សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ពិព័រណ៍រុក្ខជាតិ និងសួនច្បារភ្នំពេញ ឆ្នាំ២០២៥ លើកទី៥ ដែលធ្វើឡើងនៅអគារ Connexion នៃមជ្ឈមណ្ឌលសន្និបាត និងពិព័រណ៍កោះពេជ្រ រយៈពេល៣ថ្ងៃ (ថ្ងៃទី១២-១៤ ខែកញ្ញា ឆ្នាំ២០២៥) ត្រូវបានបញ្ចប់ដោយជោគជ័យ និងទទួលបានការគាំទ្រជាច្រើនពីសាធារណជនទូទៅ ជាពិសេសអ្នកដែលចូលចិត្តស្រឡាញ់រុក្ខជាតិបៃតង។
លោក ហែម ច័ន្ទសុភ័ក្រ្ត សហស្ថាបនិកពិព័រណ៍រុក្ខជាតិ និងសួនច្បារភ្នំពេញ បានឲ្យដឹងថា ការរៀបចំពិព័រណ៍រុក្ខជាតិ និងសួនច្បារភ្នំពេញនេះធ្វើឡើងមានគោលបំណងចង់បង្កើតជាវេទិកាសាធារណៈមួយដើម្បីផ្សព្វផ្សាយចំណេះដឹងពីរុក្ខជាតិសួនច្បារលំហបៃតង ចង់បង្កើតឱកាសសម្រាប់អ្នកស្រឡាញ់វិស័យបៃតងជួបគ្នា និងចែករំលែកចំណេះដឹងទៅវិញទៅមក និងចង់បង្កើតសកម្មភាពផ្សេងៗដើម្បីបំផុសការយល់ដឹងឲ្យកាន់តែទូលំទូលាយពីរុក្ខជាតិបៃតង។
លោក ច័ន្ទសុភ័ក្រ្ត បានបញញជាក់ទៀតថា ៖
« នៅពេលបច្ចុប្បន្ននេះខ្ញុំសង្កេតឃើញថា ប្រជាជនចាប់ផ្តើមមានការគាំទ្រ និងចាប់អារម្មណ៍ទៅលើការបន្ថែមរុក្ខជាតិក្នុងលំនៅឋានរបស់ខ្លួនកាន់តែច្រើន។ អ្នកចូលរួមមិនត្រឹមតែមកដើម្បីទស្សនាការពិព័រណ៍ប៉ុណ្ណោះទេ តែថែមទាំងមកទិញ និងស្វែងយល់ពីការថែទាំរុក្ខជាតិទាំងនោះថែមទៀត»។
គួរជម្រាបថា៖ ពិព័រណ៍រុក្ខជាតិ និងសួនច្បារភ្នំពេញ ឆ្នាំ២០២៥ លើកទី៥ ដែលមានរយៈពេល ៣ ថ្ងៃ បានតាំងបង្ហាញនូវរុក្ខជាតិតាំងលម្អ និងពូជរុក្ខជាតិកម្រជាច្រើនប្រភេទ រួមជាមួយនឹងការតាំងបង្ហាញស្នាដៃសិល្បៈរុក្ខសាស្ត្រ (Botanical Art Exhibition) ហើយអ្នកទស្សនាបានរីករាយជាមួយសកម្មភាពផ្សេងៗ រួមទាំងថ្នាក់សិល្បៈផ្កាកៀបសម្ងួត (Pressed Flowers Workshop) ថ្នាក់រចនាទេសភាព (Landscape Design Workshop) ការប្រកួតសម្រស់ត្រីក្រឹម (Betta Competition) និងកម្មវិធីផ្សេងៗទៀត។
លោកស្រី គាត ផាវី ដែលបានចូលរួមកម្មវិធីពិព័រណ៍កាលពីថ្ងៃទី១៤ ខែកញ្ញា ជាមួយកូនៗ បានឱ្យដឹងថា ពិព័រណ៍រុក្ខជាតិ និងសួនច្បារនេះ លើសពីការតាំងពិព័រណ៌រុក្ខជាតិ វាជាវេទិកាសម្រាប់អ្នកស្រឡាញ់រុក្ខជាតិ ទទួលបានចំណេះដឹងអំពីវិធីដាំ និងថែទាំរុក្ខជាតិឱ្យបានល្អ ក៏ដូចជាបណ្តុះគំនិតស្រឡាញ់ធម្មជាតិបៃតងផងដែរ។
ដោយឡែក កញ្ញា សិរី មតី ដែលបានទិញប្រទាលយកទៅតាំងក្នុងបន្ទប់ធ្វើការបានឱ្យដឹងថា៖ ពិព័រណ៍នេះពិតជាឱកាសដ៏ល្អ បានស្គាល់កូនរុក្ខជាតិបៃតង និងប្រទាលជាច្រើនដែលអាចយកទៅតាំងលម្អ ជាពិសេសមានស្តង់លក់វត្ថុអនុស្សាវរីយ៍ និងពិព័រណ៍សិល្បៈរុក្ខសាស្ត្រច្រើន។
សូមជម្រាបដែរថា ពិព័រណ៍រុក្ខជាតិ និងសួនច្បារភ្នំពេញ លើកទី៥ នេះ រៀបចំឡើងដោយ Phnom Penh Houseplant Festival និងសហគមន៍ផ្ទះចាស់ Pteah Chas ។ កម្មវិធីនេះនឹងមានការចូលរួមពីអ្នកលក់រុក្ខជាតិលម្អទាំងក្នុងស្រុក និងក្រៅស្រុក ជាមួយនឹងរុក្ខជាតិជាច្រើនប្រភេទរួមមាន៖ រុក្ខជាតិដំបងយក្ស ប្រទាល រុក្ខជាតិលម្អស្លឹក កេសកូល និងរុក្ខជាតិកម្រជាដើម។ ក្រៅពីនេះក៏មានការចូលរួមពីក្រុមហ៊ុនរៀបចំសួនច្បារ និងទេសភាព ក្រុមហ៊ុនផលិតផលកសិកម្ម និងពិព័រណ៍សិល្បៈអំពីរុក្ខជាតិ សិក្ខាសាលា កិច្ចពិភាក្សា និងការសម្ដែងទស្សនីយភាពសិល្បៈពីសិល្បករជាច្រើននាក់ទៀត៕
Account
Security
Favourite Content