សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បណ្ដាខេត្តដែលស្ថិតនៅប៉ែកពាយព្យនៃប្រទេសកម្ពុជា រួមមានពោធិ៍សាត់ បាត់ដំបង និងបន្ទាយមានជ័យ រំពឹងថានឹងទទួលបានការចាប់អារម្មណ៍លើការវិនិយោគនានា ជាពិសេសទៅលើវិស័យឧស្សាហកម្ម រោងចក្រ កែច្នៃ និងផលិតនូវទំនិញនានា ខណៈដែលខេត្តទាំងនេះក៏ជាគោលដៅនៃការអភិវឌ្ឍប៉ូលសេដ្ឋកិច្ចរបស់រាជរដ្ឋាភិបាលនៃព្រះរាជាណាចក្រកម្ពុជា។
ខេត្តពោធិ៍សាត់ បាត់ដំបង និងខេត្តបន្ទាយមានជ័យ ជាតំបន់ដែលទទួលបាននូវការអភិវឌ្ឍថ្មីៗដែលក្នុងនោះរួមមានហេដ្ឋារចនាសម្ព័ន្ធផ្លូវថ្នល់ តភ្ជាប់ពីប៉ូលសេដ្ឋកិច្ចភ្នំពេញទៅកាន់ព្រំដែនកម្ពុជា-ថៃ ច្រកប៉ោយប៉ែត និងបន្តភ្ជាប់ទៅកាន់ទឹកដីថៃ ដែលងាយស្រួលក្នុងការដឹកជញ្ជូនវត្ថុធាតុដើមពីក្រៅប្រទេសមកផលិត កែច្នៃ និងដឹកចេញត្រលប់ទៅវិញ ។ ក្រៅពីនេះ ច្រកអន្តរជាតិថ្មី បានណងអៀន ក្នុងខេត្តបន្តាយមានជ័យ ក៏ជាសមិទ្ធផលថ្មីជួយសម្រួល និងពន្លឿនដល់ការដឹកចេញ-ចូលនូវទំនិញពីកម្ពុជាទៅប្រទេសថៃ និងពីប្រទេសថៃចូលទឹកដីប្រទេសកម្ពុជាវិញ ។
នៅក្នុងតំបន់នេះដែរ គេក៏សង្កេតឃើញមានការអភិវឌ្ឍទៅលើថាមពលអគ្គិសនីជាច្រើនកន្លែងផងដែរ ជាពិសេសទៅលើថាមពលស្អាត ដូចជាថាមពលអគ្គិសនីដើរដោយពន្លឺព្រះអាទិត្យ និងថាមពលអគ្គិសនីពីប្រភពវារីអគ្គិសនីជាដើម ដែលជាការសម្រួលដល់ការវិនិយោគពីសំណាក់វិនិយោគិនដែលមានបំណងបោះទុនវិនិយោគនៅក្នុងតំបន់នេះ ។
បើតាមអ្នកជំនាញនៃវិស័យអចលនទ្រព្យ លោកស្រី អាន សុធីតា នាយិកាប្រតិបត្តិនៃក្រុមហ៊ុន PropNex Cambodia ធ្លាប់បានលើកឡើងថា តំបន់នៅតាមបណ្ដោយផ្លូវជាតិលេខ៥ នឹងទទួលបានការវិនិយោគបន្ថែម ជាពិសេសទៅលើរោងចក្រឧស្សាហកម្ម កែច្នៃ និងផលិតទំនិញនានា ពីព្រោះវាជាតំបន់ដែលមានភាពងាយស្រួលក្នុងការដឹកជញ្ជូនទំនិញចេញ-ចូលប្រទេស ។ ម្យ៉ាងទៀត តំបន់នេះក៏នៅមានទីតាំងដីទំនេរច្រើន ដែលងាយស្រួលក្នុងស្វែងរកទីតាំងវិនិយោគពីសំណាក់វិនិយោគិន ហើយវាក៏នឹងអាចផ្ដល់ឱកាសការងារដល់ប្រជាពលរដ្ឋនៅតាមបណ្ដាខេត្តជាប់ផ្លូវជាតិលេខ៥នេះដែរ។
សក្ដានុពលនៃការវិនិយោគនៅតំបន់ទាំងនេះនឹងជំរុញសកម្មភាពទិញដលក់ដីធ្លីបានល្អប្រសើរឡើងវិញ ស្របនឹងចរន្តនៃការទិញលក់ដីធ្លីក្នុងរយៈពេលប៉ុន្មានឆ្នាំកន្លងមកនេះ ជាពិសេសតាំងពីកម្ពុជាក៏ដូចជាពិភពលោកបានជួបនឹងវិបត្តិកូវីដ១៩មកម្ល៉េះ ។
គួរបញ្ជាក់ថា គោលនយោបាយរបស់រាជរដ្ឋាភិបាលបានអភិវឌ្ឍន៍ហេដ្ឋារចនាសម្ព័ន្ធរួមមានផ្លូវថ្នល់ ផ្លូវដែក ផ្លូវទឹកខ្វាត់ខ្វែង ដើម្បីជំរុញសកម្មភាពទេសចរណ៍ ការវិនិយោគ និងការធ្វើដំណើររបស់ប្រជាពលរដ្ឋពីតំបន់មួយទៅតំបន់មួយ។ ការអភិវឌ្ឍហេដ្ឋារចនាសម្ព័ន្ធទាំងនេះ ក៏បានហុចផលជាបន្តបន្ទាប់ដល់កម្ពុជាលើការទាក់ទាញការវិនិយោគនានាពីក្នុង និងក្រៅប្រទេស ជាក់ស្ដែងហេដ្ឋារចនាសម្ព័ន្ធផ្លូវដែលរាជរដ្ឋាភិបាលបានអភិវឌ្ឍន៍កន្លងមកជាដើម ឃើញមានការវិនិយោគជាបន្តបន្ទាប់ និងកាន់តែទាក់ទាញបន្ថែមទៀតនាពេលអនាគត៕
Account
Security
Favourite Content