សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី DW បានរាយការណ៍ថា ប្រធានាធិបតីសហរដ្ឋអាម៉េរិក លោក Donald Trump បានចុះហត្ថលេខាដកសហរដ្ឋអាម៉េរិកចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ (UNHRC) ។
កាលពីថ្ងៃអង្គារ៍ ប្រធានាធិបតីសហរដ្ឋអាម៉េរិក លោក Donald Trump បានចុះហត្ថលេខាលើបទបញ្ជាប្រតិបត្តិមួយក្នុងការដកសហរដ្ឋអាមេរិកចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ (UNHRC) ហើយបទបញ្ជានេះក៏កំពុងជំរុញឱ្យមានការពិនិត្យឡើងវិញលើការផ្តល់មូលនិធិរបស់សហរដ្ឋអាម៉េរិកសម្រាប់អង្គការសហប្រជាជាតិផងដែរ។ លើសពីនេះ សហរដ្ឋអាម៉េរិកនឹងមិនចូលរួមជាមួយក្រុមប្រឹក្សាសិទ្ធិមនុស្សអង្គការសហប្រជាជាតិ (UNHRC) និងសុំមិនចូលរួមក្នុងការបោះឆ្នោតក្នុងក្រុមប្រឹក្សានេះទេ។ Trump ក៏បានបញ្ជាឱ្យដកសហរដ្ឋអាមេរិកចេញពីទីភ្នាក់ងារផ្តល់ជំនួយរបស់អង្គការសហប្រជាជាតិសម្រាប់ប៉ាឡេស្ទីន (UNRWA) ផងដែរ។ មិនត្រឹមតែប៉ុណ្ណោះ អាម៉េរិកគ្រោងពិនិត្យឡើងវិញនូវសមាជិកនៅក្នុងអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO)។
ក្នុងឆ្នាំ២០១៨ Trump បានដកសហរដ្ឋអាមេរិកចេញពី UNHRC ម្តងរួចហើយ ក្នុងអំឡុងពេលកាន់តំណែងដំបូងជាប្រធានាធិបតី។ ក្រោយមក អតីតប្រធានាធិបតី Joe Biden បានបញ្ចូលសមាជិកភាពរបស់សហរដ្ឋអាម៉េរិកឡើងវិញទៅក្នុងអង្គការនេះវិញនៅឆ្នាំ ២០២១។ Trump បានរិះគន់ថា អង្គសហប្រជាជាតិមានសក្តានុពលអស្ចារ្យ ប៉ុន្តែវាដំណើរការមិនល្អនោះទេ។ មនុស្សគ្រប់គ្នាគួរផ្តល់មូលនិធិស្មើរៗគ្នា ប៉ុន្តែសមាមាត្ររបស់អាម៉េរិកលើសគេ។ Trump បានប្រាប់អ្នកយកព័ត៌មានថា អង្គការអន្តររដ្ឋាភិបាលត្រូវតែមានសកម្មភាពរបស់ពួកគេរួមគ្នា ប៉ុន្តែវាមិនដំណើរការល្អទេ និយាយដោយស្មោះត្រង់ គឺពួកគេមិនបានធ្វើការងារនោះទេ។ Trump បានបន្ថែមថា ជម្លោះភាគច្រើនដែលអាម៉េរិកកំពុងធ្វើការគួរតែត្រូវបានដោះស្រាយ ឬយ៉ាងហោចណាស់គួរតែមានជំនួយខ្លះក្នុងការដោះស្រាយវា ប៉ុន្តែអាម៉េរិកហាក់ដូចជាមិនទទួលបានជំនួយទេ។ ជាក់ស្តែង នេះគឺជាគោលបំណងចម្បងរបស់អង្គការសហប្រជាជាតិ។ គួរឲ្យបញ្ជាក់ដែរថា Trump បានធ្វើយុទ្ធនាការប្រឆាំងយ៉ាងខ្លាំងនឹងការផ្តល់មូលនិធិរបស់សហរដ្ឋអាម៉េរិកសម្រាប់ស្ថាប័នពហុភាគីទាំងក្នុងអំឡុងពេលអាណត្តិដំបូងរបស់គាត់ និងសូម្បីតែតំណែងជាប្រធានាធិបតីលើកទីពីររបស់គាត់ ដោយអំពាវនាវឱ្យប្រទេសផ្សេងទៀតបង្កើនការរួមចំណែករបស់ពួកគេ ជាពិសេសទាក់ទងនឹងសម្ព័ន្ធមិត្តយោធាណាតូ។
លេខាធិការបុគ្គលិកសេតវិមាន Will Scharf បានអះអាងថា មានការលំអៀងប្រឆាំងនឹងអាមេរិកនៅទីភ្នាក់ងារអង្គការសហប្រជាជាតិ។ លើសពីនេះ អាម៉េរិកមើលឃើញពីកម្រិតហិរញ្ញប្បទានរបស់គ្នាខុសគ្នាខ្លាំងក្នុងចំណោមប្រទេសដទៃទៀត និងសកម្មភាពរបស់ប្រទេសផ្សេងនៅក្នុងអង្គការសហប្រជាជាតិ ហើយបទបញ្ជាប្រតិបត្តិនេះអំពាវនាវឱ្យមានការវាយតម្លៃឡើងវិញអំពីសមាជិកភាព និងការផ្តល់មូលនិធិរបស់សហរដ្ឋអាម៉េរិក។
ទន្ទឹមនឹងនេះ Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិលោក Antonio Guterres លើកឡើងថា លោក Antonio បានធ្វើការដោយមិននឿយហត់ដើម្បីអនុវត្តកំណែទម្រង់ជាច្រើនក្នុងការបង្កើនប្រសិទ្ធភាព និងការច្នៃប្រឌិត។ ការគាំទ្ររបស់សហរដ្ឋអាម៉េរិកចំពោះអង្គការសហប្រជាជាតិបានជួយសង្គ្រោះជីវិតមនុស្សរាប់មិនអស់ និងសន្តិសុខពិភពលោកក្នុងកម្រិតខ្ពស់។ ដូច្នោះហើយ អគ្គលេខាធិការ Antonio ទន្ទឹងរង់ចាំក្នុងការបន្តទំនាក់ទំនងរបស់គាត់ជាមួយប្រធានាធិបតី Trump និងរដ្ឋាភិបាលសហរដ្ឋអាម៉េរិក ដើម្បីពង្រឹងទំនាក់ទំនងនោះនៅក្នុងពិភពលោកដែលកំពុងច្របូកច្របល់នាពេលបច្ចុប្បន្ននេះ៕
Account
Security
Favourite Content