យុវសហគ្រិនចំនួន ៣ ០០០នាក់ ពីសាកលវិទ្យាល័យជាង៥០ ទូទាំងប្រទេសបង្ហាញសមត្ថភាព យ៉ាងលេចធ្លោ ក្នុងព្រឹត្តិការណ៍បញ្ចប់កម្មវិធីប្រកួត សហគ្រិនមហាវិទ្យាល័យថា្នក់ជាតិ រដូវកាលទី៣ ដែលរៀបចំដោយសហគ្រិនខ្មែរ

ភ្នំពេញ ៖ កម្មវិធីប្រកួតសហគ្រិនមហាវិទ្យាល័យថ្នាក់ជាតិ រដូវកាលទី ៣ ពោរពេញដោយថាមពលខ្លាំងជាងមុន ដែលមានក្រុមនិស្សិតសហគ្រិន ជាង ៥០ក្រុម មកពីទូទាំងប្រទេស ដោយបានប្រកួតប្រជែងគ្នាយ៉ាងស្វិតស្វាញអស់រយៈពេល៣ថ្ងៃ តាមរយៈការបង្ហាញគំរូអាជីវកម្ម ទទួលការណែនាំ និងចែករំលែកគំនិតគ្នាទៅវិញទៅមក។ កម្មវិធីដឹកនាំដោយសហគ្រិនខ្មែរនេះ បានប្រមូលផ្តុំយុវនវានុវត្តជនដែលមានសមត្ថភាព និងមានឆន្ទៈខ្ពស់ក្នុងការប្រែក្លាយគំនិតអាជីវកម្មទៅជាធុរកិច្ចថ្មីជាក់ស្តែង។

ដោយមានពាក្យស្លោក “ពីគំនិតទៅកាន់ទីផ្សារ”  កម្មវិធីប្រកួតប្រជែងនេះជាវគ្គចុងក្រោយនៃកម្មវិធីសហគ្រិនមហាវិទ្យាល័យ ដែលគ្រប់គ្នាទន្ទឹងរង់ចាំបំផុត ពោលគឺជាការផ្តួចផ្តើមថ្នាក់ជាតិដែលមាននិស្សិតចូលរួមជាង ៣ ០០០នាក់ មកពី​គ្រឹះស្ថានឧត្តមសិក្សាចំនួនជាង ៥០។ កម្មវិធីថ្នាក់ជាតិនេះ បានផ្តល់រង្វាន់ដោយផ្ទាល់ទៅកាន់ក្រុមនិស្សិតសហគ្រិន ដើម្បីធ្វើផលិតផលគម្រូ។ សម្រាប់យុវជនដែលបានចូលរួមកម្មវិធីនេះមិនមែនគ្រាន់តែជាការប្រកួតប្រជែងឡើយ ប៉ុន្តែវាជាវេទិកាដែលផ្តល់ឱកាសឱ្យពួកគេបង្ហាញខ្លួនឲ្យសាធរណៈជនដឹងឃើញ និងត្រូវទទួលបានការយកចិត្តទុកដាក់ជាអ្នកដឹកនាំនាពេលអនាគត ក្នុងទិដ្ឋភាពនៃប្រព័ន្ធអេកូឡូស៊ីសហគ្រិនភាព ដែលកំពុងរីកចម្រើនផងដែរ។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិសហគ្រិនខ្មែរ បានមានប្រសាសន៍ថា «យុវជនមានសមត្ថភាពជាច្រើនបានចូលរួមក្នុងកម្មវិធី ដែលបង្កើតជាឱកាសក្នុងការផ្ដល់វិញ្ញាសាយុទ្ធសាស្ត្រជាតិ ដើម្បីយុវជនទាំងនោះមានលទ្ធភាពចូលរួមផ្ដល់ជាដំណោះស្រាយ។ ក្នុងកម្មវិធីនេះ យុវជនជាច្រើនបានទទួលបទពិសោធន៍ បញ្ចេញសមត្ថភាព និងសក្តានុពលផ្ទាល់ខ្លួនក្នុងដំណើរសហគ្រិនភាព។»

៣ ថ្ងៃនៃភាពច្នៃប្រឌិត សេចក្តីក្លាហាន និងការបង្កើតទំនាក់ទំនង

តាមរយៈកម្មវិធីនេះ ក្រុមនិស្សិតសហគ្រិនបានបង្ហាញគំរូអាជីវកម្មដំណាក់កាលដំបូង ដោយដោះស្រាយបញ្ហាប្រឈមជាច្រើនក្នុងវិស័យមួយចំនួន រួមមាន កសិកម្ម បច្ចេកវិទ្យាព័ត៌មានវិទ្យា ការកែច្នៃអាហារ/កសិកម្ម និងចីរភាព។ ក្រុមនីមួយៗ មានពេលត្រឹមតែ ៥ នាទីប៉ុណ្ណោះក្នុងការបង្ហាញគំរូអាជីវកម្ម បន្ទាប់មកធ្វើការឆ្លើយសំណួរលំបាកៗរបស់គណៈកម្ម​ការដែលជាស្ថាបនិកធុរកិច្ចថ្មី។

ឆ្លងកាត់រយៈពេល ២ថ្ងៃ ក្នុងការបង្ហាញគំរូអាជីវកម្មដ៏ស្វិតស្វាញ និស្សិតសហគ្រិនចំនួន ១០ក្រុម ដែលមានភាពលេចធ្លោជាងគេ បានឡើងដល់វគ្គផ្តាច់ព្រ័ត្រនៅថ្ងៃទី៣ ដែលពួកគេបានបន្តកែលម្អការ ធ្វើបទបង្ហាញ ដោយមានជំនួយពីគ្រូណែនាំ និងបានប្រកួតគំរូអាជីវកម្មផ្តាច់ព្រ័ត្រតែម្តង។

លើសពីការប្រកួតប្រជែង កម្មវិធីប្រកួតប្រជែងថ្នាក់ជាតិនេះ ក៏បានផ្តល់ផងដែរនូវសិក្ខាសាលា ការណែនាំ និងការតាំងពិព័រណ៍បង្ហាញផលិតផលគម្រូរបស់ក្រុមសហគ្រិន និស្សិតទាំងជាង ៥០ សាកលវិទ្យាល័យ អ្នកទស្សនារាប់រយនាក់។ ក្រុមឈ្នះ ៨ ក្រុមចុងក្រោយ ដែលមានពិន្ទុខ្ពស់ជាងគេ ត្រូវបានអញ្ជើញចូលរួមការប្រកាសជ័យលាភីចំណាត់ថ្នាក់ក្នុងកម្មវិធីពានរង្វាន់សហគ្រិនខ្មែរ (KE Award Night) ដែលជាវេទិកាអបអរសាទរសហគ្រិនភាពថ្នាក់ជាតិ រួមបញ្ចូលពីកម្រិត វិទ្យាល័យ សាកលវិទ្យាល័យ ធុរកិច្ចថ្មី និងសហគ្រាសធុនតូច និងមធ្យម ដែលប្រារព្វឡើងជារៀងរាល់ឆ្នាំ។

ការជំរុញគាំទ្រពីរាជរដ្ឋាភិបាល ក្នុងការអភិវឌ្ឍមូលធនមនុស្ស

បេសកកម្មរបស់សហគ្រិនខ្មែរ គឺផ្តោតលើសពីការផ្តល់រង្វាន់។ ការផ្តួចផ្តើមកម្មវិធីសហគ្រិនមហាវិទ្យាល័យ គឺជាយុទ្ធសាស្រ្តដ៏ទូលំទូលាយ ដោយមានការគាំទ្រពីរាជរដ្ឋាភិបាល ក្នុងការកសាងសេដ្ឋកិច្ចឱ្យមានភាពរឹងមាំ និងប្រកបដោយបរិយាប័ន្ន ដែលស្របតាមយុទ្ធសាស្ត្របញ្ចកោណ។

ជាមួយនឹងអ្នកចូលរួមជាង ៣០០ នាក់ កម្មវិធីប្រកួតប្រជែង​សហគ្រិនមហាវិទ្យាល័យថ្នាក់ជាតិ បានក្លាយជាវេទិកាដ៏មានឥទ្ធិពលសម្រាប់និស្សិតក្នុងការសាកល្បងគំនិត រៀនពីអ្នកជំនាញ និងបង្កើតទំនាក់ទំនងជាមួយប្រព័ន្ធអេកូស៊ី នវានុវត្តន៍យ៉ាងទូលំទូលាយ។ នៅរដូវកាលនេះ សហគ្រិនខ្មែរ បានបន្តកិច្ចខិតខំក្នុងការបំប្លែងសក្កានុពលរបស់និស្សិតសហគ្រិនពី “គំនិតទៅកាន់ទីផ្សារ”។ ជាមួយនឹងការគាំទ្រជាបន្តបន្ទាប់ពីសំណាក់រាជរដ្ឋាភិបាល កម្មវិធីនេះកំពុងជួយឲ្យយុវជនកម្ពុជា មិនត្រឹមតែរៀបចំសម្រាប់អនាគតប៉ុណ្ណោះទេ តែពួកគេបង្កើតអនាគត។

ទំនាក់ទំនងព័ត៌មានគម្រោងសហគ្រិនមហាវិទ្យាល័យ

សហគ្រិនខ្មែរ

លោក ពក បញ្ញាពេជ្រ មន្ត្រីឯកទេសជាន់ខ្ពស់អភិវឌ្ឍកម្មវិធីសហគ្រិនភាព 📧 contact@khmerenterprise.info