សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ អត្រាអតិផរណានៅសហរដ្ឋអាម៉េរិកបានកើនដល់ ៣,៧ ភាគរយក្នុងខែកក្កដា ដែលខ្ពស់ជាងគោលដៅ ២ ភាគរយរបស់ធនាគារកណ្តាលអាម៉េរិក (Fed) ជាប់គ្នា ៦៥ ខែ ខណៈទិន្នន័យចុងក្រោយបានបង្កើនការរំពឹងថា Fed អាចដំឡើងអត្រាការប្រាក់នៅកិច្ចប្រជុំខែកញ្ញា។
យោងតាមការរាយការណ៍របស់ Al Jazeera ការិយាល័យវិភាគសេដ្ឋកិច្ចនៃក្រសួងពាណិជ្ជកម្មអាម៉េរិកបានបង្ហាញកាលពីថ្ងៃពុធថា សន្ទស្សន៍នៃការចំណាយប្រើប្រាស់ផ្ទាល់ខ្លួន (PCE) ដែលជារង្វាស់មួយក្នុងចំណោមរង្វាស់សំខាន់ៗដែល Fed ប្រើដើម្បីតាមដានអតិផរណា បានកើនដល់ ៣,៧ ភាគរយក្នុងខែកក្កដា។
តួលេខនេះខ្ពស់ជាងការព្យាករណ៍ ៣,៦ ភាគរយរបស់ក្រុមអ្នកសេដ្ឋកិច្ចដែលស្ទង់មតិដោយ Reuters ហើយបានជំរុញឱ្យការរំពឹងទុកអំពីការដំឡើងអត្រាការប្រាក់របស់ Fed កើនឡើងដល់ ៤២ ភាគរយ ពី ៣៦ ភាគរយមុនពេលទិន្នន័យត្រូវបានចេញផ្សាយ។
អតិផរណារបស់អាម៉េរិកបានកើនឡើងចាប់តាំងពីមានសង្គ្រាមជាមួយអ៊ីរ៉ង់នៅចុងខែកុម្ភៈ ដោយកាលនោះអត្រាអតិផរណាមានត្រឹម ២,៩ ភាគរយ។ អត្រានេះបានកើនដល់ ៤,១ ភាគរយក្នុងខែឧសភា ដែលជាកម្រិតខ្ពស់បំផុតក្នុងរយៈពេល ៣ ឆ្នាំ ដោយសារការកើនឡើងតម្លៃថាមពល ជាពិសេសតម្លៃប្រេងសាំងដែលបានឡើងដល់ ៤,១០ ដុល្លារក្នុងមួយហ្គាឡុង។
ទន្ទឹមនឹងនេះ ការស្ទង់មតិអំពីទំនុកចិត្តរបស់អ្នកប្រើប្រាស់បានបង្ហាញថា ប្រជាពលរដ្ឋអាម៉េរិកភាគច្រើនមានការព្រួយបារម្ភចំពោះស្ថានភាពសេដ្ឋកិច្ច និងហិរញ្ញវត្ថុផ្ទាល់ខ្លួន ខណៈប្រាក់ចំណូលបានកើនឡើងត្រឹម ០,២ ភាគរយ ស្របពេលតម្លៃប្រេងសាំងកើនឡើង។
ភាពតានតឹងជាមួយអ៊ីរ៉ង់ និងជម្លោះពាណិជ្ជកម្មជាមួយកាណាដា ក៏បន្តបង្កើនសម្ពាធលើសេដ្ឋកិច្ចអាម៉េរិក។ រដ្ឋបាលលោក ដូណាល់ ត្រាំ បានដំឡើងពន្ធលើទំនិញកាណាដាដល់ ៥០ ភាគរយ លើទំហំទឹកប្រាក់ ២០ ពាន់លានដុល្លារ ខណៈកាណាដាបានដាក់ពន្ធសងវិញក្នុងទំហំប្រហាក់ប្រហែលគ្នា។
ការដំឡើងពន្ធគយអាចបង្កើនថ្លៃដើមរបស់អាជីវកម្ម ដែលនៅទីបំផុតអាចត្រូវបានបញ្ជូនបន្តទៅអ្នកប្រើប្រាស់តាមរយៈការកើនឡើងតម្លៃទំនិញ និងបង្កើនសម្ពាធលើអតិផរណាបន្ថែមទៀត៕
Account
Security
Favourite Content