សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចិននៅតែជាប្រភពទុនដ៏សំខាន់សម្រាប់ការវិនិយោគ នៅក្នុងប្រទេសកម្ពុជា ជាក់ស្ដែងក្នុងរយៈពេលមួយឆ្នាំពេញ ពោលគឺក្រោយការកកើតរាជរដ្ឋាភិបាលចិនបានបណ្ដាក់ទុនវិនិយោគនៅកម្ពុជារហូតដល់៣,៥ពាន់លានដុល្លារអាមេរិក ដែលស្មើនឹងប្រមាណ៦០,៤៤ភាគរយនៃ ប្រភពទុនសរុប ដែលកម្ពុជាទទួលបាន ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍បានបង្ហាញថា ក្នុងរយៈពេល១ឆ្នាំពេញ កម្ពុជាទទួលបានទុនវិនិយោគសរុបប្រមាណ៧,៥ពាន់លានដុល្លារអាមេរិកពីគម្រោងវិនិយោគសរុបចំនួន៣៩១គម្រោង ។ ក្នុងចំណោមចំនួន ៧,៥ពាន់លានដុល្លារអាមេរិកនោះ មានទុនវិនិយោគពីប្រទេសចិនចំនួន ៦០,៤៤ភាគរយទៅហើយ ឬប្រមាណ៣,៥ពាន់លានដុល្លារអាមេរិក ។ ក្រៅពីនេះ ជាទុនវិនិយោគរបស់វិនិយោគិនក្នុងស្រុក ដែលមានទំហំប្រមាណ ២,៤២ពាន់លានដុល្លារអាមេរិក ឬប្រមាណ ៣២,៣១ភាគរយ និងទុនមកពីប្រទេសសិង្ហបុរី ២,៦៥ភាគរយ ម៉ាឡេស៊ី ១,៣ភាគរយ ។ ក្រៅពីនោះមានមកពីប្រទេសវៀតណាម ថៃ កូរ៉េខាងត្បូង សហរដ្ឋអាមេរិក ឥណ្ឌាជាដើម ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញបន្ថែមថា វិស័យសំខាន់ៗចំនួន៤ត្រូវបានទទួលបានការវិនិយោគច្រើនជាងគេ ក្នុងនោះវិស័យឧស្សាហកម្មទទួលបានទុនវិនិយោគច្រើនជាងដែលមានទឹកប្រាក់រហូតដល់ជិត៤ពាន់លានដុល្លារអាមេរិក ។ បន្ទាប់មកគឺវិស័យហេដ្ឋារចនាសម្ព័ន្ធ ទទួលបានទុនវិនិយោគរហូតដល់ជិត៣ពាន់លានដុល្លារអាមេរិក វិស័យទេសចរណ៍ទទួលទុនវិនិយោគប្រមាណជិត៦០០លានដុល្លារអាមេរិក និងវិស័យកសិកម្មនិងកសិ-ឧស្សាហកម្មទទួលបានទុនវិនិយោគប្រមាណ១២០លានដុល្លារអាមេរិក ។
សម្រាប់តំបន់ដែលទទួលបានការវិនិយោគច្រើនជាងគេក្នុងរយៈពេលពេញមួយឆ្នាំមាន ខេត្តកំពង់ស្ពឺទទួលបាន៩៥គម្រោង ខេត្តស្វាយរៀងទទួលបាន៧៣គម្រោង ភ្នំពេញ ទទួលបាន៥១គម្រោង ខេត្តព្រះសីហនុទទួលបានគម្រោងវិនិយោគ៤៩គម្រោង ខេត្តកណ្ដាលទទួលបានគម្រោងវិនិយោគចំនួន៤២គម្រោង និងខេត្តតាកែវ ទទួលបានគម្រោងវិនិយោគចំនួន៣៨គម្រោង ។
អ្នកជំនាញអចលនទ្រព្យកម្ពុជាជាច្រើនមើលឃើញថា វិនិយោគិនចិននៅតែជាវិនិយោគិនដែលមានសក្ដានុពលនិងជាប្រភពទុនដ៏សំខាន់សម្រាប់ការវិនិយោគនក្នុងប្រទេសកម្ពុជាជាពិសេសលើវិស័យអចលនទ្រព្យ និងឧស្សាហកម្ម ជាក់ស្ដែងតាមរបាយការណ៍បានបង្ហាញថាគម្រោងវិនិយោគអចលនទ្រព្យធំៗនៅក្នុងរយៈពេល១ឆ្នាំកន្លងមកនេះ ភាគច្រើនជាគម្រោងវិនិយោគរបស់ចិន ដូចជាគម្រោងវិនិយោគលើការសាងសង់សណ្ឋាគារផ្កាយ៥ នៅខេត្តព្រះសីហនុ ដែលមានទុនវិនិយោគរហូតដល់៥៧៤លានដុល្លារអាមេរិក គម្រោងវិនិយោគបង្កើតរោងចក្រផលិតសំបកកង់រថយន្ត នៅខេត្តក្រចេះ តម្លៃ៤៣០លានដុល្លារ និងគម្រោងវិនិយោគលើរោងចក្រផលិតសំបកកង់ឡានតម្លៃ ២៥៦លានដុល្លារអាមេរិកនៅខេត្តស្វាយរៀងជាដើម ។
ថ្មីៗនេះដែរ ក៏មានក្រុមហ៊ុនចិនជាច្រើនបានចូលមកកម្ពុជារាប់ទាំងវិនិយោគិនមកពីតំបន់ស្វយ័តក្រុងហុងកុងផងដែរ មកសិក្សានិងស្វែងរកឱកាសវិនិយោគនៅកម្ពុជា ដោយបានជួបជាមួយមន្ត្រី និងថ្នាក់ដឹកនាំកំពូលរបស់កម្ពុជា ស្នើសុំយោបល់មុនសម្រេចចិត្តបណ្ដាក់ទុនវិនិយោគ ។
ទោះជាយ៉ាងណាក្ដី រាជរដ្ឋាភិបាលបានខិតខំប្រឹងប្រែងក្នុងការទាក់ទាញវិនិយោគិននិងប្រភពទុនវិនិយោគពីបណ្ដាប្រទេសផ្សេងៗទៀតក្រៅពីចិន ដោយធ្វើយ៉ាងណាឱ្យកម្ពុជាមានប្រភពទុនវិនិយោគចម្រុះដោយមិនពឹងផ្អែកលើទុនវិនិយោគវិនិយោគពីចិនឬប្រទេសណាតែមួយនោះទេ ៕
Account
Security
Favourite Content