឱ្យដឹងផងដែរថា ភ្ញៀវទេសចរដែលឆ្លងកាត់ព្រលានមានកើនឡើងចំនួន១២៥% ក្នុងឆ្នាំ២០២៤ ធៀបនឹងឆ្នាំ២០២៣។ សម្រាប់រដូវកាលដែលមានភ្ញៀវច្រើន ព្រលានយន្តហោះថ្មីនេះទទួលបានជើងហោះហើរប្រមាណជា ៥០ដងក្នុងមួយថ្ងៃ ចំណែកនៅរដូវកាលភ្ញៀវធ្លាក់ចុះមានភ្ញៀវជាមធ្យមប្រមាណជា ៤០ជើងក្នុងមួយថ្ងៃ។ នៅក្នុងមួយជើងយន្តហោះអាចផ្ទុកអ្នកដំណើរបានចំនួនប្រមាណជា៧៥នាក់ ហើយម៉ោងដែលមានភ្ញៀវឆ្លងកាត់ច្រើន ចាប់ពីម៉ោង៩.០០ដល់ម៉ោង១១.០០ព្រឹក និងពេលល្ងាចចាប់ពីម៉ោង ៦.០០ដល់ម៉ោង៧.០០នាទី។
គួរបញ្ជាក់ថា អាកាសយានដ្ឋានអន្តរជាតិសៀមរាប-អង្គរ មានទីតាំងនៅស្រុកសូទ្រនិគមខេត្តសៀមរាប ដែលបម្រើឱ្យក្រុងសៀមរាបប្រទេសកម្ពុជា។ ស្ថិតនៅចម្ងាយប្រមាណ ១៨គីឡូម៉ែត្រភាគឦសាននៃស្រុកដំដែក, ៤០គីឡូម៉ែត្រខាងកើតប្រាសាទអង្គរវត្ត និង៥០គីឡូម៉ែត្រខាងកើតក្រុងសៀមរាប។
គួររំលឹកថា ព្រលានយន្តហោះអន្តរជាតិសៀមរាបអង្គរ ត្រូវបានដាក់ឱ្យដំណើរការនៅខែតុលា ឆ្នាំ២០២៣ បន្ទាប់ពីចាប់ផ្តើមសាងសង់នៅពាក់កណ្ដាលខែមីនា ឆ្នាំ២០២០។ ព្រលាននេះស្ថិតនៅក្នុងគម្រោងកិច្ចព្រមព្រៀងវិនិយោគ BOT រយៈពេល៥៥ឆ្នាំ វិនិយោគដោយក្រុមហ៊ុនចិន ក្នុងទំហំទឹកប្រាក់ ១ ១០០លានដុល្លារអាមេរិក។ ព្រលាននេះមានប្រវែងផ្លូវរត់ ៣,៦០០ម៉ែត្រ ទទឹង៤៥ម៉ែត្រ មានចំណតយន្តហោះ៣៨ ដែលអាចទទួលអ្នកដំណើរប្រមាណ ៧លាននាក់នៅក្នុងមួយឆ្នាំ៕ វិន ឈុនហ៊ាត
Account
Security
Favourite Content