សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជំរុញសកម្មភាពទិញលក់អចលនទ្រព្យ និងសម្រួលបន្ទុកពលរដ្ឋនៅតាមតំបន់ដែលទើបបង្កើតជាសង្កាត់ និងក្រុងថ្មីនៅតាមបណ្ដាខេត្តមួយចំនួន រាជរដ្ឋាភិបាលដែលអគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ ជាសេនាធិការ បានសម្រេចលើកលែងពន្ធលើអចលនទ្រព្យ និងបន្ធូរបន្ថយលក្ខខណ្ឌលើកលែងពន្ធលើដីធ្លីមិនបានប្រើប្រាស់ ចំពោះអចលនទ្រព្យដែលមានផ្ទៃដីលើសពី៥ហិកតា ដែលប្រជាពលរដ្ឋកំពុងធ្វើកសិកម្មបង្កបង្កើន ។
យោងតាមសេចក្ដីជូនដំណឹងរបស់អគ្គនាយកដ្ឋានពន្ធដារ បានឱ្យដឹងថា រាជរដ្ឋាភិបាលបានសម្រេចបន្តការលើកលែងពន្ធលើអចលនទ្រព្យ ចំពោះសង្កាត់ និងក្រុងមួយចំនួន និងពន្យារការអនុវត្តប្រមូលពន្ធលើអចលនទ្រព្យចំពោះក្រុងដែលទើបតែបង្កើតថ្មី និងបន្ធូរបន្ថយលក្ខខណ្ឌលើកលែងពន្ធលើដីធ្លីមិនបានប្រើប្រាស់ និងចំពោះអចលនទ្រព្យមានផ្ទៃក្រឡាលើសពី៥ហិកតា ដែលប្រជាពលរដ្ឋកំពុងធ្វើកសិកម្មបង្កបង្កើនផល ។
បើតាមសេចក្ដីជូនដំណឹងនេះឱ្យដឹងថា សម្រាប់ពន្ធលើអចលនទ្រព្យ រដ្ឋនឹងបន្តលើកលែងពន្ធលើរហូតដល់ដំណាច់ឆ្នាំ២០២៥ ចំពោះអចលនទ្រព្យដែលស្ថិតនៅក្នុងសង្កាត់ចំនួន៤ ក្នុងក្រុងតាខ្មៅ រួមមាន សង្កាត់ស្វាយរលំ សង្កាត់កោះអន្លង់ចិន សង្កាត់សិត្បូ និងសង្កាត់រកាខ្ពស់ ដែលទើបកាត់មកពីស្រុកស្អាង និងស្រុកកណ្ដាលស្ទឹងខេត្តកណ្ដាល ។
ក្រៅពីតំបន់នេះ រដ្ឋក៏នឹងលើកលែងផងដែរ ចំពោះពន្ធលើអចលនទ្រព្យដែលស្ថិតនៅក្នុងក្រុងចំនួន ៤ រួមមាន ក្រុងឧដុង្គម៉ែជ័យ នៃខេត្តកំពង់ស្ពឺ ក្រុងអរិយក្សត្រ និងក្រុងសំពៅពូន នៃខេត្តកណ្ដាល និងក្រុងបូកគោ នៃខេត្តកំពត រហូតដល់ដំណាច់ឆ្នាំ២០២៥ ។ ដោយឡែកក្រុងចំនួន២ផ្សេងទៀត ដែលទើបបានបង្កើតថ្មីរួមមាន ក្រុងរុនតាឯកតេជោសែន នៃខេត្តសៀមរាប និងក្រុងកំពង់សោម ខេត្តព្រះសីហនុ ក៏ត្រូវបានលើកលែងពន្ធលើអចលនទ្រព្យរហូតដល់ដំណាច់ឆ្នាំ២០២៥ ។ ចាប់ពីឆ្នាំ ២០២៦តទៅ នឹងត្រូវអនុវត្តតាមច្បាប់ និងលិខិតបទដ្ឋានគតិយុត្តជាធរមាន ។
សម្រាប់ពន្ធលើដីធ្លីមិនបានប្រើប្រាស់ ក៏ត្រូវបានរដ្ឋាភិបាលប្រកាសលើកលែង ក្នុងនោះចំពោះអចលនទ្រព្យដែលមានផ្ទៃក្រឡាលើសពី៥ហិកតា និងនៅលើឯកសារកាន់កាប់ដី ( បណ្ណកម្មសិទ្ធិ ឬលិខិតផ្ទេរសិទ្ធិ ) ជាប្រភេទដីកសិកម្ម ឬដីលំនៅឋាន ឬដីមិនមានបញ្ជាក់រូបភាពប្រើប្រាស់ដី ប៉ុន្តែស្ថានភាពប្រើប្រាស់ដីធ្លីជាក់ស្ដែងត្រូវបានប្រជាពលរដ្ឋកំពុងធ្វើកសិកម្មបង្កបង្កើនផល តម្រូវឱ្យមានភ្ជាប់លិខិតអនុញ្ញាត ឬលិខិតបញ្ជាក់អំពីការប្រើប្រាស់ដីធ្លីកសិកម្មពីអាជ្ញាធរមូលដ្ឋាន ឬរដ្ឋបាលសារពើពន្ធ ។ ចំពោះការលើកលែងពន្ធលើដីធ្លីមិនបានប្រើប្រាស់នេះ ពុំមានអានុភាពប្រតិសកម្មចំពោះប្រាក់ពន្ធ និងទណ្ឌកម្មរដ្ឋបាល ដូចជា ពន្ធបន្ថែម និងការប្រាក់ដែលបានបង់រួចហើយនោះទេ ។
គួរបញ្ជាក់ថា កាលពីចុងឆ្នាំ២០២៤កន្លងទៅនេះដែរ រដ្ឋាភិបាលតាមរយៈអគ្គនាយកដ្ឋានពន្ធដារ ក៏បានប្រកាសលើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធ ឬសិទ្ធិកាន់កាប់អចលនទ្រព្យសម្រាប់អ្នកទិញលំនៅឋាន និង /ឬ ផ្ទេរកម្មសិទ្ធិជាលើកដំបូង រហូតដល់ដាច់ឆ្នាំ ២០២៥នេះដែរ ៕
Account
Security
Favourite Content