សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា ឯកឧត្តម ហេង ប៊ុនគៀត អនុរដ្ឋលេខាធិការក្រសួងសុខាភិបាល បានស្នើឱ្យធុរជន និងវិនិយោគិនថៃ មកបណ្ដាក់ទុនវិនិយោគផលិតឱសថ និងភេសជ្ជៈ នៅកម្ពុជា ខណៈបច្ចុប្បន្ននេះ កម្ពុជាបាននាំចូលផលិតផលទាំងនេះច្រើនលើសលប់ ជាក់ស្ដែងគ្រាន់តែថ្នាំពេទ្យកម្ពុជាបាននាំចូលរហូតដល់៨០ភាគរយនៃតម្រូវការក្នុងមួយឆ្នាំៗ ។
ឯកឧត្តមមានប្រសាសន៍បែបនេះ នៅក្នុងព្រឹត្តិការណ៍ជំនួបធុរជនមួយដោយមានវិនិយោគិនធុរជនកម្ពុជា និងថៃជាច្រើនដោយក្នុងនោះឯកឧត្តមក៏បានសង្កត់ធ្ងន់ផងដែរថា កម្ពុជាកំពុងមានសក្ដានុពលខ្ពស់ក្នុងការទាក់ទាញការវិនិយោគ ។
ឯកឧត្តមបន្តថា វិនិយោគិនថៃ អាចមកចាប់ដៃគូជាមួយវិនិយោគិនកម្ពុជា និងបង្កើតជារោងចក្រ ផលិត-កែច្នៃនូវសម្ភារប្រើប្រាស់ ថ្នាំពេទ្យ និងភេសជ្ជៈ ស្របនឹងប្រទេសថៃ ជាប្រទេសដែលមានជំនាញក្នុងការផលិតលើផលិតផលទាំងនេះស្រាប់ ហើយកម្ពុជាជាទីផ្សារធំមួយសម្រាប់ផលិតផលទាំងនោះ ។
ឯកឧត្តមក៏បានស្នើឱ្យទូតថៃប្រចាំកម្ពុជាជំរុញវិនិយោគិនរបស់ខ្លួនចូលមកកម្ពុជា បណ្ដាក់វិនិយោគបង្កើតមន្ទីរពេទ្យក្នុងប្រទេសកម្ពុជា និងរោងចក្រផលិតថ្នាំពេទ្យ ដោយបច្ចុប្បន្ននេះ នៅកម្ពុជាមានរោងចក្រផលិតថ្នាំពេទ្យសរុបចំនួនតែ១៤រោងចក្រប៉ុណ្ណោះ ។
កាលពីប៉ុន្មានថ្ងៃមុននេះ ក្រុមវិនិយោគិនថៃមួយក្រុមក៏បានចូលមកដល់កម្ពុជា និងបានស្វែងរកឱកាសវិនិយោគនៅក្នុងប្រទេសកម្ពុជាជាពិសេសនៅតាមតំបន់សេដ្ឋកិច្ចពិសេសនានា នៅក្នុងរាជធានីភ្នំពេញ និងតាមបណ្ដាខេត្តសក្ដានុពលមួយចំនួន ។
អ្នកនាង អាន សុធីតា នាយិកាប្រតិបត្តិក្រុមហ៊ុន PropNex Cambodia បានលើកឡើងថា ក្នុងអំឡុងនៃវិបត្តិកូវីដ១៩ តាំងពីឆ្នាំ២០២១មក ឃើញថាវិនិយោគិនមកពីបណ្តាប្រទេសក្នុងតំបន់អាស៊ានចាប់ផ្ដើមចូលមកកម្ពុជាច្រើន ខណៈវិនិយោគិនចិនបានថមថយទៅវិញ ។
អ្នកនាងបន្តថា គម្រោងវិនិយោគថ្មីៗមកពីប្រទេសថៃ និងវៀតណាមឃើញថាបានចូលមកកម្ពុជាជាបន្តបន្ទាប់ ហើយរំពឹងថាការវិនិយោគមកពីប្រទេសទាំងនេះ នឹងមានចំនួនកាន់តែច្រើន ។
គួរបញ្ជាក់ថា ក្រៅពីការវិនិយោគ ថៃក៏ជាប្រទេសដែលមានចំនួនទេសចរចូលមកកម្ពុជាច្រើនជាងគេក្នុងរយៈពេលប៉ុន្មានឆ្នាំចុងក្រោយនេះ ជាក់ស្ដែងក្នុងឆមាសទី១ ឆ្នាំ២០២៣នេះ ថៃនៅតែជាប់ចំណាត់ទី១ជាប្រទេសដែលមានភ្ញៀវទេសចរចូលមកទស្សនាក្នុងប្រទេសកម្ពុជា ដោយមានចំនួនជាង ៨៧ម៉ឺននាក់ ខណៈវៀតណាមជាប់ចំណាត់ថ្នាក់លេខមានចំនួនជាង ៤៦ម៉ឺននាក់ និងចិនជាប់លេខ៣មានចំនួនជាង ២៦ម៉ឺននាក់ ៕
Account
Security
Favourite Content