សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីអំឡុងឆ្នាំ២០២០ រហូតមកដល់ឆ្នាំ២០២៣នេះ ស្ថានភាពអចលនទ្រព្យក្នុងប្រទេសកម្ពុជា ក៏ដូចជាពិភពលោកទាំងមូលបានជួបវិបត្តិ ប៉ុន្តែសម្រាប់តំបន់មួយក្នុងខណ្ឌសែនសុខ រាជធានីភ្នំពេញ ត្រូវបានគេមើលឃើញថានៅតែបន្តមានការទិញលក់ជាបន្តបន្ទាប់ និងរំពឹងថាអាចជំរុញការអភិវឌ្ឍអចលនទ្រព្យក្នុងតំបន់នោះកាន់តែមានសន្ទុះមួយកម្រិតទៀត។
លោកឧកញ៉ា សំ សុខនឿន អគ្គនាយកក្រុមហ៊ុនអចលនទ្រព្យ KW Sam SN បានមានប្រសាសន៍តាមទូរសព្ទឱ្យដឹងថា តំបន់ជុំវិញរមណីយដ្ឋានបឹងបៃតង ស្ថិតក្នុងសង្កាត់ភ្នំពេញថ្មី និងសង្កាត់ឃ្មួញ ខណ្ឌសែនសុខ នៅតែមានចលនានៃការទិញលក់អចលនទ្រព្យដដែល ហើយមានសកម្មភាពខ្លាំងជាងគេ ដែលនឹងធ្វើឱ្យតំបន់នេះមានការអភិវឌ្ឍខ្លាំងនាពេលបច្ចុប្បន្ន និងបន្តទៅថ្ងៃអនាគតខាងមុខ។
លោកឧកញ៉ាបន្តថា៖
“អ្វីៗដែលជំរុញតំបន់នេះ នៅតែមានការទិញលក់ខ្លាំង ទោះស្ថិតនៅក្នុងវិបត្តិនៃជំងឺកូវីដ១៩ និងវិបត្តិនៃសង្គ្រាមរវាងរុស្ស៊ី -អ៊ុយក្រែនក៏ដោយ ដោយសារតែតំបន់នេះ តម្លៃដីនៅមានកម្រិតទាបបើធៀបនឹងតំបន់ផ្សេងទៀតក្នុងរាជធានីភ្នំពេញ ។ តម្លៃដីនៅតំបន់នេះស្ថិតនៅក្នុងរង្វង់ចន្លោះពី ២៥០ដុល្លារ ទៅ ៣០០ដុល្លារអាមេរិកក្នុងមួយម៉ែត្រការ៉េ។ តំបន់នេះ កំពុងទាក់ទាញទៅលើការអភិវឌ្ឍជាលំនៅឋានតម្លៃមធ្យមឡើងទៅ ដែលជាការអភិវឌ្ឍសម្រាប់អ្នកមានចំណូលមធ្យម ទៅចំណូលខ្ពស់ គឺអត់មានផ្ទះសម្រាប់ចំណូលទាបនោះទេ។”
លោកឧកញ៉ាបានបន្ថែមថា កត្តាសំខាន់មួយទៀតដែលធ្វើឱ្យតំបន់នេះទាក់ទាញការវិនិយោគ និងមានការទិញលក់អចលនទ្រព្យច្រើននោះ ពីព្រោះថាតំបន់នេះសំបូរទៅដោយហេដ្ឋារចនាសម្ព័ន្ធដែលទើបអភិវឌ្ឍន៍ថ្មីខ្វាត់ខ្វែង ដែលជាការសម្រួលដល់ការធ្វើដំណើររបស់ប្រជាពលរដ្ឋក្នុងតំបន់ និងប្រជាពលរដ្ឋឆ្លងកាត់តំបន់នោះ។ លោកឧកញ៉ាបានបញ្ជាក់ផងដែរថា តំបន់នេះនៅពេលអនាគត នឹងត្រូវក្លាយជាតំបន់លំនៅឋានលំដាប់អភិជន ហើយសម្រាប់ផ្សារនៅតាមបណ្ដោយផ្លូវអ្នកឧកញ៉ាម៉ុង ឬទ្ធី នាពេលបច្ចុប្បន្ននេះ នឹងត្រូវរុះរើចេញដោយចំនួសមកវិញនូវសំណង់លំនៅឋាន៕
Account
Security
Favourite Content