សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ព្រឹត្តិការណ៍ប្រកួតកីឡាស៊ីហ្គេមដែលកម្ពុជាធ្វើជាម្ចាស់ផ្ទះនៅឆ្នាំ២០២៣នេះ កាន់តែជិតមកដល់ហើយ ដោយក្នុងនោះ ទាំងរដ្ឋាភិបាល និងវិស័យឯកជន បាន និងកំពុងមមាញឹកក្នុងការត្រៀមនូវរចនាសម្ព័ន្ធដើម្បីស្វាគមន៍ការមកដល់នៃកីឡាករ កីឡាការិនី ពីបណ្ដាប្រទេសផ្សេងៗចូលមកកម្ពុជា។
គម្រោងអគារ World bridge Sport village ដែលសាងសង់ឡើងក្នុងគោលបំណងធំសម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣នេះ គ្រោងនឹងបញ្ចប់នៅដំណាច់ខែមីនា ឆ្នាំ២០២៣នេះ រួចហើយប្រគល់ជូនរដ្ឋាភិបាលក្នុងការចាត់ចែងរៀបចំទទួលកីឡាករ កីឡាការិនី ដែលនឹងមកដល់នៅពេលឆាប់ៗខាងមុខសម្រាប់ការហ្វឹកហាត់ត្រៀមប្រកួត។
លោក ឆេ វិសិដ្ឋ អ្នកគ្រប់គ្រងម្នាក់នៅក្នុងគម្រោងនេះបានមានប្រសាសន៍ថា គម្រោងអគារសាងសង់ឡើងសម្រាប់ព្រឹត្តិការណ៍ស៊ីហ្គេមឆ្នាំ២០២៣នេះ ហើយ បើគិតមកដល់បច្ចុប្បន្នវាស្ទើរតែរួចរាល់ទាំងស្រុងទៅហើយ ដោយមានអគារខ្លះរួចរាល់ និងខ្លះទៀតនៅសល់ការងារតិចតួច ដែលត្រូវបញ្ចប់ទាំងស្រុងនៅដំណាច់ខែមីនា ឆ្នាំ២០២៣ ។ នៅពេលបញ្ចប់ហើយ ក្រុមហ៊ុននឹងប្រគល់ជូនរដ្ឋាភិបាលក្នុងការចាត់ចែងរៀបចំ ដើម្បីត្រៀមក្នុងព្រឹត្តិការណ៍កីឡាស៊ីហ្គេមនេះ។
លោកបន្តថា ៖
“ដើម្បីបញ្ចប់ការងារនេះឱ្យបានរួចរាល់នៅមុនព្រឹត្តិការណ៍មកដល់ ក្រុមហ៊ុនសាងសង់បានប្រើប្រាស់កម្មករប្រមាណជាង ៣ ០០០នាក់ និងត្រូវធ្វើការទាំងថ្ងៃនិងយប់ទៅតាមផ្នែកនីមួយៗ ហើយយើងក៏រំពឹងថាវានឹងបញ្ចប់ទៅផែនការ ឬអាចនឹងមុនផែនការតិចតួច យោងទៅតាមសន្ទុះការងារដែលកំពុងសម្រុកធ្វើនៅពេលបច្ចុប្បន្ន”
ក្រៅពីអគារមួយនេះ បើគេក្រឡេកទៅមើលហេដ្ឋារចនាសម្ព័ន្ធផ្សេងទៀត ដូចជា ផ្លូវជាតិលេខ៦អា ពីជ្រោយទៅកាន់ផ្លូវមហាវិថីឈ្នះឈ្នះ និងការសាងសង់ផ្លូវមហាវិថីឈ្នះឈ្នះពីស្ពានព្រែកព្នៅមកដល់ផ្លូវជាតិលេខ៦ គឺជុំវិញទីតាំងប្រារព្ធពិធីក៏ឃើញថាស្ទើរតែសម្រេចបានទាំងស្រុងហើយផងដែរថា ដើម្បីត្រៀមក្នុងការប្រកួតកីឡា និងដើម្បីសម្រួលដល់ការធ្វើដំណើររបស់កីឡាករ កីឡាការិនីក៏ដូចជាអ្នកចូលរួមទស្សនានៅពហុកីឡដ្ឋានជាតិមរតកតេជោ ។
ដោយឡែកស្ពានអាកាស ឬស្សីកែវ នៅលើផ្លូវជាតិលេខ៥ក៏បានដាក់ឱ្យប្រើប្រាស់សាកល្បងរួចហើយផងដែរ ដែលស្ពាននេះក៏ជារចនាសម្ព័ន្ធ មួយសម្រាប់សម្រួលដល់ការធ្វើដំណើរឆ្ពោះទៅកាន់ពហុកីឡដ្ឋានជាតិមរតកតេជោផងដែរ ខណៈដែលនៅមុនចូលឆ្នាំខ្មែរខាងមុខនេះ ស្ពានខ្សែកាបឆ្លងទន្លេពីឬស្សីកែវ ទៅកាន់ជ្រោយចង្វារក៏នឹងបញ្ចប់ការសាងសង់ ហើយក៏ជាសមិទ្ធផលសម្រាប់បម្រើដល់ការប្រកួតកីឡាស៊ីហ្គេមនេះនៅអំឡុងខែឧសភាខាងមុខនេះដែរ៕
Account
Security
Favourite Content