សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនចំនួន ៥ កំពុងរៀបចំរចនាសម្ព័ន្ធផលិតកម្ម ត្រៀមបើកដំណើរការរោងចក្រដំឡើងរថយន្តនៅកម្ពុជា ដោយក្នុងនោះរួមមាន ៖ ក្រុមហ៊ុន HGB Motors Assembly, ក្រុមហ៊ុន EM Automotive, ក្រុមហ៊ុន GTV Motor, ក្រុមហ៊ុន TOYOTA, និងក្រុមហ៊ុន China Matrix Technology ។ នេះបើតាមការថ្លែងរបស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅក្នុងពិធីសម្ពោធ “ពិព័រណ៍រថយន្ត (Auto Show) លើកទី១ ឆ្នាំ២០២៤” កាលពីចុងសប្តាហ៍ កន្លងទៅនៅរាជធានីភ្នំពេញ។
លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ឱ្យដឹងថា ៖ ក្រសួងពាណិជ្ជកម្ម បានខិតខំប្រឹងប្រែងក្នុងការចូលរួមលើកកម្ពស់វិស័យធុរកិច្ច និងវិនិយោគនៅកម្ពុជា តាមរយៈការរៀបចំកសាងលិខិតបទដ្ឋានគតិយុត្តិឱ្យស្របតាមបរិបទបទថ្មី សំដៅជួយសម្រួលដល់វិស័យឯកជន, ការដាក់ឱ្យដំណើរការនូវប្រព័ន្ធស្វ័យប្រវត្តិកម្ម, ការដាក់ឱ្យដំណើរការមជ្ឍមណ្ឌលទំនាក់ទំនងរវាងសាធារណៈជន និងមន្រ្តីផ្តល់សេវា (Call Center 1266) ដោយឥតគិតថ្លៃ, ព្រមទាំងការជំរុញការយកចិត្តទុកលើការពង្រឹងការការពារកម្មសិទ្ធិបញ្ញានៅកម្ពុជា សំដៅការពារ និងលើកកម្ពស់ការធ្វើធុរកិច្ចដោយស្មោះត្រង់ ប្រកបដោយភាពប្រកួតប្រជែងផងដែរ។
លោកជំទាវរដ្ឋមន្ត្រី បានលើកទឹកចិត្តដល់ធុរជន និងដៃគូវិនិយោគ ពិចារណាក្នុងការបណ្តាក់ទុនរកស៊ីឱ្យកាន់តែទូលំទូលាយ និងការបង្កើតមូលដ្ឋានផលិតកម្មនៅកម្ពុជា ដើម្បីទាញយកអត្ថប្រយោជន៍ជាច្រើនដែលកម្ពុជាកំពុងមាន រួមមាន ៖ កិច្ចព្រមព្រៀងពាណិជ្ជកម្មអាស៊ានបូក និងប្រព័ន្ធអនុគ្រោះពន្ធដែលកម្ពុជាទទួលបានពីប្រទេសអភិវឌ្ឍន៍ កិច្ចព្រមព្រៀងពាណិជ្ជសេរី និងក្របខណ្ឌនៃកិច្ចសម្រួលពាណិជ្ជកម្ម និងវិនិយោគថ្នាក់ជាតិ ព្រមទាំងមកវិនិយោគលើការបង្កើតរោងចក្រផលិតរថយន្តសម្រាប់ផ្គត់ផ្គង់ទីផ្សារក្នុងស្រុក និងនាំចេញ ជាពិសេស ការវិនិយោគលើវិស័យរថយន្តអគ្គិសនី (Electric Vehicles)។
អ្នកជំនាញអចលនទ្រព្យនៅកម្ពុជាបានលើកឡើងថា ពាក់ព័ន្ធទៅនឹងគម្រោងនៃការបណ្តាក់ទុនវិនិយោគពីសំណាក់បណ្តាក្រុមហ៊ុនធំៗទៅលើវិស័យយានយន្តនៅកម្ពុជា គឺសុទ្ធតែជាចំណែកមួយយ៉ាងសំខាន់នៅក្នុងការបើកឱកាសដល់ទីផ្សារអចលនទ្រព្យ ជាពិសេសផ្នែកដីធ្លី ទាំងតម្រូវការទីតាំងសាងសង់រោងចក្រដំឡើង ទាំងទីតាំងសម្រាប់កន្លែងស្នាក់នៅរបស់កម្មក-កម្មការិនី។ បន្ថែមពីលើនេះ នៅពេលវត្តមានក្រុមហ៊ុន និងរោងចក្រធំៗបង្ហាញវត្តមាន បណ្តាញហេដ្ឋារចនាសម្ព័ន្ធរួមមានដូចជាផ្លូវថ្នល់ បណ្តាញអគ្គិសនី និងបណ្តាញទឹកស្អាត នឹងត្រូវបានអភិវឌ្ឍន៍ ហើយទាំងអស់នេះក៏ជាកម្លាំងទាក់ទាញឱ្យមានការវិនិយោគ និងសាងសង់លំនៅដ្ឋានថ្មីៗនៅក្នុងតំបន់ផងដែរ៕
Account
Security
Favourite Content