សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របពេលដែលអាកាសយានដ្ឋានអន្តរជាតិតេជោ នៅស្រុកកណ្ដាលស្ទឹង ខេត្តកណ្ដាល ជាប់ព្រំប្រទល់ស្រុកបាទី ខេត្តតាកែវ នឹងបើកដំណើរការហោះហើរជាផ្លូវការលើកដំបូងនៅថ្ងៃទី០៩ ខែកញ្ញា ឆ្នាំ២០២៥ តំបន់ដែលនៅតាមបណ្ដោយផ្លូវទៅកាន់អាកាសយានដ្ឋានដ៏ទំនើបមួយនេះ ជាពិសេសតាមតំបន់បណ្ដោយផ្លូវក្រវាត់ក្រុងទី៣ ក៏ដូចជាតំបន់ជុំវិញអាកាសយានដ្ឋាន រំពឹងថា នឹងមានសក្ដានុពលខ្ពស់ជាងមុន ជាមួយនឹងការកើនឡើងនៃតម្លៃដីធ្លីផងដែរ ។
អ្នកជំនាញនៃវិស័យអចលនទ្រព្យបានមើលឃើញថា ចាប់តាំងពីគម្រោងអាកាសយានដ្ឋានអន្តរជាតិតេជោផ្ដើមដំណើរការសាងសង់ បានជំរុញឱ្យតំបន់នៅជុំវិញនោះ មានភាពទាក់ទាញ និងការវិនិយោគបានមួយកម្រិតរួចទៅហើយ ជាក់ស្ដែង ឃើញមានគម្រោងអភិវឌ្ឍន៍លំនៅឋានជាច្រើនបានសាងសង់ឡើងដំណាលគ្នា ដើម្បីត្រៀមផ្គង់ផ្គង់ទីផ្សារក្នុងពេលដ៏ខ្លី។
អ្នកស្រី អាន សុធីតា អគ្គនាយិការក្រុមហ៊ុន PropNex Cambodia បានថ្លែងប្រាប់សារព័ត៌មាន AMS Economy ឱ្យដឹងថា បើទោះជាស្ថានភាពវិស័យអចលនទ្រព្យនៅក្នុងប្រទេសកម្ពុជាកំពុងជួបប្រទះនឹងបញ្ហាប្រឈមក្ដី ប៉ុន្តែសម្រាប់ការអភិវឌ្ឍនៅតំបន់ជុំវិញព្រលានយន្តហោះអន្តរជាតិតេជោ និងតំបន់នៅប៉ែកខាងត្បូងរាជធានីភ្នំពេញ នៅតែមានភាពទាក់ទាញ និងមានការអភិវឌ្ឍជាបន្តបន្ទាប់ ។
អ្នកស្រីបន្តថា សម្រាប់ការបើកដំណើរអាកាសយានដ្ឋានអន្តរជាតិតេជោនៅថ្ងៃទី០៩ ខែកញ្ញា ឆ្នាំ២០២៥នេះ រំពឺងថាអាចធ្វើឱ្យតំបន់នៅតាមបណ្ដោយផ្លូវឆ្ពោះទៅកាន់អាកាសយានដ្ឋាន មានភាពទាក់ទាញ និងទទួលបានការវិនិយោគបន្ថែមទៀត ។ ដោយឡែក សម្រាប់វិស័យដែលនឹងមានសក្ដានុពល ឬមានអាទិភាពក្នុងការអភិវឌ្ឍជាជំហានដំបូង គឺលំនៅឋាន ហើយបន្ទាប់មកគឺអគារពាណិជ្ជកម្ម ខណៈដែល បច្ចុប្បន្ននេះ មានគម្រោងលំនៅឋានជាច្រើនបានអភិវឌ្ឍន៍រួចទៅហើយដែលស្ថិតនៅជុំវិញទីតាំងនោះ ។
អ្នកស្រី អាន សុធីតា បានបញ្ជាក់ថា ៖
«សម្រាប់តំបន់នៅជុំវិញទីតាំងអាកាសយានដ្ឋានអន្តរជាតិចាស់ ក៏នឹងមិនមានការប្រែប្រួល ឬប៉ះពាល់អ្វីគួរឱ្យកត់សម្គាល់នោះទេ ផ្ទុយទៅវិញ តំបន់នោះអាចនឹងមានសក្ដានុពលបន្ថែមទៀត ពីព្រោះថា ទីតាំងអាកាសយានដ្ឋានចាស់ ជាកន្លែងដែលមានមនុស្សរស់នៅ ប្រកបអាជីវកម្មចម្រុះ និងមានអ្នកធ្វើដំណើរឆ្លងកាត់ទៅច្រើន ហើយក៏ជាតំបន់ដែលមានការអភិវឌ្ឍន៍ ដូច្នេះ ភាពទាក់ទាញទៅលើការវិនិយោគលក្ខណៈអាជីវកម្ម ពាណិជ្ជកម្មកណ្តាលក្រុងនឹងមានបន្ថែមទៀត» ។
ស្រដៀងគ្នានេះ អ្នកជំនាញ ក៏ដួចជាអ្នកអភិវឌ្ឍន៍វិស័យអចលនទ្រព្យជាច្រើនទៀត ក៏បានមើលឃើញដែរថា តំបន់ប៉ែកខាងត្បូងភ្នំពេញ ក៏មានភាពទាក់ទាញផងដែរ ដោយសារមានការអភិវឌ្ឍន៍លើហេដ្ឋារចនាសម្ព័ន្ធដែលវិនិយោគដោយរាជរដ្ឋាភិបាល ព្រមគ្នាជាមួយវិស័យឯកជន ដែលក្រៅពីមានគម្រោងអភិវឌ្ឍលំនៅដ្ឋានលក្ខណៈជាបុរី និងបណ្តុំផ្ទះល្វែង បណ្តុំវីឡា ក៏មានគម្រោងអភិវឌ្ឍន៍ជាផ្សារទំនើបជាហូរហែផងដែរ ហើយក្រោយពេលបើកដំណើរការអាកាសយានដ្ឋានអន្តរជាតិថ្មី នឹងកាន់តែជំរុញឱ្យតំបន់ទាំងនេះមានសក្ដានុពល ។
ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិល បានលើកឡើងថា អាកាសយានដ្ឋានអន្តរជាតិតេជោ បានត្រៀមខ្លួនរួចរាល់ក្នុងការបើកដំណើរការជាផ្លូវការនៅថ្ងៃទី០៩ ខែកញ្ញា ឆ្នាំ២០២៥ ដោយបច្ចុប្បន្នការហោះហើរសាកល្បងបានចប់សព្វគ្រប់ ហើយការរៀបចំសម្ភារៈ និងឧបករណ៍ ក៏បានបំពាក់រួចរាល់ រង់ចាំតែដល់ថ្ងៃផ្ទេរប្រតិបត្តិការពីអាកាសយានដ្ឋានចាស់ទៅអាកាសយានដ្ឋានថ្មីប៉ុណ្ណោះ ។
តាមរយៈការបើកប្រតិបត្តិការអាកាសយានដ្ឋានអន្តរជាតិតេជោ កម្ពុជារំពឹងទទួលបានភ្ញៀវទេសចរបរទេសតាមផ្លូវអាកាសកាន់តែច្រើនបន្ថែមទៀត ជាពិសេសអ្នកដំណើរឆ្លងកាត់អាកាសយានដ្ឋានអន្តរជាតិរបស់កម្ពុជាទៅកាន់អាកាសយានដ្ឋានអន្តរជាតិប្រទេសផ្សេងទៀត ពីព្រោះអាកាសយានដ្ឋានអន្តរជាតិថ្មីនេះ ជាអាកាសយានដ្ឋានធំជាងមុន អាចអនុញ្ញាតឱ្យយន្តហោះធំៗ និងជាប្រភេទយន្តហោះ ហោះឆ្លងទ្វីបចុះចតបានផងដែរ ៕
Account
Security
Favourite Content