សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើមឆ្នាំ២០២៥នេះ ចិននៅតែឈរលំដាប់ទី១ ជាវិនិយោគិនដែលបណ្ដាក់ទុនវិនិយោគនៅកម្ពុជាច្រើនជាងគេ ជាក់ស្ដែងក្នុងខែមករា ឆ្នាំ២០២៥ កម្ពុជាទទួលបានទុនវិនិយោគសរុបប្រមាណ ៧៤៨លានដុល្លារអាមេរិក ក្នុងនោះមានប្រភពទុនវិនិយោគពីប្រទេសចិនប្រមាណ ៧៣,៣៥ភាគរយ ឬប្រមាណជា ៥៤៨លានដុល្លារអាមេរិកទៅហើយ ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយនៅថ្ងៃទី០៥ ខែកុម្ភៈ ឆ្នាំ២០២៥ ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងខែមករា ឆ្នាំ២០២៥ កន្លងទៅនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន ៦៨គម្រោង ក្នុងនោះគម្រោងវិនិយោគថ្មីមានចំនួន ៦៤គម្រោង និងគម្រោងពង្រីកផលិតកម្មមានចំនួន៤គម្រោង ដែលគម្រោងទាំងនេះ មានទុនវិនិយោគចំនួន ៧៤៨លានដុល្លារ ។
ក្នុងចំណោមគម្រោងវិនិយោគទាំង៦៨គម្រោង គឺសុទ្ធតែជាគម្រោងក្នុងវិស័យឧស្សាហកម្ម ដោយក្នុងនោះខេត្តកំពង់ស្ពឺទទួលបានគម្រោងវិនិយោគច្រើនជាងគេ ដែលមានរហូតដល់១៩គម្រោង បន្ទាប់មកខេត្តស្វាយរៀង មានចំនួន១៣គម្រោង ភ្នំពេញ១០គម្រោង ព្រះសីហនុ៩គម្រោង កោះកុង៨គម្រោង តាកែវ ៤គម្រោង និងខេត្តមួយចំនួនទៀតទទួលបានគម្រោងវិនិយោគតែ១គម្រោងៗប៉ុណ្ណោះ ។
ក្រៅពីប្រភពទុនដែលបានមកពីប្រទេសចិននៅក្នុងខែមករាកន្លងទៅនេះដែរ ក៏មានប្រភពទុនក្នុងស្រុកប្រមាណ ១៣,១៧ភាគរយក្នុងចំណោមប្រភពទុនសរុប ទុនមកពីប្រទេសវៀតណាមប្រមាណ ៥,៥២ភាគរយ មកពីពីកោះ Cayman ប្រមាណ ៣,២៨ភាគរយ និងប្រទេសមួយចំនួនទៀតដូចជាប្រទេសអង់គ្លេស ប្រទេសសិង្ហបុរី អាមេរិក អូស្ត្រាលី ម៉ាឡេស៊ីជាដើម ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា កាលពីឆ្នាំ២០២៤កន្លងទៅ ក្រុមប្រឹក្សាអភិវឌ្ឍន៍បានចុះបញ្ជីគម្រោងវិនិយោគសរុបប្រមាណជាង៤០០គម្រោង ដោយទទួលបានទុនវិនិយោគប្រមាណជិត៧ពាន់លានដុល្លារអាមេរិក ដែលជាទុនវិនិយោគច្រើនមិនធ្លាប់មានកន្លងមក ។ នេះគឺជាសញ្ញាវិជ្ជមានមួយសម្រាប់កម្ពុជាទទួលបានការវិនិយោគពីក្រៅ និងក្នុងប្រទេស ។
ឯកឧត្តម គង់ វិមាន អគ្គលេខាធិការនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជាបានលើកឡើងថា នៅចុងឆ្នាំ២០២៤កន្លងទៅ ជាការកត់សម្គាល់ឃើញថាមានវិនិយោគិនបរទេស ជាពិសេសមកពីប្រទេសចិនចូលមកកម្ពុជា និងស្វែងរកទីតាំងសម្រាប់ការវិនិយោគរបស់ពួកគេនៅកម្ពុជាជាបន្តបន្ទាប់ ជាពិសេសនៅតំបន់សមុទ្រ ។
ឯកឧត្តមបានលើកឡើងថា តាមរយៈវត្តមានវិនិយោគិនជនជាតិចិន នឹងធ្វើឱ្យការវិនិយោគនៅកម្ពុជានឹងកាន់តែល្អប្រសើរ និងអាចចូលរួមជំរុញ ដល់កំណើនសេដ្ឋកិច្ចជាតិ លើកស្ទួយប្រាក់ចំណូលរបស់ពលរដ្ឋកម្ពុជាបានបន្ថែមមួយកម្រិតទៀត ។
បើតាមអ្នកជំនាញនៃវិស័យអចលនទ្រព្យក្នុងប្រទេសកម្ពុជាបានបង្ហាញទស្សនស្រដៀងគ្នាថា ការវិនិយោគនៅកម្ពុជាក្នុងឆ្នាំ២០២៥ និងឆ្នាំបន្តបន្ទាប់ ក្នុងវិស័យអចលនទ្រព្យ ភាគច្រើននៅផ្នែកឧស្សាហកម្ម និងកសិកម្ម ព្រោះផ្នែកទាំងពីរនេះនៅមានតម្រូវការខ្ពស់នៅលើទីផ្សារក្រៅប្រទេស ។ ចំណែកសំណង់លំនៅឋាន អគារខ្ពស់ៗ ត្រូវការពេលវេលាចន្លោះពី២ទៅ៣ឆ្នាំទៀត ទើបអាចល្អប្រសើរ។ ក្នុងដំណាក់កាលនេះ សំណង់លំនៅឋាន អគារខុនដូ ការិយាល័យ ជាពេលវេលាស្វែងរកម្ចាស់ឬអ្នកកាន់កាប់ ដូច្នេះចន្លោះ២ទៅ៣ឆ្នាំនេះ ការវិនិយោគថ្មីៗប្រហែលជាមិនទាន់មានច្រើនទេ ៕
Account
Security
Favourite Content