សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ ២០២៥ វិស័យសំណង់ស្រូបទាញបានទុនវិនិយោគប្រមាណ៧,៣ពាន់លានដុល្លារអាមេរិក ដោយក្រសួងរៀបចំដែនដី នគរូបនីយកម្មនិងសំណង់បានចេញលិខិតអនុញ្ញាតសាងសង់នៅទូទាំងប្រទេសចំនួន៣៥០៣គម្រោង ដែលមានផ្ទៃក្រឡាសំណង់សរុបជាង១៨លានម៉េត្រការ៉េ ។ នេះបើយោងតាមរបាយការណ៍របស់ក្រសួងរៀបចំដែនដីនគរូបនីយកម្មនិងសំណង់ក្នុងសន្និបាតបូកសរុបការងារឆ្នាំ ២០២៥នាព្រឹកថ្ងៃទី១ខែធ្នូ។
យោងតាមរបាយការណ៍ដដែលនេះបានបង្ហាញថា ការចេញលិខិតអនុញ្ញាតសាងសង់សំណង់ទូទាំងប្រទេសក្នុងឆ្នាំ២០២៥ បើធៀបនឹងឆ្នាំ២០២៤កន្លងទៅ មានការកើនឡើង៦៨,៨៩ភាគរយ ។ បើគិតចាប់តាំងពីឆ្នាំ ២០០០ រហូតដល់ដំណាច់ឆ្នាំ ២០២៥នេះ ក្រសួងរៀបចំដែនដី នគរូបនីយកម្មនិងសំណង់ បានចេញលិខិតអនុញ្ញាតសាងសង់ទូទាំងប្រទេសសរុប ៧១ ៨២០គម្រោង គិតជាទឹកប្រាក់វិនិយោគ មានប្រមាណ ៨៧ ៦៩៦លានដុល្លារអាមេរិក ។
បើតាមទិន្នន័យរបស់ក្រសួងបានបញ្ជាក់ថា ក្នុងឆ្នាំ ២០២៥ ក្រសួងបានចេញលិខិតអនុញ្ញាតសាងសង់លើគម្រោងអគារខ្ពស់ៗ ចាប់ពី៥ជាន់ឡើងទៅមានចំនួន២២៨គម្រោង ស្មើនឹង២៨៨អគារ សំណង់លំនៅឋាន មានចំនួន ២ ៧២៤គម្រោង មានទុនវិនិយោគប្រមាណ ២ ៥១២លានដុល្លារអាមេរិក សណ្ឋាគារមានចំនួន ២៥គម្រោង មានទុនវិនិយោគប្រមាណ ២៧១លានដុល្លារអាមេរិក សំណង់អគារពាណិជ្ជកម្មចំនួន ១៨៩គម្រោង មានទុនវិនិយោគ ៧៩៤លានដុល្លារអាមេរិក សំណង់រោងចក្រ មានចំនួន ២៣៤គម្រោង មានទុនវិនិយោគ ២២៩លានដុល្លារអាមេរិក និងសំណង់អគារពហុមុខងារមានចំនួន ៣៧គម្រោង មានទឹកប្រាក់ប្រមាណ ៤៦៨លានដុល្លារអាមេរិក ។
របាយការណ៍របស់ក្រសួងរៀបចំដែនដី នគរូបនីយកម្មនិងសំណង់ គិតត្រឹមឆ្នាំ ២០២៥ នេះ គម្រោងអគារខ្ពស់ៗ ចាប់ពីជាន់ទី៥ឡើងទៅ មានចំនួន ៣ ២៥៤ អគារ ក្នុងនោះអគារខ្ពស់ចាប់ពីជាន់ទី៥ ដល់៩ជាន់ មានចំនួន ១ ៩០៥អគារ កម្ពស់ចាប់ពីជាន់ទី១០ ដល់១៩ មានចំនួន ៨៥១អគារ កម្ពស់ចាប់ពី ២០ជាន់ដល់២៩ជាន់មានចំនួន ២៧៧អគារ កម្ពស់ចាប់ពី៣០ ដល់៣៩ជាន់មានចំនួន ១៥៦អគារ និងកម្ពស់ចាប់ពី៤០ជាន់ឡើងទៅមានចំនួន ៦៥អគារ ។
នៅក្នុងឱកាសបើកសន្និបាតបូកសរុបលទ្ធផលការងារប្រចាំឆ្នាំ២០២៥ នៅព្រឹកថ្ងៃទី០១ ធ្នូ ២០២៥ ឯកឧត្តមសាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងដែនដី នគរូបនីយកម្មនិងសំណង់បានមានប្រសាសន៍ថា ការសាងសង់សំណង់ នៅក្នុងប្រទេសកម្ពុជាត្រូវគិតគូរទៅលើការអភិវឌ្ឍហេដ្ឋារចនាសម្ព័ន្ធ ដោយសំណង់ទាំងនោះ ជាពិសេសសំណង់លំនៅឋានរបស់ប្រជាពលរដ្ឋ ត្រូវតែមានទឹកស្អាត ភ្លើងអគ្គិសនីប្រើប្រាស់គ្រប់គ្រាន់ និងត្រូវមានផ្លូវចេញចូលផ្ទះបានត្រឹមត្រូវផងដែរ ។
ទន្ទឹមនឹងនេះដែរ ឯកឧត្តមក៏បានថ្លែងទៅកាន់មន្ត្រីក្រោមឱវាទទាំងអស់ ត្រូវសហការជាមួយក្រសួងមហាផ្ទៃ ក្នុងការរៀបចំភូមិឋានក្សេមក្សាន្ត ដោយត្រូវរៀបចំទីក្រុង តំបន់ប្រជាពលរដ្ឋរស់នៅឱ្យមានផាសុកភាព មានទីធ្លាសម្រាប់ហាត់ប្រាណ មានសួនកម្សាន្ត ដើម្បីឱ្យពលរដ្ឋមានកន្លែងហាត់ប្រាណ កាត់បន្ថយបាននូវជំងឺទឹកនោមផ្អែម លើសឈាម និងជំងឺមិនឆ្លងដទៃទៀត ៕
Account
Security
Favourite Content