សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងរយៈពេលចុងក្រោយនេះ ក្រុងចំនួនពីរនៅក្នុងប្រទេសកម្ពុជា គឺក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ ត្រូវបានគេមើលឃើញថា មានសន្ទុះលើការវិនិយោគក្នុងវិស័យអចលនទ្រព្យគួរឱ្យកត់សម្គាល់ ដោយសំណង់អគារខ្ពស់ទាបថ្មីៗជាច្រើនកំពុងសាងសង់ និងកំពុងដំណើរការកាន់តែច្រើន។
ការវិនិយោគនៅក្រុងទាំងពីរនេះ មានសកម្មភាពកាន់តែខ្លាំងបន្ទាប់ពីមានវត្តមានជនបរទេស ជាពិសេសជនជាតិចិនសម្រុកទៅកាន់ទីនោះកាន់តែច្រើននៅក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងឆ្នាំ២០២៤ និងដើមឆ្នាំ២០២៥ នេះតែម្ដង ដែលធ្វើឱ្យតម្រូវការនៃការប្រើប្រាស់អគារ និងអចលនវត្ថុផ្សេងទៀតមានកំណើន។
អ្នកផ្គត់ផ្គត់សម្ភារៈសំណង់ និងគ្រឿងបង្គុំសំណង់នៅក្នុងប្រទេសកម្ពុជាបានបញ្ជាក់ថា ការអភិវឌ្ឍសំណង់ថ្មីៗនៅក្នុងក្រុងទាំងពីរនេះកំពុងមានកំណើនខ្ពស់ ធ្វើឱ្យតម្រូវការសម្ភារៈសំណង់មានការកើនឡើង ខណៈដែលអ្នកផ្គត់ផ្គង់សំណង់មួយចំនួនក៏ផ្ដោតលើការផ្គត់ផ្គង់តែក្រុងពីរនោះប៉ុណ្ណោះ ដើម្បីបំពេញទៅតាមតម្រូវការអ្នកសាងសង់ ។
អគ្គលេខាធិការសមាគមឧស្សាហកម្មស៊ីម៉ង់ត៏កម្ពុជា លោក ពុត ចន្ដារិទ្ធ បានថ្លែងថា នៅរយៈពេលចុងក្រោយនេះ តំបន់តាមព្រំដែន ជាពិសេសក្រុងប៉ោយប៉ែត ខេត្តបន្ទាយមានជ័យ និងក្រុងបាវិតខេត្តស្វាយរៀង ពិតជាមានការអភិវឌ្ឍសំណង់ច្រើនជាងមុនពិតមែន ហើយអ្នកផ្គត់ផ្គង់ស៊ីម៉ង់ត៏ក៏បានផ្គត់ផ្គង់ទៅក្រុងទាំងនេះបន្ថែមទៀតដើម្បីបំពេញតម្រូវការ ។
លោក សន សៀប ប្រធាសមាគមអ្នកវាយតម្លៃ និងភ្នាកងារអចលនវត្ថុកម្ពុជា បានលើកឡើងថា ក្នុងឆ្នាំ២០២៥នេះ វិស័យអចលនទ្រព្យអាចនឹងងើបឡើងវិញដោយផ្នែកខ្លះ ក្នុងនោះ ផ្នែកឧស្សាហកម្ម តំបន់សេដ្ឋកិច្ចពិសេស នឹងមានភាពល្អប្រសើរ ហើយអ្នកវិនិយោគលើឧស្សាហកម្ម ដូចជា ឃ្លាំង រោងចក្រ និងតំបន់សេដ្ឋកិច្ចពិសេស នឹងទទួលបានផលចំណេញពីការវិនិយោគ ។
លោកបន្តថា តំបន់ព្រំដែន ជាពិសេសបាវិត និងប៉ោយប៉ែត កំពុងមានសកម្មភាពពុះកញ្ច្រោលខ្លាំង លើវិស័យអចលនទ្រព្យ ដោយសារតែតំបន់ទាំងពីរជាប់ជាមួយប្រទេសជិតខាង ក្នុងនោះបាវិតជាប់ជាមួយនឹងប្រទេសវៀតណាម ហើយប៉ោយប៉ែតជាប់ជាមួយប្រទេសថៃ ដែលងាយស្រួលក្នុងការដឹកជញ្ជូនទំនិញចេញ និងចូលប្រទេសកម្ពុជា ។ ម្យ៉ាងទៀត តំបន់ទាំងនេះ ក៏មានហេដ្ឋារចនាសម្ព័ន្ធ តភ្ជាប់ពីបណ្ដាខេត្តទៅកាន់ទាំងនោះ ជាក់ស្ដែង បាវិត បច្ចុប្បន្ននេះមានផ្លូវជាតិលេខ១ ហើយអនាគតក៏មានផ្លូវល្បឿនលឿនភ្នំពេញ បាវិត ខណៈតំបន់ប៉ោយប៉ែត ក៏មានផ្លូវជាតិលេខ៥ ដែលទើបតែស្ថាបនារួច ហើយផ្លូវល្បឿនលឿន ភ្នំពេញ សៀមរាប ប៉ោយប៉ែត កំពុងស្ថិតនៅក្នុងដំណាក់កាលសិក្សាដែរ ៕
Account
Security
Favourite Content