សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីកើតមានវិបត្តិជំងឺកូវីដ-១៩ និងបញ្ហាសេដ្ឋកិច្ចសកលមិនប្រាកដប្រជា បានធ្វើឱ្យវិស័យអចលនទ្រព្យនៅកម្ពុជាមានការធ្លាក់ចុះ ទាំងការវិនិយោគ ការអភិវឌ្ឍ និងតម្រូវការទីផ្សារ ខណៈដែលរាជរដ្ឋាភិបាលបានព្យាយាមជួយស្រោចស្រងតាមរយៈដាក់ចេញនូវវិធានការជាបន្តបន្ទាប់ ដើម្បីជំរុញឱ្យវិស័យនេះនៅតែអាចមានសកម្មភាព និងចរន្តទិញ-លក់ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានលើកឡើងថា ក្នុងស្ថានភាពដែលវិស័យអចលនទ្រព្យជួបនឹងបញ្ហាប្រឈម ក៏ដូចជាការធ្លាក់ចុះនៃតម្រូវការក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលបានព្យាយាមជួយសម្រួលបានច្រើនតាមរយៈការដាក់ចេញនូវយុទ្ធសាស្ត្រផ្សេងៗដូចជា ការលើកលែង និងអនុគ្រោះពន្ធប្រថាប់ត្រាលើការទិញ-លក់អចលនទ្រព្យក្រោមតម្លៃ៧ម៉ឺនដុល្លារ ការជួយសម្រួលលើករណីវិវាទរវាងអ្នកទិញជាមួយក្រុមហ៊ុនអភិវឌ្ឍន៍, លើកលែងការផាកពិន័យសម្រាប់អ្នកបង់ពន្ធយឺតយ៉ាវ ជាពិសេស ដាក់ឱ្យអនុវត្តគោលការណ៍ពិសេសដើម្បីជំរុញ និងលើកទឹកចិត្តដល់អ្នកវិនិយោគលើគម្រោងដែលជាប់គាំងនៅខេត្តព្រះសីហនុជាដើម។
លោកបញ្ជាក់ថា ៖
«តាមរយៈការដាក់ចេញវិធានការជាបន្តបន្ទាប់នេះ មិនត្រឹមតែជំរុញឱ្យមានការដោះដូរ ទិញ-លក់ និងសម្រួលបន្ទុកពលរដ្ឋជាម្ចាស់កម្មសិទ្ធិប៉ុណ្ណោះទេ តែថែមទាំងអាចទាក់ទាញបានវិនិយោគិនក្នុង និងក្រៅប្រទេសចូលមកវិនិយោគលើវិស័យអចលនទ្រព្យនៅកម្ពុជាផងដែរ ជាពិសេសនៅតំបន់ដែលមានការលើកទឹកចិត្តពិសេស» ។
បើតាមឯកឧត្តម អ៊ឹម សុខធី ប្រធានលេខាធិការដ្ឋាននៃក្រុមការងារជំរុញការវិនិយោគខេត្តព្រះសីហនុបានឱ្យដឹងថា តាមរយៈកម្មវិធីជំរុញការវិនិយោគខេត្តព្រះសីហនុរបស់រាជរដ្ឋាភិបាល បានទាក់ទាញអ្នកវិនិយោគក្នុងវិស័យអចលនទ្រព្យជាបន្តបន្ទាប់ ដោយក្នុងនោះក៏មានគម្រោងវិនិយោគថ្មី និងការចូលវិនិយោគបន្តលើគម្រោងដែលជាប់គាំងកន្លងមកឱ្យមានដំណើរការឡើងវិញ។ ជាក់ស្ដែង ក្នុងរយៈពេលជាង២ឆ្នាំកន្លងមកនេះ តាមរយៈវិធានការរបស់រាជរដ្ឋាភិបាល មានគម្រោងជិត ៥០០ គម្រោង ត្រូវបានលើកទឹកចិត្តពិសេស រាប់ទាំងវិស័យអចលនទ្រព្យ និងការវិនិយោគលើវិស័យទេសចរណ៍ ដែលមានចំនួនច្រើនជាងគេ ។
ឯកឧត្តមបានបន្តថា ៖
«វិធានការរបស់រាជរដ្ឋាភិបាលសម្រាប់លើកទឹកចិត្តពិសេសនេះ មិនត្រឹមតែទាក់ទាញបានគម្រោងវិនិយោគថ្មី និងធ្វើឱ្យគម្រោងដែលជាប់គាំងមានដំណើរការឡើងវិញប៉ុណ្ណោះទេ តែថែមទាំងបានបង្កើតឱកាសការងារដល់ប្រជាពលរដ្ឋបានច្រើនកន្លែងផងដែរ។ តួយ៉ាងគម្រោងដែលរដ្ឋាភិបាលបានសម្រេចលើកទឹកចិត្តពិសេសទាំង ៥០០គម្រោងនោះ ត្រូវបានប៉ាន់ស្មានថា អាចបង្កើតការងារបានរហូតដល់ជាង ១១ ០០០នាក់ ដែលផ្ដល់ចំណូលដល់ពលរដ្ឋសម្រាប់ផ្គត់ផ្គង់ជីវភាពបានប្រសើរផងដែរ»។
គួរបញ្ជាក់ថា បន្ទាប់ពីអនុវត្តបានជោគជ័យលើកម្មវិធីជំរុញការវិនិយោគខេត្តព្រះសីហនុ រាជរដ្ឋាភិបាលក៏បានសម្រេចដាក់ចេញនូវកម្មវិធីជំរុញការវិនិយោគនៅភូមិភាគឦសានបន្តទៀត ដោយផ្ដោតលើខេត្តចំនួន៤ រួមមានខេត្តក្រចេះ ស្ទឹងត្រែង ខេត្តមណ្ឌលគិរី និងខេត្តរតនគិរី ។ តាមរយៈកម្មវិធីលើកទឹកចិត្តពិសេសរបស់រាជរដ្ឋាភិបាលទាំង២តំបន់នេះ បច្ចុប្បន្ន បាន និងកំពុងបន្តភាពទាក់ទាញគម្រោងវិនិយោគថ្មីៗជាច្រើនទៅកាន់តំបន់ទាំងនោះ ទាំងវិស័យកសិកម្ម, កសិ-ឧស្សាហកម្មក, វិស័យទេសចរណ៍ ក៏ដូចជាតំបន់សេដ្ឋកិច្ចពិសេស ដែលជំរុញឱ្យមានតម្រូវការប្រើប្រាស់ដី និងជាផ្នែកមួយជួយលើកកម្ពស់វិស័យអចលនទ្រព្យផងដែរ៕
Account
Security
Favourite Content