ភ្នំពេញ ៖ ផ្សារទំនើប Noro Lane ដែលមានទីតាំងនៅសង្កាត់បឹងកេងកង ចំកណ្តាលបេះដូងទីក្រុងភ្នំពេញបានបើកដំណើរការជាផ្លូវការហើយកាលពីល្ងាចថ្ងៃទី២៦ ខែមេសា ឆ្នាំ២០២៥ ។ Noro Lane ជាកន្លែងដ៏សម្បូរបែបសម្រាប់ការទិញទំនិញ ការកម្សាន្ត និងរបៀបរស់នៅសម័យថ្មីរបស់យុវវ័យ ។ ពិធីសម្ពោធដ៏ធំនេះបានទាក់ទាញភ្ញៀវជាច្រើនរយនាក់មកទស្សនា និងចូលរួមអបអរសាទរ។

ការប្រកាសដាក់ឱ្យដំណើរការផ្សារទំនើបណូរ៉ូ លែន ក៏មានការប្រគំតន្រ្តីដោយក្រុមតន្រ្តីពេញនិយម និង DJ កម្មវិធី “Spend & Win” ព្រមទាំងមានរង្វាន់ច្រើនសន្ធឹកសន្ធាប់ មានកន្លែងតុបតែងសម្រាប់ថតរូប ការផ្តល់ជូនពិសេសពីហាងជាច្រើនក្នុងផ្សារ Noro Lane ព្រមទាំងកម្មវិធីសម្រាប់ក្មេងៗ រួមមានការទស្សនាកុនបែប គំនូរជីវចល ជាដើម ។

ស្ថិតនៅក្នុងចំកណ្តាលបេះដូងនៃទីក្រុងភ្នំពេញ Noro Lane ជាកន្លែងប្រមូលផ្ដុំទាំងម៉ូតសម្លៀកបំពាក់ អាហារ សិល្បៈ និងការកម្សាន្ត ដែលផ្ដល់បទពិសោធន៍បែប ទំនើប និងសប្បាយសម្រាប់អ្នកដែលរស់នៅក្នុងទីក្រុង។

ពិធីបើកដំណើរការម៉លលក់ទំនិញដ៏ធំមានដ៏សក្តានុពលនេះ បានប្រព្រឹត្តទៅយ៉ាងឱឡារិក ដោយមានការអញ្ជើញចូលរួមយ៉ាងខ្ពង់ខ្ពស់ពីវត្តមាន លោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង លោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង អ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយកក្រុមហ៊ុន ជីប ម៉ុង លោកជំទាវ លី សុខឆេង នាយិកាក្រុមហ៊ុន ជីប ម៉ុង រីថែល និងសមាជិកក្រុមប្រឹក្សាភិបាលក្រុមហ៊ុន ជីប ម៉ុង និងភ្ញៀវកិត្តិយស​ជាច្រើនរូបទៀតផងដែរ ។

លោកជំទាវ លី សុខឆេង អគ្គនាយិកាក្រុមហ៊ុន ជីប ម៉ុង រីថៃល និងជាសមាជិកក្រុមប្រឹក្សាភិបាលក្រុមហ៊ុន ជីប ម៉ុង គ្រុប បានថ្លែងលើកឡើងពីគន្លឹះសំខាន់ៗដែលជំរុញឲ្យមានការប្រកាសបើកដំណើរការ ផ្សារ ណូរ៉ូ លេន ជាថ្មីនិង លក្ខណៈពិសេសរបស់ផ្សារទំនើបនេះ។

លោកជំទាវ លី សុខឆេង បានមានប្រសាសន៍ថា៖«យើងបានធ្វើការវិនិយោគមិនដកដៃ ដោយបច្ចុប្បន្នយើងកំពុងដំណើរការផ្សារទំនើបចំនួន ៥ ទីតាំង ស៊ុបភើម៉ាឃីតចំនួន ១៣ទីតាំង និងអភិវឌ្ឍន៍ផ្សារបន្តបន្ទាប់ទៀត។ ទោះបីជាស្ថានភាពណាក៏ដោយ យើងនៅតែបន្តវិនិយោគក្នុងការកែលម្អហេដ្ឋារចនាសម្ព័ន្ធ លើកកម្ពស់បទពិសោធន៍ អតិថិជន និងគាំទ្រដល់ការច្នៃប្រឌិតរបស់ ដៃគូពាណិជ្ជកម្ម។ យើងចាត់ទុកការចំណាយទាំងនេះ ជាការវិនិយោគរយៈពេលវែង ដើម្បីភាពជោគជ័យរបស់យើងនិងជោគជ័យរបស់ដៃគូរបស់យើង»។

លោកជំទាវ បានមានប្រសាសន៍ថា៖«ការសម្រេចកែលម្អផ្សារទំនើប ណូរ៉ូលែន នេះ គឺដើម្បីឲ្យអតិថិជនទទួលបានបរិយាកាស ងាយស្រួល សម្បូរបែប ស្របតាមការនិយមរបស់មនុស្សជំនាន់ថ្មីនិងបង្កើតឱកាសពិសេស និងខុសប្លែកពីគេដោយយើងផ្ចិតផ្ចង់ខ្លាំងលើភាពច្នៃប្រឌិត យើងបង្កើត Concept ថ្មីៗ ដូចជា៖ណូរ៉ូ លន (Noro Lawn)ណូរ៉ូ ស្គូល (Noro School) ណូរ៉ូ ខេម (Noro Camp) ដែលមានកន្លែងអង្គុយលំហែកាយបែបបោះតង់នៅខាងក្នុងផ្សារទំនើប ផ្ទាល់ ដែលអាចឲ្យយុវវ័យ អ្នកធ្វើការមកបំពេញការងារយ៉ាងងាយស្រួល ក៏ដូចជាជួបជុំគ្នា ពេលល្ងាចចុងសប្តាហ៍ផងដែរ»។

លោកជំទាវបានបន្ថែមថា៖ការកែលម្អថ្មី លើផ្សារទំនើប ណូរ៉ូលែន គឺផ្តោតលើគំនិតផ្តួចផ្តើមសហការគ្នារវាងដៃគូ ពាណិជ្ជកម្ម (Tenant) និងអ្នកអភិវឌ្ឍផ្សារ (Mall Developer) ក្នុងការបង្កើត Conceptថ្មីៗ ដែលជា រឿងដំបូងគេនៅស្រុកខ្មែរ។ ជាក់ស្តែង ការសហការរវាងក្រុមហ៊ុន ជីបម៉ុង រីថែល និង Kungfu Kitchen ក្នុងការបង្កើតផ្សារទម្រង់ថ្មីមួយដែលអនុញ្ញាតឲ្យយើងអាចបង្កើត design ថ្មីមួយពិសេស និងទាក់ទាញអតិថិជនដោយបំបែកទំលាប់ចាស់ (norm) និងបង្កើត concept ថ្មីៗជំនួសឱ្យការគ្រាន់ តែចម្លងពីកន្លែងមួយទៅកន្លែងមួយទៀត។ ការសហការនេះបង្កើតឱកាសទីផ្សារថ្មីៗជា យុទ្ធសាស្រ្តឈ្នះ-ឈ្នះ គឺឈ្នះទាំង ដៃគូពាណិជ្ជកម្ម, ទាំង អ្នកអភិវឌ្ឍផ្សារ និងសហគមន៍ទាំងមូល។

អ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយកក្រុមហ៊ុន ជីប ម៉ុង បានថ្លែងថា៖«ក្នុងនាមសហស្ថាបនិកក្រុមហ៊ុន ជីប ម៉ុង ខ្ញុំពិតជាមានមោទកភាព ដែលក្រុមហ៊ុនធំបង្អស់ក្នុង ស្រុកមួយនេះ នៅតែបន្តបោះជំហានទៅមុខ ក្នុងការនាំយកទំនើបកម្មថ្មី ដើរទាន់របត់ផ្លាស់ប្តូរ សម័យទំនើបលើសកលលោក ស្របតាមការវិវត្តនៃស្ដង់ដាររស់នៅរបស់ប្រជាជនខ្មែរនាពេលបច្ចុប្បន្ន»។

អ្នកឧកញ៉ា បានអបអរសាទរដល់សមិទ្ធផលដ៏លេចធ្លោក្នុងការសម្ពោធជាផ្លូវការ ផ្សារទំនើប ណូរ៉ូ លេន។ នេះ ជាគម្រោងច្នៃប្រឌិតប្លែក មានសោភ័ណភាពបែបយុវវ័យ និងផ្តោតសំខាន់លើ ស្តង់ ដារបែបទាន់សម័យដ៏សម្បូរបែប លើសពីបណ្តុំហាងទំនិញនិងភោជនីយដ្ឋាន ជាពិសេស ផ្តល់ បរិយាកាសបោះតង់ក្នុងទីធ្លាធំទូលាយនៅផ្នែកខាងក្នុងរបស់ផ្សារទំនើប។

អ្នកឧកញ៉ាបានបញ្ជាក់ថា៖ អាទិភាពចម្បងមួយរបស់ ជីប ម៉ុង រីថែល គឺធ្វើយ៉ាងណាដើរឱ្យទាន់សម័យកាល និងសម្រប ទៅតាមរសនិយមនៃមនុស្សសម័យថ្មី ដើម្បីបម្រើតម្រូវការរបស់អតិថិជនគ្រប់វ័យ។ ការបង្កើត បរិយាកាសថ្មីប្លែកដូចជា ណូរ៉ូ ខេម នឹងជួយសម្រួលដល់ការបំពេញកិច្ចការផ្សេងៗរបស់យុវវ័យ មិនថាជាអ្នកធ្វើការ ឬបងប្អូនអាជីវករ ព្រមទាំងបង្កបរិយាកាសមួយ ដែលអាចជំរុញគំនិតច្នៃប្រឌិត ការគិតស៊ីជម្រៅលើចំណង់ចំណូលចិត្តរៀងខ្លួន។

ក្នុងដំណើរជោគជ័យជាង ៤០ ឆ្នាំលើពហុវិស័យនៅកម្ពុជា ជីប ម៉ុង បានបន្តពង្រឹងធនធាន ជំនាន់ក្រោយ តាមរយៈការបន្តផ្តល់ឱកាសការងារ បណ្តុះបណ្តាលចំណេះជំនាញ រួមទាំងការបង្រៀនហ្វឹកហាត់ផ្សេងៗ ដើម្បីពង្រឹងសមត្ថភាពច្នៃប្រឌិតគំនិតថ្មីប្លែករបស់បុគ្គលម្នាក់ៗ និងរួម ចំណែកក្នុងការជំរុញភាពជឿនលឿននៅក្នុងសង្គមកម្ពុជា។

ជាមួយចក្ខុវិស័យវែងឆ្ងាយ ជីប ម៉ុង បន្តពង្រីកពាណិជ្ជកម្មចម្រុះ តួយ៉ាងដូចជាទីតាំងតំបន់ផ្សារ ទំនើបនេះ ដែលស្ថិតនៅចំកណ្តាលបេះដូងនៃរាជធានីភ្នំពេញ ជាចំណុចប្រសព្វនៃការរីកចម្រើន វិស័យទេស​ចរណ៍ជាតិ និង អន្តរជាតិ រួមទាំងជ្រោមជ្រែងវិស័យពាណិជ្ជកម្មផ្សេងៗទៀត។ ជាមួយ ស្មារតីជាតិនិយម សង្កត់ធ្ងន់លើមហិច្ឆតាក្នុងការពង្រឹងម៉ាកយីហោក្នុងស្រុកយើងតែងប្រឹងប្រែងអភិវឌ្ឍខ្លួនលើបទពិសោ​ធន៍​ថ្មីៗ ពង្រឹងស្តង់ដាគុណភាពខ្ពស់លើគ្រប់វិស័យ ដើម្បីលើកស្ទួយ សេដ្ឋកិច្ចជាតិ និងបន្តជំរុញចរន្តពាណិជ្ជកម្មក្នុងស្រុកឲ្យកាន់តែសម្បូរបែប និងទំនើបទ្វេដង៕