ភ្នំពេញ ៖ កាលពីមុន​វិបត្តិកូវីដ១៩ ជាពិសេស​ដើមឆ្នាំ២០១៩  វិស័យ​អចលនទ្រព្យ​ក្នុ​ងប្រទេស​កម្ពុជា​មានការកើនឡើង​ខ្ពស់​ខ្លាំង​រហូតដល់ចំណុ​ចកំពូល ​និងជា​ចំណុច​ដែល​គួរប្រុង​ប្រយ័ត្ន​ ហើយការ​កើនឡើង​ខ្ពស់​ពេក​នៃវិស័យ​អច​ល​ន​ទ្រ​ព្យ​ក្នុ​ងអំឡុងពេលនោះដែរបានបន្សល់ទុក​នូវ​វិបត្តិនេះ​មកដល់បច្ចុប្បន្ននេះ។

លោក​បណ្ឌិត ​គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យ​សភាកម្ពុជា​បានមានប្រសាសន៍ថា​ ការ​កើនឡើង​នៃតម្រូវការ​ខ្ពស់​នៅក្នុ​ងឆ្នាំ​២០១៩​ ដោយ​មានកត្តា​ចំនួន​៤ ក្នុងនោះ ទី១ ផលចំណេញខ្ពស់​ធ្វើឱ្យមនុស្ស​វិនិ​យោគ​លើវិស័យ​នេះច្រើន។ កត្តាទី​២ ហាង​ឆេង​ខ្ពស់​ ៖ ហាង​ឆេងនេះ​គឺសំដៅលើ​អចលនទ្រព្យ​មាន​តម្លៃ​ខ្ពស់​ និង​មាន​ទីផ្សារ​ខ្ពស់។ កាលពីមុនប្រជាពលរដ្ឋ​កម្ពុជា​មិនសូវ​មានអ្នកទិញផ្ទះ​ដើម្បីទុក​ចំណេញ ​ឬវិនិយោ​គលើ​ផ្ទះទេ ភាគ​ច្រើន​គេវិនិយោគ​លើ​មាស​ ហើយកាលជំនាន់​នោះ​ទិញផ្ទះមកទុក​ក៏ពិបាកលក់​មិនដូច​មាស​ឡើយ ។

កត្តា​ទី​៣ ​គឺ​ហានិភ័យ​ទាប ៖​ កាលពីអំឡុង​ឆ្នាំ​២០១៩ អ្នកទិញផ្ទះភាគច្រើនមិនបានយកលុយ​របស់ខ្លួនផ្ទាល់ទៅទិញ​នោះ​ទេ គឺយក​លុយពីធនាគារ​ទៅទិញ ហើយនៅពេលណា​ចំណេញក៏​យកប្រាក់ចំណេញមកទុក ហើយបើខាត​ឱ្យ​ធនា​គា​រ​រ៉ាប់រងទៅពីព្រោះប្លង់ទុកនៅធនាគារស្រាប់ ។​ កត្តា​សំខាន់មួយទៀត គឺការផ្ដល់​កម្ចីទិញផ្ទះ​មានរយៈពេល​វែង ជាក់​ស្ដែង​ធនាគារ​ដែលផ្ដល់​កម្ចីទិញផ្ទះបានផ្ដល់​រយៈ​ពេលដល់ទៅ​១០ឆ្នាំ ២០​ឆ្នាំ ដូច្នេះ​អ្នកទិញផ្ទះគាត់មិនសូវ​ព្រួយ​បារម្ភ ពី​ព្រោះថា​ប្រាក់ដែលបង់ទៅធនាគារ​ក៏​ក្នុងកម្រិតទាបដែរ ។ កត្តាទាំង​នេះបានជំរុញឱ្យ​សន្ទុះនៃការទិញ​ផ្ទះ​ ឬអ​ច​ល​ន​ទ្រ​ព្យ​​ផ្សេងទៀត​កើនឡើង​ខ្ពស់។

លោក​បណ្ឌិត គី សេរីវឌ្ឍន៍ បាន​បន្តថា​ ៖

“នៅពេល​ចូលមកដល់​វិបត្តិកូវីដ​១៩​​ ពលរដ្ឋជាច្រើនបាន​បាត់បង់ប្រាក់ចំណូល ហើយនៅ​ពេល​បាត់​​ប្រាក់ចំណូល​ ក៏ចាប់ផ្ដើម​ប្រើយុទ្ធសាស្ត្រ​របស់គ្រូជោគជ័យ​មួយចំនួនមកប្រើ​។ អ្នកទិញអចលនទ្រព្យ​កាល​ក្នុងពេលនោះគឺមានពីរ គឺទិញ​ដើម្បីស្នាក់នៅ និងទិញដើម្បី​វិនិយោគ ហើយអ្នកដែលទិញផ្ទះ ឬអចលនទ្រព្យ​សម្រាប់​ប្រើប្រាស់​ផ្ទាល់ខ្លួន ដូចជា​ទិញផ្ទះដើម្បីស្នាក់​នៅមិនសូវ​ជា​មានបញ្ហា​ទេ តែសម្រាប់អ្នកទិញ​ដើម្បី​វិនិយោគ​ចាប់​ផ្ដើម​មាន​បញ្ហា​ច្រើន។”

លោកបណ្ឌិត​បន្ថែមថា ការទិញផ្ទះ​ដើម្បីវិនិយោគ​ក្នុងឆ្នាំ​២០១៩ គឺជាការ​វិនិយោគខាត ពីព្រោះ​ក្នុ​ងសម័យ​នោះ​ អ្នក​ណា​​ក៏ទិញផ្ទះ​ហើយអ្នកទិញផ្ទះវិនិយោគក៏មានចំនួន​ច្រើន ។ យ៉ាងណាក្ដី​របាយការណ៍​របស់​ក្រសួង​រៀបចំ​ដែន​ដីន​គ​រូប​​ណីយកម្ម​ និងសំណង់​បានបង្ហាញថា ​ក្នុងមួយឆ្នាំ​កម្ពុជា​មានតម្រូវការ​លំនៅឋានប្រមាណ៥ម៉ឺន​ខ្នង​ ប៉ុន្តែ​បរិមាណនេះ​ មិនមែនជា​តម្រូវការ​ជាក់ស្ដែងទេ គឺ​ជា​តម្រូវការ​សម្រាប់​វិនិយោគ ពីព្រោះថាបុគ្គល​មួយរូប បានទិញផ្ទះ​៣ល្វែង ទៅ​៥​ល្វែង ខ្លះច្រើនជាង​នេះ ដើម្បីទុកលក់​យកចំណេញ ។ សកម្មភាពបែបនេះកាន់តែច្រើន​ធ្វើឱ្យ​អ្នក​អភិវឌ្ឍន៍​លំនៅឋាន​កាន់​តែពង្រីកគម្រោង​ធ្វើឱ្យការផ្គត់ផ្គង់​លើ​សតម្រូវការ ។

លោកបណ្ឌិត​បញ្ជាក់ថា ដោយសារតែ​សកម្មភាព​នៃ​ការ​វិនិយោគលើ​អចលនទ្រព្យ​កាលមុននោះ មានកំណើនកាន់តែ​ខ្លាំង ធ្វើឱ្យ​អ្នក​ប្រកបរបរ​ក្នុងវិស័យ​ផ្សេង​ដូចជា​សហគ្រិនខ្នាតតូច ​និងមធ្យម​ងាកទៅ​វិនិយោគ​លើអចលនទ្រព្យ​វិញ ដើ​ម្បី​​​​ប្រាក់ចំណេញលឿន​ ជាក់ស្ដែង​អ្នកផលិតទឹកត្រី ទឹកស៊ីអ៊ីវ បន្ថយកា​រផលិតរបស់ខ្លួន​ងាកទៅវិនិយោគ​អច​ល​ន​ទ្រព្យ​ ដែល​ហៅថា​ជាការ​បំបែកទីផ្សារ​ក្នុង​វិស័យ​ផ្សេង ។​

ក្រលេកមកមើលស្ថានភាព​នៃវិស័យ​អចលនទ្រព្យនៅក្នុងប្រទេស​កម្ពុជា​នាពេលបច្ចុប្បន្ន​នេះ ​ហាក់​មានភាពកាន់តែ​ពិបាក ដោយអតិថិជន​ ពលរដ្ឋ​ទិញគម្រោង​ផ្ទះ គម្រោង​ដីឡូត៍ និងគម្រោង​ផ្សារ​ជាដើម​ បាននាំគ្នាចេញមុខ​តវ៉ា ខណៈ​បង់​លុយគ្រប់​ចំនួន​ហើយ​ តែមិនទាន់​ទទួលបាន​ដី ផ្ទះឬផ្សារដែលខ្លួនបានទិញ ។ អ្វីដែលពិសេស​សកម្មភាពសាងសង់​គម្រោង​ដែលពលរដ្ឋ​បានទិញ​នោះ ក៏មិនទាន់​ឃើញ​លេច​ចេញជារូប​រាង​នៅឡើយ ៕