អាជីវកម្មបរិយាបន្ន ឬ Inclusive Business ថ្វីត្បិតតែជាពាក្យដែលមិនសូវទទួលបានការចាប់អារម្មណ៍ពីសំណាក់ពលរដ្ឋទូទៅនៅឡើយក្តី ប៉ុន្តែនាថ្ងៃអនាគតវានឹងក្លាយទៅជាចំណែកដ៏សំខាន់ក្នុងការអភិវឌ្ឍប្រទេសប្រកបដោយចីរភាព ជាពិសេសជួយជំរុញផែនការរបស់កម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ផងដែរ។

មានការពន្យល់យ៉ាងច្រើនពីសំណាក់អ្នកជំនាញ ក៏ដូចជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍(MISTI) ប៉ុន្តែដោយសារតែវាជាគោលនយោបាយថ្មីចុងក្រោយមួយដែលនឹងត្រូវយកមកផ្សព្វផ្សាយ ដូច្នេះហើយបច្ចុប្បន្ននេះ ម្ចាស់អាជីវកម្មនានាហាក់ដូចជាមិនទាន់ជ្រាបច្បាស់ទាំងស្រុងនូវឡើយថា តើអ្វីទៅជាបរិយាបន្នអាជីវកម្ម ហើយថាវាមានលក្ខណៈ និងអត្ថប្រយោជន៍យ៉ាងណាខ្លះចំពោះសង្គមជាតិ។

មានការបកស្រាយដោយសង្ខេបចេញពីក្រសួងឧស្សាហកម្ម ដែលអាចពណ៍នានូវអាជីវកម្មបរិយាបន្នថា ជាអាជីវកម្មទាំងឡាយណាដែលមានប្រព័ន្ធប្រតិបត្តិអាជីវកម្មតូច ឬធំក្តីដើម្បីស្វែងរកប្រាក់ចំណូល ប៉ុន្តែដាច់ខាតត្រូវតែចូលរួមក្នុងការលើកកំពស់ និងផ្តល់ការងារ ក៏ដូចជាប្រាក់ចំណូលបន្ថែមជូនដល់ពលរដ្ឋក្រីក្រ ឬ ពិការភាពដោយស្មើភាពគ្នា ដែលធ្វើយ៉ាងណាប្រាកដថាឲ្យពួកគេទទួលបាននូវជីវភាពល្អប្រសើរជាងមុន។

បន្ថែមពីនេះអាជីវកម្មបរិយាបន្នត្រូវតែស្ថិតនៅក្នុងភាពទទួលខុសត្រូវចំពោះសង្គម និងបរិស្ថានផងដែរ ដែលជាការផ្តល់ផលប្រយោជន៍ត្រឡប់មកវិញ និងធ្វើយ៉ាងណាអភិវឌ្ឍអាជីវកម្មរបស់ខ្លួនឲ្យរីកធំធាត់ឡើងព្រមគ្នាជាមួយនឹងទំនួលខុសត្រូវ ដើម្បីអាចឈានទៅដល់ការជួយដល់រដ្ឋាភិបាលសម្រេចឲ្យបាននូវការអភិវឌ្ឍប្រទេសជាតិប្រកបដោយនិរន្តភាព។

ជាមួយគ្នានេះ ដើម្បីឲ្យកាន់តែច្បាស់បន្ថែមទៀត ខាងក្រោមនេះគឺជាគំរូអាជីវកម្មលំដាប់អន្តរជាតិមួយចំនួនដែលត្រូវបានណែនាំដោយ The Enabling Villiage ក្នុងនាមជាសហគមន៍អាជីវកម្មបែប Inclusive Business Community ដ៏ធំមួយរបស់សិង្ហបុរី ហើយក៏មានសាខានៅប្រទេសចិនផងដែរ។

១.Starbucks៖ ហាងកាហ្វេដ៏ល្បីល្បាញនេះបានជួលបុគ្គលិកដែលមានជំងឺអូទីស្សឹម (Autistic)ដើម្បីបម្រើការងារនៅទីតាំងហាងចំនួន២របស់ខ្លួនក្នុងប្រទេសសិង្ហបុរី និងបានផ្តល់ការហ្វឹកហាត់ជំនាញឆុងកាហ្វេដូចទៅនឹងបុគ្គលិកទូទៅ

២.New Rasa Singapura៖ ភោជនីយដ្ឋានដែលស្ថិតនៅក្នុងតំបន់ Tanglin ប្រទេសសិង្ហបុរី កំពុងមានភាពល្បីល្បាញ ដោយសារតែក្រុមហ៊ុនបានជ្រើសយកអាជីវកម្មបរិយាបន្នដោយការជួលបុគ្គលិកដែលមានបញ្ហាកាយសម្បាទា, អ្នកមានជំងឺបាក់ទឹកចិត្ត ឬសូម្បីតែមនុស្សចាស់ក៏ស្ថិតក្នុងជម្រើសផងដែរ។ នៅទីនេះពួកគេអាចធ្វើការងារទៅតាមពេលវេលាដែលពួកគេជ្រើសរើសបាន ហើយការងារត្រូវបានបែងចែកទៅជាចំណែកតូចៗ ងាយៗ ឲ្យពួកគេអាចធ្វើការបានយ៉ាងមានប្រសិទ្ធភាព

៣.Uniqlo៖​ ហាងលក់សម្លៀកបំពាក់ដ៏ល្បីរបស់ជប៉ុននេះក៏ស្រដៀងគ្នាដែរតាមរយៈការជួលបុគ្គលិកដែលមានបញ្ហាស្មារតីក្នុងការចូលរួមការងារកាត់ដេរក្រោយទទួលបានការហ្វឹកហាត់យ៉ាងត្រឹមត្រូវពីក្រុមការងារ។ Uniqlo បានរៀបចំប្រព័ន្ធការងារបានយ៉ាងល្អ ហើយធានាថាបុគ្គលិកនឹងទទួលបានការយកចិត្តទុកដាក់យ៉ាងល្អប្រសើរក្នុងពេលធ្វើការងារ។ក្រុមហ៊ុននេះក៏តែងតែបានចូលរួមការងារសង្គមមួយចំនួនផងដែរដូចជាការផ្តល់នូវបណ្ណចំណាយ១០០ដុល្លារទៅឲ្យសិស្សសាលាក្នុងការចំណាយនៅហាងរបស់ខ្លួន ដោយពុំចាំបាច់ឲ្យពួកគេស្ថិតនៅក្រោមការសម្រេចចិត្តពីឪពុកម្តាយឡើយជាដើម

៤.Personalised Love៖ ហាងលក់វត្ថុអនុស្សាវរីយដែលធ្វើដោយដៃ និងច្នៃចេញពីក្រុមយុវជនដែលត្រូវការជំនួយស្មារតីដោយប្តូរមកវិញនូវប្រាក់ចំណូលសមរម្យ ព្រមទាំងសេវាថែទាំងសុខភាពជាប្រចាំមួយចំនួនទៀតផងដែរ

៥.Diginity Kitchen៖ នៅទីនេះអាចជាភោជនីយដ្ឋានដំបូងបំផុតហើយដែលអតិថិជនអាចទទួលសេវាកម្មពីបុគ្គលិកដែលស្ថិតនៅលើកៅអី(ជនពិការ) ចំណែកឯគណនេយ្យករ ឬអ្នកគិតលុយវិញគឺជាអ្នកមានបញ្ហាភ្នែក ហើយចុងភៅជាក្រុមមនុស្សដែលមានបញ្ហាថ្លង់ គ ជាដើម។ ក្រុមមនុស្សទាំងនោះទទួលបានការហ្វឹកហាត់ជាមុនយ៉ាងត្រឹមត្រូវ និងអាចយកជំនាញទៅបង្រៀនបន្តទៀត ហើយបច្ចុប្បន្នភោជនីយដ្ឋាននេះមាន៣ទីតាំងនៅក្នុងប្រទេសសិង្ហបុរី ។

ទោះបីជាយ៉ាងណាក្តី ការក្លាយខ្លួនជាអាជីវកម្មបរិយាបន្នថ្វីត្បីតតែមិនសូវជាអាចស្វែងរកប្រាក់ចំណូលច្រើនដូចជាអាជីវកម្មផ្សេងទៀតក្តី ប៉ុន្តែពួកគេជានិច្ចកាលនឹងអាចទទួលបានការគាំទ្រយ៉ាងខ្លាំងពីសំណាក់រដ្ឋាភិបាល និងអង្គការផ្តល់កម្ចីនានាដើម្បីធានាឲ្យអាជីវកម្មមាននិរន្តភាព និងមានលទ្ធភាពក្នុងការពង្រីកអាជីវកម្មនេះឲ្យកាន់តែធំឡើងតាមរយៈមូលនិធី និងកម្ចីច្រើនរូបភាព៕