សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របពេលរោងចក្រជាង៥០ម៉ឺនរោងចក្រនឹងរើចេញពីប្រទេសចិនទៅរកទីតាំងថ្មីដើម្បីគេចពីការជាប់ពន្ធរបស់អាម៉េរិក កម្ពុជា រំពឹងថានឹងអាចទទួលបានចំណែកមួយនៃចំនួនរោងចក្រដែលរើចេញពីចិន ហើយប្រសិនបើជារោងចក្រទាំងនោះមកដាក់ទុនវិនិយោគនៅកម្ពុជានឹងធ្វើឱ្យតម្រូវការនៃការប្រើប្រាស់ដីមានកំណើនខ្ពស់ ។
យោងតាមលេខាធិការដ្ឋានផែនការខេត្តជាប់សមុទ្រកម្ពុជា បានបង្ហាញពីសុទិដ្ឋិនិយមថា ចរន្តនៃការផ្លាស់ទីរោងចក្រពីប្រទេសចិន នឹងជំរុញឱ្យកម្ពុជាក្លាយជាគោលដៅវិនិយោគវិស័យឧស្សាហកម្មកាន់តែខ្លាំងឡើង បើទោះបីជាពន្ធលើការនាំចេញទំនិញពីកម្ពុជាទៅសហរដ្ឋអាម៉េរិកមានអត្រា១៩ភាគរយក៏ដោយ ។ លើសពីនេះ កម្ពុជា មានកម្លាំងពលកម្មគ្រប់គ្រាន់ ជាពិសេសកម្លាំងពលកម្មជិត ១លាននាក់បន្ថែមទៀតដែលទើបត្រលប់មកពីប្រទេសថៃ ។ នេះគឺជាពេលវេលាដ៏ល្អបំផុតក្នុងការចាប់យករលកនៃការវិនិយោគនៅកម្ពុជា ។
ដោយឡែ ចំពោះបណ្ដាខេត្តមួយចំនួនដែលត្រូវបានរំពឹងថានឹងទទួលការវិនិយោគបន្ថែមពីការស្វែងរកទីតាំងថ្មីនៃរោងចក្រដែលរើចេញពីប្រទេសចិន រួមមានដូចជា ខេត្តស្វាយរៀង ខេត្តកំពង់ស្ពឺ តាកែវ ភ្នំពេញ និងបណ្ដាខេត្តជាប់ឆ្នេរសមុទ្រនៃព្រះរាជាណាចក្រកម្ពុជា ដូចជា កែប កំពត កោះកុង និងខេត្តព្រះសីហនុ ព្រោះខេត្តទាំងនេះ មានការវិនិយោគស្រាប់លើឧស្សាហកម្មរោងចក្រ ជាពិសេស វិស័យកាត់ដេរសម្លៀកបំពាក់ និងរោងចក្រកម្មន្តសាល ។
លោក វណ្ណ ធី អ្នកជំនាញក្នុងវិស័យអចលនទ្រព្យមួយរូបប្រចាំខេត្តព្រះសីហនុ បានលើកឡើងថា ចាប់តាំងពីរាជរដ្ឋាភិបាលបានដាក់ចេញនូវកម្មវិធីពិសេសដើម្បីជំរុញការវិនិយោគខេត្តព្រះសីហនុ បានកត់សម្គាល់ឃើញថា ខេត្តនេះចាប់ផ្ដើមទទួលបានការវិនិយោគថ្មីៗជាបន្តបន្ទាប់ ដោយក្នុងក្រុងមានការវិនិយោគលើអគារខ្ពស់ៗ ហើយអគារជាប់គាំងជាច្រើនក៏បានដំណើរការឡើងវិញ ខណៈនៅតំបន់ជាយក្រុង ដូចជា ព្រៃនប់ ស្ទឺងហាវ និងក្រុងកំពង់សោម មានការវិនិយោគលើរោងចក្រឧស្សាហកម្ម ជាពិសេស ការវិនិយោគលើតំបន់សេដ្ឋកិច្ចពិសេស ។
លោក ប៉ូ អ៊ាវគង់ អគ្គនាយកក្រុមហ៊ុន អចលនទ្រព្យ Advance បានមានប្រសាសន៍ឱ្យដឹងថា ពាក់ព័ន្ធនឹងការរើរោងចក្រចេញពីប្រទេសចិន បើសិនជារោងចក្រទាំងនោះចូលមកកម្ពុជាត្រឹមតែ ៥ ឬ ក៏ ១០ភាគរយ ក៏ឃើញថាមានចំនួនច្រើនដែរ ហើយឧទាហរណ៍ថា រោងចក្រមួយប្រើប្រាស់ដីត្រឹមតែ ១ហិកតា ឬ ០,៥ហិកតា ក៏ឃើញថាត្រូវការដីសម្រាប់ប្រើប្រាស់ រាប់ម៉ឺនហិកតាដែរ ប៉ុន្តែទីតាំងដីដែលត្រូវប្រើប្រាស់សម្រាប់សាងសង់រោងចក្រត្រូវតែជាដីដែលមានតម្លៃទាបក្នុងរង្វង់១០ដុល្លារអាម៉េរិកក្នុងមួយម៉ែត្រការ៉េ ។
លោក ប៉ូ អ៊ាវគង់ ក៏បានសម្លឹងមើលបណ្ដាខេត្តដែលមានសក្ដានុពល និងទទួលបានការវិនិយោគបន្ថែមពីចិន រួមមាន ខេត្តកំពង់ស្ពឺ ខេត្តកំពត តាកែវ ក្រុងព្រះសីហនុ ពីព្រោះបណ្ដាខេត្តទាំងនេះ ស្ថិតនៅជិតកំពង់ផែទឹកជ្រៅរបស់កម្ពុជា ហើយមានហេដ្ឋារចនាសម្ព័ន្ធស្អាតល្អ ដែលងាយស្រួលក្នុងការដឹកជញ្ជូនទំនិញចេញ និងចូលរោងចក្រ និងទៅកាន់ទីផ្សារក្រៅប្រទេសវិញ ៕
Account
Security
Favourite Content