សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទិន្នន័យដែលកត់ត្រាដោយក្រុមប្រឹក្សាអភិវឌ្ឍន៍កម្ពុជា ប្រភពទុនវិនិយោគពីប្រទេសសិង្ហបុរីស្ថិតនៅក្នុងចំណោមប្រភពទុនវិនិយោគផ្ទាល់ពីបរទេសឈានមុខទាំង១០ ដោយក្នុងរយៈពេល៥ឆ្នាំកន្លងទៅនេះ វិនិយោគិនសិង្ហបុរីបានបណ្ដាក់ទុនវិនិយោគនៅកម្ពុជាសរុបប្រមាណ៤០០លានដុល្លារអាមេរិក។
យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ក្រោយពិធីបើកកម្មវិធីពិព័រណ៍ធុរកិច្ចសិង្ហបុរីឆ្នាំ២០២៤ នៅថ្ងៃទី១៦ ខែសីហា ឆ្នាំ២០២៤បានឱ្យដឹងថា ការវិនិយោគរបស់សិង្ហបុរីបានដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចកម្ពុជា ពិសេសក្នុងវិស័យកម្មន្តសាល អចលនទ្រព្យ និងបដិសណ្ឋារកិច្ច ។
ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា វត្តមាននៃក្រុមហ៊ុនធំៗ ដូចជា Keppel Infrastructure និង Changi Airport International ក៏ដូចជាម៉ាកល្បីៗដូចជា Charles & Keith , Ya Kun និង 800Super បានបង្ហាញថា ការវិនយោគរបស់សិង្ហបុរីពិតជាបានជំរុញការអភិវឌ្ឍរបស់កម្ពុជា ។
ឯកឧត្តម ជា វុទ្ធី ក៏បានចែករំលែកនូវចំណុចគន្លឹះមួយចំនួនដែលបានទាក់ទាញវិនិយោគសិង្ហបុរីមកបោះទីតាំងនៅកម្ពុជា ដូចជាកត្តាមូលដ្ឋានសេដ្ឋកិច្ចដ៏រឹងមាំរបស់កម្ពុជា កម្លាំងពលកម្មវ័យក្មេង និងមានជំនាញ ទីតាំងយុទ្ធសាស្ត្រដែលស្ថិតនៅចំកណ្ដាលនៃមហាអនុតំបន់មេគង្គនិងតំបន់អាស៊ីអាគ្នេយ៍ កិច្ចព្រមព្រៀងពាណិជ្ជកម្មទ្វេភាគីជាមួយទីផ្សារធំៗ ។ វិនិយោគិនទទួលបានផលប្រយោជន៍ពីភាពងាយស្រួលក្នុងការប្រើប្រាស់ថាមពលស្អាត និងបៃតង ដោយប្រមាណ៥៧ភាគរយ នៃការផ្គត់ផ្គង់អគ្គិសនីរបស់កម្ពុជា គឺទទួលបានពីប្រភពថាមពលកកើតឡើងវិញ ។ បន្ថែមលើនេះ រាជរដ្ឋាភិបាលបាននិងកំពុងយកចិត្តទុកដាក់ខ្ពស់ក្នុងការអភិវឌ្ឍវិស័យកសិកម្ម និងកសិឧស្សាហកម្ម ជាពិសេសដំណាំកៅស៊ូ និងការកែច្នៃជ័រកៅស៊ូ ព្រមទាំងបានវិនិយោគយ៉ាងច្រើននៅក្នុងគម្រោងហេដ្ឋារចនាសម្ព័ន្ធសំខាន់ៗ ដូចជាផ្លូវល្បឿនលឿនភ្នំពេញ ព្រះសីហនុ ដែលកំពុងប្រតិបត្តិការ ព្រមទាំងគម្រោងនាពេលខាងមុខ ដូចជាផ្លូវល្បឿនលឿនភ្នំពេញ បាវិត និងផ្លូវល្បឿនលឿនភ្នំពេញ សៀមរាប ប៉ោយប៉ែត ជាដើម ។
ឯកឧត្តមក៏បានបន្ថែមថា បច្ចុប្បន្ន កម្ពុជាមានតំបន់សេដ្ឋកិច្ចពិសេសចំនួន២៦ ដែលកំពុងដំណើរការ ដោយបានស្រូបទាញគម្រោងវិនិយោគប្រមាណ៧០០ ក្នុងទំហំទុនវិនិយោគប្រមាណ២៨ពាន់លានដុល្លារអាមេរិក និងបង្កើតការងារបានជាង១៨ម៉ឺនកន្លែង ។ លោកបានលើកឡែងពីច្បាប់ស្ដីពីវិនិយោគនិងអនុក្រឹត្យស្ដីពីការអនុវត្តច្បាប់ស្ដីពីវិនិយោគនិងអនុក្រឹត្យស្ដីពីការអនុវត្តច្បាប់ដែលផ្ដល់ជូនវិនិយោគិននូវកញចប់លើកទឹកចិត្តឆ្លាតវៃ គោលនយោបាយនិងករបន្តដាក់ចេញនូវវិធានការគាំទ្ររបស់រាជរដ្ឋាភិបាលក្នុងការកែលម្អបរិយាកាសវិនិយោគនិងធុរកិច្ចនៅកម្ពុជា ។
ប្រមុខរាជរដ្ឋាភិបាលកម្ពុជាសម្ដេចមហាបរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានជំរុញឱ្យមន្ត្រីថ្នាក់ដឹកនាំសំខាន់ៗព្យាយាមទាក់ទាញវិនិយោគិនបរទេសចូលមកបណ្ដាក់ទុនវិនិយោគនៅក្នុងប្រទេសឱ្យកាន់តែច្រើនបង្កើតការងារនិងប្រាក់ចំណូលដល់ពលរដ្ឋ ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងថា នៅខែកញ្ញាខាងមុខនេះ ឯកឧត្តមនឹងដឹកនាំប្រតិភូកម្ពុជាដែលមានមន្ត្រីតាមក្រសួង និងសមាជិកនៃសមាគមឧកញ៉ាកម្ពុជា ទៅបង្ហាញពីសក្ដានុពលវិនិយោគក្នុងប្រទេសកម្ពុជា និងទាក់ទាញវិនិយោគិនបរទេសមកបណ្ដាក់ទុនវិនិយោគនៅកម្ពុជាបន្ថែម ។ នៅខែក្រោយនេះ ឯកឧត្តមនឹងធ្វើដំណើរទៅប្រទេសអាមេរិក បណ្ដាប្រទេសក្នុងតំបន់អឺរ៉ុប និងប្រទេសមជ្ឈិមបូព៌ាជាដើម ៕
Account
Security
Favourite Content