សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីប្រទេសចិនបានបើកទូលាយសម្រាប់ការធ្វើដំណើរដល់ប្រជាជនរបស់ខ្លួនវិញនោះ វិនិយោគិន និងទេសចរចិនបានចាប់ផ្ដើមចេញក្រៅប្រទេសនិងស្វែងរកឱកាសវិនិយោគនៅប្រទេសជាគូ ក្នុងនោះ កម្ពុជាក៏ទទួលបានវិនិយោគិនចិនជាបន្តបន្ទាប់ផងដែរ ជាក់ស្ដែងនៅប៉ុន្មានថ្ងៃនេះ វិនិយោគិនចិនមកពីខេត្តហៃណាន់ប្រទេសចិនមួយក្រុមបានមកកម្ពុជា និងបានសិក្សាពីការវិនិយោគក៏ដូចជាឱកាសធ្វើជំនួញជាមួយវិនិយោគិន និងធុរជនកម្ពុជា ។
លោក លី ជុងហ្គ័ង អគ្គនាយករងមន្ទីរទេសចរណ៍នៃខេត្តហៃណាន់ប្រទេសចិន និងបានមកដល់កម្ពុជាបានលើកឡើងថា ចាប់តាំងពីប្រទេសចិនបានបើកទូលាយឡើងវិញនូវការធ្វើដំណើររបស់ប្រជាជនចិន ក៏ឃើញថាប្រជាជនចិនជាច្រើនបានចាកចេញពីប្រទេសចិនធ្វើដំណើរកម្សាន្តនៅតាមបណ្ដាប្រទេសនានា ក្នុងនោះ កម្ពុជាក៏ជាប្រទេសគោលដៅមួយរបស់វិនិយោគិននិងទេសចរចិនផងដែរ ។
លោកបន្តថា ៖
“ក្នុងឆ្នាំ២០២៣នេះ ប្រទេសចិនរំពឹងថាជនជាតិចិនប្រមាណ៩០លាននាក់នឹងចេញពីប្រទេសធ្វើដំណើរជុំវិញពិភពលោក ហើយក៏រំពឹងថាប្រជាជននៃប្រទេសជាច្រើនទៀតក៏នឹងត្រលប់ចូលទៅប្រទេសចិនដើម្បីទស្សនានៅតាមរមណីយដ្ឋាននានាផងដែរ ក្នុងនោះខេត្តហៃណាន់របស់ចិនក៏ជាទីតាំងយុទ្ធសាស្ត្រទាក់ទាញភ្ញៀវទេសចរពីបណ្ដាប្រទេសនានារួមទាំងកម្ពុជា”
លោកបន្ថែមថា ៖
“តាមរយៈទំនាក់ទំនងរវាងកម្ពុជា-ចិន យើងនឹងជំរុញឱ្យទេសចរចិនក៏ដូចជាអ្នកវិនិយោគចិនចូលមកកម្ពុជាកាន់តែច្រើន ហើយក៏ទាក់ទាញភ្ញៀវពីកម្ពុជាទៅកម្សាន្តនៅខេត្តហៃណាន់ឱ្យបានកាន់តែច្រើនដូចគ្នា ដោយនឹងបង្កើតជើងហោះហើរឱ្យបានច្រើនជើងពីកម្ពុជាទៅកាន់ខេត្តហៃណាន់ផ្ទាល់”
លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថាវិនិយោគិនចិននៅតែជាអ្នកវិនិយោគច្រើនជាងគេនៅកម្ពុជា ដូច្នេះហើយនៅពេលប្រទេសចិនបើកប្រទេសឡើងវិញ កម្ពុជារំពឹងថានឹងទទួលបានវិនិយោគិនចិនក៏ដូចជាការវិនិយោគពីប្រទេសចិនមកកម្ពុជាបន្ថែមទៀត។
លោកបន្តថា ៖
“ក្រៅពីការវិនិយោគរបស់ចិនមកកម្ពុជាហើយនោះ ក្នុងឆ្នាំ២០២៣នេះដែរ យើងក៏រំពឹងពីកំណើនភ្ញៀវទេសចរជនជាតិចិនមកកម្ពុជាច្រើនឡើងវិញដែលអាចជួយលើកស្ទួយជីវភាពរបស់ពលរដ្ឋកាន់តែប្រសើរឡើង ជាមួយនឹងកំណើនសេដ្ឋកិច្ចរបស់កម្ពុជាផងដែរ”
លោកបន្តថា ក្រោយពីប្រទេសចិនបើកការធ្វើដំណើរឡើងវិញ ក្រុមហ៊ុនទេសចរណ៍កម្ពុជា ទាំងក្រុមហ៊ុនផ្នែកអចលនទ្រព្យ កំពុងត្រៀមខ្លួនរួចជាស្រេចក្នុងការផ្តល់សេវាកម្ម ក៏ដូចជាកិច្ចសហការជាដៃគូវិនិយោគរួមគ្នាដើម្បីទទួលបានឱកាសចំណេញផងដែរ ៕
Account
Security
Favourite Content