ភ្នំពេញ៖ កាលពីឆ្នាំ២០២៣កន្លងទៅនេះ ក្រសួងសាធារណការ និងដឹកជញ្ជូន បានបញ្ចប់ជាស្ថាពរនូវគម្រោងសាងសង់បណ្តាញហេដ្ឋារចនាសម្ព័ន្ធសំខាន់ៗមួយចំនួនដូចជា គម្រោងជួសជុល និងសាងសង់ផ្លូវ-ស្ពាន ដែលមានប្រវែងសរុបចំនួន ៦១៤,៦០គ.ម ការថែទាំផ្លូវ-ស្ពាន តាមបណ្តាខេត្ត /ក្រុង ដែលមានប្រវែងសរុប ១១ ៧៧៤,២៣ គ.ម, និងគម្រោងដែលប្រើប្រាស់ថវិការបស់ដៃគូអភិវឌ្ឍន៍សម្រាប់សាងសង់ រួមមាន ផ្លូវក្រវាត់ក្រុងខ្សែទី៣ ប្រវែង ៤៧,៦១គ.ម និងផ្លូវខ្នែង ប្រវែង៥,៣៧គ.ម, ផ្លូវជាតិ លេខ៥ ភាគខាងត្បូង (ព្រែកក្តាម-ធ្លាម្អម) ប្រវែង១៣៥,២៥គ.ម, និងផ្លូវជាតិលេខ២ និងផ្លូវជាតិលេខ២២ ប្រវែង ៧២,១៧គ.ម។

នេះបើតាមការលើកឡើងរបស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ ក្រោមប្រធានបទ «ពង្រឹងការអភិវឌ្ឍធនធានមនុស្ស គុណភាពសំណង់ហេដ្ឋារចនាសម្ព័ន្ធ ការរៀបចំច្បាប់-បទដ្ឋានគតិយុត្ត ការផ្តល់សេវា និងការប្រើប្រាស់បច្ចេកវិទ្យានិងឌីជីថល» កាលពីព្រឹកថ្ងៃពុធ ទី២៨ ខែកុម្ភៈ ឆ្នាំ២០២៤ នៅទីស្តីការក្រសួង។

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់បន្ថែមថា៖ គិតត្រឹមឆ្នាំ ២០២៣កន្លងទៅនេះ, ក្រសួងបានស្ថាបនា និងសាងសង់ផ្លូវ ជាតិកម្រិត១ ចំនួន៩ខ្សែ មានប្រវែងសរុប ២ ២៥៤គ.ម ដោយបានក្រាលកៅស៊ូ និងបេតុងសម្រេចបាន១០០%, ផ្លូវជាតិកម្រិត២ ចំនួន៧២ខ្សែ មានប្រវែងសរុប ៥ ១៣៥,៨៨គ.ម ដោយបានក្រាលកៅស៊ូ និងបេតុងប្រវែង ៣ ៩៣១គ.ម ស្មើនឹង ៧៦,៥៤% នៃប្រវែងផ្លូវសរុប, ផ្លូវខេត្ត ចំនួន ៧៦៩ខ្សែ មានប្រវែងសរុប ១២ ៦២៦គ.ម ដោយបានក្រាលកៅស៊ូ និងបេតុងប្រវែង៥ ១០០ គ.មំ ស្មើនឹង ៤០,៣៩% នៃប្រវែងផ្លូវសរុប។ សរុបមក, ផ្លូវជាតិ និងផ្លូវខេត្តមាន៨៥០​ខ្សែ មានប្រវែង ២០ ០១៦ គ.ម ហើយបានក្រាលកៅស៊ូ និងបេតុងប្រវែង ១១ ២៨៥គ.ម ស្មើនឹង ៥៦,៣៨% នៃប្រវែង ផ្លូវសរុបទាំងអស់។

សូមបញ្ជាក់ផងដែរថា បច្ចុប្បន្ននេះ ក្រសួងបាន និងកំពុងបន្តដំណើរការសាងសង់គម្រោងផ្លូវ-ស្ពាន ដោយប្រើប្រាស់ថវិកាដៃគូអភិវឌ្ឍន៍រួមមាន៖

• គម្រោងប្រើប្រាស់ថវិកាប្រទេសចិន៖ ទី១-ផ្លូវថ្នល់មានចំនួន៧ខ្សែ ប្រវែងសរុប ៥៧៨,២៩គ.ម រួមមាន កំណាត់ផ្លូវជាតិលេខ ៧ (ស្គន់-ស្ពានគីហ្សូណា) ប្រវែង ៤៥,៤៨គ.ម, ផ្លូវជាតិលេខ ១០ ប្រវែង ១៩៨,៥១គ.ម, ផ្លូវជាតិលេខ ៣១ ប្រវែង ៥៣,៣៩គ.ម, ផ្លូវជាតិលេខ ៣៣ ប្រវែង ៥២,៥៧គ.ម, ផ្លូវជាតិ លេខ ៤១ ប្រវែង ៩៥,២៩គ.ម, ផ្លូវជាតិលេខ ៧១C ប្រវែង ១០១,៣៦គ.ម និងផ្លូវតភ្ជាប់ទៅក្រុងក្រចេះ ប្រវែង ៣១,៦៩គ.ម។ ទី២-ស្ពាន មានចំនួន ២ស្ពាន ប្រវែងសរុប២ ៦០៦,៧០មរួមមានស្ពានមេគង្គក្រចេះ ប្រវែង១៧៦១មនិងស្ពានចាក់អង្រែក្រោម-ព្រែកប្រាប្រវែង៨៤៥,​៧​០​ម។
• គម្រោងប្រើប្រាស់ថវិកាប្រទេសជប៉ុន៖ មាន១ខ្សែផ្លូវ ប្រវែង ៣៥,១៤គ.ម គឺកំណាត់ផ្លូវជាតិលេខ៥ ភាគកណ្ដាល (សិរីសោភ័ណ-ប៉ោយប៉ែត)។
• គម្រោងប្រើប្រាស់ថវិកាប្រទេសកូរ៉េខាងត្បូង៖ មាន ១ខ្សែផ្លូវ គឺផ្លូវជាតិលេខ៤៨ ប្រវែង ១៤៨គ.ម
• គម្រោងប្រើប្រាស់ថវិកាធនាគារអភិវឌ្ឍន៍អាស៊ី (ADB)៖ មាន ២ខ្សែផ្លូវ ប្រវែងសរុប ៤៣,២០គ.ម រួម មានផ្លូវជាតិលេខ២៣ ប្រវែង ១៩,៨៣គ.ម និងផ្លូវខេត្តលេខ៣១២ ប្រវែង ២៣,៣៧គ.ម។
• គម្រោងប្រើប្រាស់ថវិកាធនាគារពិភពលោក (WB)៖ មាន ៥ខ្សែផ្លូវ ប្រវែងសរុប ៣២៥,៧៥គ.ម រួមមាន ផ្លូវជាតិលេខ៤ ប្រវែង ១៩៦,១០គ.ម, កំណាត់ផ្លូវជាតិលេខ៧ ប្រវែង ៣១.២៥គ.ម, ផ្លូវជាតិលេខ ៧៣ ប្រវែង ៤៩,៨១គ.ម, ផ្លូវខេត្តលេខ៣៧៧ និង ៣៧៧A ប្រវែង ៤៨,៥៩គ.ម។