សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីកម្ពុជាសម្រេចបាននូវជាប្រវត្តិសាសន៍ផ្លូវល្បឿនលឿនភ្នំពេញ-ព្រះសីហនុ និងត្រៀមបើកការដ្ឋានសាងសង់ផ្លូវល្បឿនលឿនទី២ពីភ្នំពេញ ទៅកាន់ក្រុងបាវិតខេត្តស្វាយរៀង ពេលនេះមានក្រុមហ៊ុនឯកជនជាច្រើនបានស្នើសុំក្រសួងសាធារណការ និងដឹកជញ្ជូនសិក្សាផ្លូវល្បឿនលឿនជាបន្តបន្ទាប់ ដោយក្នុងនោះមានផ្លូវល្បឿនលឿនភ្នំពេញ-សៀមរាប និងផ្លូវល្បឿនលឿនភ្នំពេញ-បាត់ដំបង-ប៉ោយប៉ែត។
ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការទីលានទុកដាក់សំរាម ២០,៨ហិចតានៅខេត្តបាត់ដំបងនៅព្រឹកថ្ងៃទី២០ ខែមីនា ឆ្នាំ២០២៣បានឱ្យដឹងថា បច្ចុប្បន្ននេះ មានក្រុមហ៊ុនឯកជនមួយបានទទួលបានការអនុញ្ញាតឱ្យសិក្សាគម្រោងផ្លូវល្បឿនលឿនភ្នំពេញ-បាត់ដំបង-ប៉ោយប៉ែតពីក្រសួងសាធារណការ និងដឹកជញ្ជូន ។
ឯកឧត្តមបន្តថា តំបន់ពាយព្យនៃប្រទេសកម្ពុជាកំពុងមានការអភិវឌ្ឍលើហេដ្ឋារចនាសម្ព័ន្ធជាច្រើនដូចជាគម្រោងលើកកម្រិតគុណភាពផ្លូវជាតិលេខ៥ គម្រោងស្ថាបនាផ្លូវជាតិលេខ៥៧ តភ្ជាប់ពីខេត្តប៉ៃលិន គម្រោងស្ថាបនាផ្លូវជាតិលេខ១០តភ្ជាប់ទៅកោះកុង និងគម្រោងស្ថាបនាផ្លូវភ្ជាប់ពីខេត្តបាត់ដំបងទៅខេត្តសៀមរាបជាដើម ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីពេលថ្មីៗនេះ ក៏បានប្រកាសថា រដ្ឋាភិបាលនឹងយកខេត្តចំនួន៤នៅពាយ័ព្យប្រទេសធ្វើជាតំបន់ប៉ូលសេដ្ឋកិច្ចទី៤របស់កម្ពុជា រួមមានខេត្ត ពោធិ៍សាត់ បាត់ដំបង បន្ទាយមានជ័យ និងប៉ៃលិន ហើយក៏បានជំរុញឱ្យវិនិយោគិន ជាពិសេសបានស្នើវិនិយោគិនចិនបណ្ដាក់ទុនវិនិយោគនៅក្នុងខេត្តទាំង៤ឱ្យបានកាន់តែច្រើន ។
សម្ដេចតេជោបានមានប្រសាសន៍ថា ខេត្តទាំង៤នេះ កំពុងមានការអភិវឌ្ឍលើហេដ្ឋារចនាសម្ព័ន្ធ រួមមានផ្លូវ និងភ្លើង ដោយបានសាងសង់វារីអគ្គិសនីថ្មីមួយនៅខេត្តពោធិ៍សាត់ ដែលអាចធ្វើឱ្យកម្ពុជាមានភ្លើងបន្ថែមទៀតសម្រាប់ប្រើប្រាស់ និងមានសាងសង់លើហេដ្ឋារចនាសម្ព័ន្ធជាច្រើនទៀត ។
បើតាមអ្នកជំនាញវិស័យអចលនទ្រព្យកម្ពុជា អ្នកស្រី អាន សុធីតា នាយិកាប្រតិបត្តិនៃក្រុមហ៊ុន PropNex Cambodia បានឱ្យដឹងថា បណ្ដាខេត្តតាមបណ្ដោយផ្លូវជាតិលេខ៥ នឹងទទួលបានការវិនិយោគពីឧស្សាហកម្មជាច្រើននៅពេលអនាគត ជាពិសេសក្រោយពេលរាជរដ្ឋាភិបាលបានចំណាយទុនយ៉ាងសន្ធឹកសន្ធាប់ទៅលើការវិនិយោគផ្នែកហេដ្ឋារចនាសម្ព័ន្ធរួចរាល់៕
Account
Security
Favourite Content