សៀមរាប ៖ គណៈកម្មាធិការអាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ (COSTI កម្ពុជា) និង CO​S​T​I​ ឥណ្ឌូនេស៊ី តាមរយៈគម្រោង E-READI របស់សហភាពអឺរ៉ុបនាះ កាលពីពេលថ្មីៗនេះបានសហការរៀបចំសិក្ខាសាលា «អឺរ៉ុប-អាស៊ានលើកទី៦នៃគម្រោងមជ្ឈមណ្ឌលគ្រប់គ្រងបច្ចេកវិទ្យាអាស៊ាន-ASEAN TMH »នៅខេត្តសៀមរាប ។ សិក្ខាសាលានេះផ្តោតសំខាន់លើការបង្កើតថ្នាលគ្រប់គ្រងបច្ចេកវិទ្យាអាស៊ាន ដែលគ្រោង​ដាក់ឱ្យដំណើរការជាផ្លូវការនៅក្នុងកិច្ចប្រជុំ COSTI លើកទី៨៨ នៅខែតុលា ឆ្នាំ២០២៥ ខាងមុខនេះ។

សូមជម្រាបថា៖ គម្រោងមជ្ឈមណ្ឌលគ្រប់គ្រងបច្ចេកវិទ្យាអាស៊ាន ត្រូវបានស្នើឡើងដំបូងដោយកម្ពុជា និងឥណ្ឌូនេស៊ីក្នុងឆ្នាំ២០២១ ហើយត្រូវបានគណៈកម្មាធិការអាស៊ាន COSTI គាំទ្រជាអាទិភាពប្រចាំឆ្នាំ២០២២, ២០២៣ និង ២០២៤។ គម្រោងនេះមានគោលដៅផ្សារភ្ជាប់អ្នកស្រាវជ្រាវជាមួយវិស័យឯកជន ស្ថាប័នរដ្ឋាភិបាល អង្គការមិនមែនរដ្ឋាភិបាល ធុរកិច្ចបង្កើតថ្មី និងអ្នកវិនិយោគនៅទូទាំងតំបន់អាស៊ាន ដើម្បីលើកកម្ពស់ភាពជាដៃគូ បង្កើតកិច្ចសហការ និងពន្លឿនការធ្វើពាណិជ្ជកម្មបច្ចេកវិទ្យាថ្មីៗ។ អ្នកទទួលផលសំខាន់ៗពីគម្រោងនេះ រួមមានសាកលវិទ្យាល័យដែលផ្ដោតលើវិទ្យាសាស្ត្រ បច្ចេកវិទ្យា និងនវានុវត្តន៍, សហគ្រាស​ធុន​មីក្រូ តូច មធ្យម និងធំ, និងស្ថាប័នគោលនយោបាយវិទ្យាសាស្ត្រ បច្ចេកវិទ្យា និងនវានុវត្តន៍ជាតិ។

សិក្ខាសាលារយៈពេលពីរថ្ងៃដែលរៀបចំនៅខេត្តសៀមរាបនេះ បានប្រមូលផ្ដុំភាគីពាក់ព័ន្ធសំខាន់ៗ រួមមានតំណាង COSTI កម្ពុជា និងឥណ្ឌូនេស៊ី គម្រោង E-READI លេខាធិការដ្ឋានអាស៊ាន និងអង្គភាព ASEAN TMH មកពីបណ្ដារដ្ឋជាសមាជិកទាំងអស់។ សិក្ខាកាមបានពិភាក្សាលើការរៀបចំបញ្ចប់ផែនការអនុវត្តថ្នាលគ្រប់គ្រងបច្ចេកវិទ្យាអាស៊ាននេះក្នុងគោលដៅពន្លឿនការស្រាវជ្រាវ ជំរុញនវានុវត្តន៍ លើកកម្ពស់ការផ្ទេរបច្ចេកវិទ្យា និងការចែករំលែកចំណេះដឹងក្នុងតំបន់។

ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធាន COSTI កម្ពុជា បានសង្កត់ធ្ងន់លើការកំណត់ជំហានច្បាស់លាល់សម្រាប់ការអនុវត្តបន្ថែមពីលើការពិភាក្សា។

ឯកឧត្តមបានលើកឡើងថា៖

«កិច្ចពិភាក្សាអំពីតួនាទីរបស់ក្រុមការងារ ASEAN TMH និងការរៀបចំឯកសារស្តីពីមុខងារ និងលក្ខខណ្ឌតម្រូវបច្ចេកទេស គឺជាមូលដ្ឋានសម្រាប់ការអនុវត្តថ្នាលបច្ចេកវិទ្យាមួយនេះ»។ តាមរយៈគម្រោង E-READI វាជាមូលដ្ឋានគ្រឹះដ៏រឹងមាំសម្រាប់អាស៊ានក្នុងការជំរុញការផ្ទេរបច្ចេកវិទ្យា ការលើកកម្ពស់ប្រព័ន្ធអេកូឡូស៊ី នវានុវត្តន៍ និងការជំរុញកំណើនប្រកបដោយភាពធន់ និងបរិយាបន្ន»។

ឯកឧត្ដម Sujiro Seam ឯកអគ្គរដ្ឋទូតសហភាពអឺរ៉ុបប្រចាំអាស៊ាន បានបញ្ជាក់ពីការប្ដេជ្ញាចិត្តរបស់សហភាពអឺរ៉ុបចំពោះវិទ្យាសាស្ត្រ បច្ចេកវិទ្យា និងនវានុវត្តន៍ ដោយលើកឡើងថា៖ ASEAN TMH នឹងផ្ដល់ជាថ្នាលបច្ចេកវិទ្យារួមមួយសម្រាប់តម្រូវការ និងបំណងប្រាថ្នារបស់តំបន់។ តាមរយៈគម្រោង E-READI សហភាពអឺរ៉ុបបានគាំទ្រសិក្ខាសាលាជាច្រើនកន្លងមក ហើយសិក្ខាសាលាលើកទី៦ នេះ ផ្តោតលើការរៀបចំបញ្ចប់ផែនការអនុវត្តសម្រាប់ ASEAN TMH។

ឯកឧត្ដមក៏បានជម្រាបជូនអំពីគំនិតផ្ដួចផ្ដើម Horizon Europe ដែលមានមូលនិធិ ៩៥,៥ ពាន់លានអឺរ៉ូ ដើម្បីគាំទ្រគម្រោងការស្រាវជ្រាវ នវានុវត្តន៍ ចាប់ពីឆ្នាំ២០២១ ដល់ឆ្នាំ២០២៧ ថាជាឧទាហរណ៍គំរូមួយសម្រាប់កិច្ចសហប្រតិបត្តិការវិទ្យាសាស្ត្រ និងនវានុវត្តន៍ជាសកលរបស់អឺរ៉ុប។

លោកស្រីបណ្ឌិត Elrade Rofaani តំណាងប្រធាន COSTI ឥណ្ឌូនេស៊ី បានកោតសរសើរចំពោះស្មារតីសហការនៃសិក្ខាសាលាក្នុងការដោះស្រាយបញ្ហាប្រឈមជាសកល។

លោកស្រី បានលើកឡើងថា៖

«ASEAN TMH ត្រូវបានបង្កើតឡើងជាថ្នាលវិទ្យាសាស្ត្រ បច្ចេកវិទ្យា និងនវានុវត្តន៍អនឡាញ ដើម្បីភ្ជាប់ការស្រាវជ្រាវរបស់សាកលវិទ្យាល័យជាមួយស្ថាប័នឯកជនដែលផ្តោតលើនវានុវត្តន៍ ក្នុងគោលដៅបង្កើនផលសម្រាប់សង្គម និងសក្តានុពលពាណិជ្ជកម្ម។ យើងរំពឹងថា ថ្នាលអនឡាញនេះនឹងរួមចំណែកដោះស្រាយបញ្ហាហេដ្ឋារចនាសម្ព័ន្ធបច្ចេកវិទ្យាក្នុងតំបន់ដែលចាំបាច់សម្រាប់ការធ្វើពាណិជ្ជកម្ម និងការពង្រីកផលនៃនវានុវត្តន៍»។

លោកស្រីបណ្ឌិត Zurina Moktar ប្រធាននាយកដ្ឋានវិទ្យាសាស្ត្រ និងបច្ចេកវិទ្យា នៃលេខាធិការដ្ឋានអាស៊ាន បានសង្កត់ធ្ងន់ពីភាពចាំបាច់នៃនិរន្តរភាពបច្ចេកទេស និងហិរញ្ញវត្ថុនៃថ្នាលនេះ។

លោកស្រីបានលើកឡើងថា៖

«ជាង ៥០% នៃកំណើនផលិតផលក្នុងស្រុកសរុបនៅទសវត្សរ៍នេះ នឹងជំរុញដោយវិស័យដែលមានឫសគល់ក្នុងនវានុវត្តន៍ និងបច្ចេកវិទ្យា។ ប្រសិនបើអាស៊ានចង់បន្តនាំមុខកំណើននេះ យើងត្រូវតែធានាថា ថ្នាលបច្ចេកវិទ្យាដូចជា TMH មិនត្រឹមតែជាបំណងប្រាថ្នាយល់ពីចំណេះដឹងបច្ចេកវិទ្យាប៉ុណ្ណោះទេ តែជាថ្នាលអាចដំណើរការប្រកបដោយប្រសិទ្ធភាព ត្រឹមត្រូវតាមបច្ចេកទេស មាននិរន្តរភាពហិរញ្ញវត្ថុ និងមានរចនាសម្ព័ន្ធរឹងមាំផងដែរ»។