សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្លែងនៅក្នុងពិធីសម្ពោធកសិដ្ឋានចិញ្ចឹមគោយកទឹកដោះគីរីសួគ៌ ក្នុងស្រុកបាទី ខេត្តតាកែវ កាលពីព្រឹកថ្ងៃទី១១ ខែមេសា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋន្ត្រីនៃព្រះរាជាណាចក្រកម្ពុជា បានមានប្រសាសន៍ថា ព្រែកជីកហ្វូណនតេជោ មានប្រវែងប្រមាណ១៨០គីឡូម៉ែត្រ ប៉ុន្តែភាគច្រើនគឺជាផ្លូវទឹកដែលមានស្រាប់ ដែលត្រូវជីកពង្រីក ហើយសម្រាប់គម្រោងជីកដីនោះ គឺជីកតែប្រមាណ៧គីឡូម៉ែត្រប៉ុណ្ណោះ ។
សម្ដេចបានមានប្រសានស៍ថា ៖
«គម្រោងព្រែកជីកហ្វូណនតេជោ ប្រវែងប្រមាណ១៨០គីឡូម៉ែត្រនេះ មិនមែនជីកថ្មីទាំងអស់ទេ ដោយក្នុងនោះប្រវែង១៣៥គីឡូម៉ែត្រជាផ្លូវទឹកធម្មជាតិដែលមានស្រាប់ យើងគ្រាន់តែពង្រីកប៉ុណ្ណោះដោយមិនមានផលប៉ះពាល់ដល់ចរន្តទឹកឬបរិស្ថានឡើយ ។ គម្រោងព្រែកជីកនេះគឺយើងជីកថ្មីតែ៧គីឡូម៉ែត្រប៉ុណ្ណោះ ដូច្នេះយើងគ្រាន់តែពង្រីកផ្លូវទឹករបស់យើងឱ្យធំ សម្រាប់ងាយស្រួលនាវាចេញចូល ។ ក្នុងគម្រោងនេះដែរ ផ្លូវទឹកប្រវែង៣៥គីឡូម៉ែត្រ ដែលមានភាពកាច់កុងនិងកោងខ្លាំងពេក យើងត្រូវជីកតម្រង់វាធំបន្តិច ដូច្នេះវាអត់មានផលប៉ះពាល់នោះឡើយ»។
សម្ដេចធិបតីបានបន្តថា គម្រោងព្រែកជីកហ្វូណនតេជោ បានសិក្សាអស់រយៈពេល២៦ខែ ដោយមានចូលរួមសិក្សាស្រាវជ្រាវពីវិស្វករលំដាប់ពិភពលោកចំនួន៤០នាក់ មានការចូលរួមពីសាស្ត្រាចារ្យជំនាញៗលើពិភពលោក មានអ្នកជំនាញខាងជលសាស្ត្រ បរិស្ថានសង្គម សេដ្ឋកិច្ច ។ គម្រោងនេះនឹងជួយសេដ្ឋកិច្ចកម្ពុជានិងផ្ដល់អត្ថប្រយោជន៍ជាច្រើនដល់ប្រជាពលរដ្ឋ លើកកម្ពស់ជីវភាពប្រជាជន ហើយបើសិនជាធ្វើទៅនាំឱ្យពលរដ្ឋខាតនាំឱ្យពលរដ្ឋ និងសង្គមបាត់បង់ប្រយោជន៍គឺរដ្ឋាភិបាលមិនធ្វើនោះទេ ។
សម្ដេចបញ្ជាក់ថា ៖
« មុននឹងយើងធ្វើគម្រោងនេះ យើងបានគិតគូរដល់ផលប៉ះពាល់ដល់បរិស្ថាន ជីវភាពពលរដ្ឋ និងអនាគតនៃកូនចៅជំនាន់ក្រោយៗផងដែរ មិនមែនយើងគិតតែពីសេដ្ឋកិច្ចក្នុងរយៈពេលខ្លីនោះឡើយ » ។
សម្ដេចមហាបវរធិបតី ហ៊ុន ម៉ាណែត បានបន្ថែមថា នៅពេលគម្រោងព្រែកជីកហ្វូណនតេជោសង់រួចរាល់ នឹងធ្វើឱ្យការដឹកជញ្ជូនចំណាយតិចជាងមុន កសិផលរបស់កសិកកម្ពុជានឹងលក់បានចំណេញជាងមុន ពីព្រោះតែការដឹកជញ្ជូនអស់តិច ឈ្មួញនឹងហ៊ានឱ្យតម្លៃខ្ពស់ ។ ម្យ៉ាងទៀត ការដឹកជញ្ជូននៅក្នុងប្រទេសកម្ពុជានឹងកាន់តែសំបូរបែប ដោយពលរដ្ឋនិងភ្ញៀវទេសចរជាតិ អន្តរជាតិអាចមានជម្រើសច្រើនក្នុងការធ្វើដំណើរកម្សាន្តទៅកាន់ខេត្តកែប និងខេត្តកំពត ដោយអាចធ្វើដំណើរតាមកាណូត ឬតាមផ្លូវជាតិ ។
បើតាមភ្នាក់ងារទិញលក់ដីអចលនទ្រព្យ ដីធ្លី ប្រចាំខេត្តកំពត និងខេត្តកែប បានឱ្យដឹងថា ចាប់តាំងពីគម្រោងព្រែកជីកហ្វូណនប្រកាសថានឹងចាប់ផ្ដើមអភិវឌ្ឍន៍ និង បើកការដ្ឋាននៅពាក់កណ្ដាលឆ្នាំ២០២៤នេះ ឃើញថា សកម្មភាពនៃការទិញលក់ដីធ្លីនៅក្នុងខេត្តកែប ចាប់ផ្ដើមកម្រើក និងមានអ្នកស្វែងរកដីនៅក្នុងខេត្តកែបកាន់តែច្រើន ជាពិសេសឈ្មួ្ញដីធ្លី និងអ្នកអភិវឌ្ឍអចលនទ្រព្យមកពីខេត្តផ្សេងៗទៀត ។ ក្រៅពីនេះក៏មានវិនិយោគិនបរទេស ជាច្រើនចូលមកកាន់ទឹកដីខេត្តកំពតនិងកែប ជាបន្តបន្ទាប់ដើម្បីស្វែងរកការវិនិយោគបំពេញតម្រូវការនៅពេលអនាគតដ៏ខ្លីនេះ៕
Account
Security
Favourite Content