សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទោះបីជាស្ថានភាពសេដ្ឋកិច្ចតំបន់ និងពិភពលោកហាក់មិនទាន់មានកំណើនប្រសើរឡើងក្ដី ប៉ុន្តែបើក្រលេកទៅមើលវិស័យអចលនទ្រព្យនៅក្នុងប្រទេសកម្ពុជាវិញ ឃើញថានៅតែមានភាពរឹងមាំ និងទទួលគម្រោងវិនិយោគជាហូរហែ ដែលធ្វើតម្រូវការនៃការប្រើប្រាស់ដីធ្លី នៅតែមាននិងអាចបង្កើតឱកាសការងារនិងទាក់ទាញគម្រោងវិនិយោគផ្សេងៗទៀត ។
បើតាមក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងរយៈពេល៨ខែ ដើមឆ្នាំ២០២៥ គម្រោងវិនិយោគចំនួន៤៩១ គម្រោងត្រូវបានអនុម័តចុះបញ្ជីជាផ្លូវការ ដែលគម្រោងទាំងជិត៥០០គម្រោងនេះ មានទុនវិនិយោគ ប្រមាណ៧,២ពាន់លានដុល្លារអាមេរិក ។
លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យAdvance បានមានប្រសាសន៍ថាតាមរយៈការវិនិយោគជាបន្តបន្ទាប់ ជាពិសេសទៅលើវិស័យឧស្សាហកម្ម បានធ្វើឱ្យមានតម្រូវការដីធ្លីសម្រាប់ប្រើប្រាស់ ដូចជាងសង់ឃ្លាំង រោងចក្រជាដើម ។ ទាំងនេះ ក៏អាចធ្វើឱ្យវិស័យអចលនទ្រព្យក្នុងប្រទេសកម្ពុជា ជាពិសេសដីធ្លី មានលំនឹង មានការប្រើប្រាស់ មានចរន្តទិញលក់ ទោះបីជាស្ថានភាពសេដ្ឋកិច្ចទាំងមូលមិនទាន់មានភាពល្អប្រសើរដូចមុនវិបត្តិក្ដី ។
លោកបន្តថា ថ្វីតែលំនៅឋាននិងការអភិវឌ្ឍផ្នែកផ្សេងនៃវិស័យអចលនទ្រព្យ ដូចជាអគារខ្ពស់ៗមិនមានច្រើន ប៉ុន្តែការវិនិយោគលើឧស្សាហកម្មរោងចក្រ សហគ្រាស កម្មន្តសាល ក៏បានធ្វើឱ្យដីធ្លីនៅកម្ពុជារក្សាលំនឹងបានមួយកម្រិត ប៉ុន្តែសម្រាប់ទីតាំងអភិវឌ្ឍន៍លើឧស្សាហកម្មទាំងនោះ ភាគច្រើននៅតាមបណ្ដាខេត្តនិងតំបន់ដែលមានតម្លៃដីទាប ដោយមិនផ្ដោតលើទីតាំងដែលមានតម្លៃដីខ្ពស់នោះទេ ។
លោកបានបញ្ជាក់ថា ជាមធ្យមរោងចក្រ១ត្រូវការដីយ៉ាងហោចណាស់ក៏កន្លះហិកតាទៅ១ហិកតាដែរ ដូច្នេះ ការវិនិយោគលើរោងចក្រកាន់តែច្រើនក៏ធ្វើឱ្យតម្រូវការដីសម្រាប់ប្រើប្រាស់ក៏កាន់តែច្រើន ហើយអាចជួយឱ្យតំបន់នោះក្លាយជាតំបន់ឧស្សាហកម្ម ។
យោងតាមលេខាធិការដ្ឋានតំបន់សេដ្ឋកិច្ចពិសេសគំរូពហុបំណងខេត្តជាប់ឆ្នេរសមុទ្រ បានបង្ហាញព័ត៌មានដ៏រសើបមួយថា រោងចក្រពីប្រទេសចិន៥០ម៉ឺន កំពុងត្រៀមខ្លួនរុះរើចេញពីប្រទេសចិន ទៅកាន់ប្រទេសផ្សេងទៀត ក្នុងនោះមាន២០ភាគរយបានរើចេញរួចហើយ ដោយក្នុងចំណោម២០ភាគរយនោះ ក៏មានមកកម្ពុជាដែរ ។ ការរុះរើរោងចក្រចេញពីចិននេះ ធ្វើឡើងតាំងពីមានទំនាស់ពាណិជ្ជកម្មរវាងសហរដ្ឋអាម៉េរិក និងចិន លើផ្នែកពន្ធគយ ។
សម្រាប់កម្ពុជាក្នុងឆ្នាំ ២០២៥នេះ សហរដ្ឋអាម៉េរិកបានកំណត់យកពន្ធ ១៩ភាគរយ លើទំនិញនាំចេញពីកម្ពុជាទៅអាម៉េរិក ហើយតួលេខនេះ ក៏ចាត់ទុកជាតួលេខមួយទាប បើធៀបជាមួយនឹងបណ្ដាប្រទេសផ្សេងក្នុងតំបន់ ដែលនឹងអាចទាក់ទាញការវិនិយោគបន្ថែមទៀតពីខាងក្រៅជាពិសេសប្រទេសចិន ។
ឯកឧត្តមស៊ុន ចាន់ថុល ឧបនាយករដ្ឋមន្ត្រីនិងអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានលើកឡើងថា ពន្ធបដិការរបស់អាម៉េរិក ១៩ភាគរយនេះ គឺជាតួលេខល្អ អាចទាក់ទាញការវិនិយោគមកកាន់ព្រះរាជាណាចក្រកម្ពុជា ដើម្បីផលិតហើយនាំចេញទៅកាន់ទីផ្សារអាម៉េរិក ក៏ដូចជាទីផ្សារប្រទេសផ្សេងៗទៀត ។
ឯកឧត្តមបានបញ្ជាក់ថាឆ្នាំ ២០២៥នេះ កម្ពុជាទទួលបានគម្រោងវិនិយោគច្រើនមិនធ្លាប់មាន ហើយបើធៀបនឹងឆ្នាំ ២០២៤កន្លងទៅ ត្រឹមរយៈពេលតែ ៨ខែ គម្រោងវិនិយោគនិងទុនវិនិយោគ មានចំនួនច្រើនជាងឆ្នាំ ២០២៤ពេញមួយឆ្នាំទៅហើយ ។ នេះក៏ជាលទ្ធផលនៃការដើរទាក់ម៉ូយពីសំណាក់ថ្នាក់ដឹកនាំកម្ពុជានាពេលកន្លងមកនេះផងដែរ ៕
Account
Security
Favourite Content