សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅមុនវិបត្តិអ្នកអភិវឌ្ឍន៍មួយចំនួនបានទិញដីទុក ដើម្បីត្រៀមអភិវឌ្ឍន៍ ប៉ុន្តែដោយសារស្ថានភាពសេដ្ឋកិច្ចមិនប្រសើរបានធ្វើឱ្យគម្រោងអភិវឌ្ឍន៍របស់ពួកគាត់ត្រូវគាំង ហើយដីដែលត្រៀមអភិវឌ្ឍន៍នោះត្រូវទុកទំនេរ ។ អ្នកជំនាញនៃវិស័យអចលនទ្រព្យបានប្រាប់ឱ្យកែប្រែដីនោះរកចំណូលវិញ ប្រសើរជាងទុកទំនេរ ឬទុករង់ចាំអភិវឌ្ឍន៍នាពេលក្រោយ។
កញ្ញា ជិន ច័ន្ទដាលុច្ស ប្រធានផ្នែកវាយតម្លៃនៃក្រុមហ៊ុនអចលនទ្រព្យ CBRE Cambodia បានលើកឡើងនៅក្នុងសន្និសីទសារព័ត៌មានមួយកាលពីពេលថ្មីៗឱ្យដឹងថា ក្នុងពេលដែលស្ថានភាពសេដ្ឋកិច្ចកម្ពុជា និងពិភពលោកនៅមិនទាន់មានប្រសើរ និងមិនទាន់មានការអភិវឌ្ឍន៍ អ្នកមានដីទំនេរ ដែលត្រៀមទុកសម្រាប់អភិវឌ្ឍន៍គម្រោង គួរតែកែប្រែដីនោះឱ្យមានប្រយោជន៍ឱ្យទទួលបានចំណូលប្រសើរជាងទុកនៅទំនេរ ។
កញ្ញាបន្តថា ក្នុងស្ថានភាពបច្ចុប្បន្ន ទីផ្សារអចលនទ្រព្យផ្នែកខ្លះមានការអភិវឌ្ឍលើសពីតម្រូវការ ដូចជា ខុនដូ ផ្សារទំនើប ជាដើម ដូច្នេះនៅពេលដែលស្ថានភាពមិនទាន់ប្រសើរ ការអភិវឌ្ឍគួរតែគិតគូរឱ្យបានវែងឆ្ងាយ បើពុំនោះទេ អ្នកវិនិយោគអាចនឹងប្រឈមនឹងបញ្ហាច្រើន ។
អ្នកនាង គឹម គិនកេសា អគ្គនាយិការងនៃក្រុមហ៊ុន CBRE Cambodia ក៏បានឱ្យដឹងផងដែរថា អ្នកមានដីទំនេរដែលត្រៀមក្នុងការអភិវឌ្ឍគម្រោងណាមួយ ប៉ុន្តែត្រូវពន្យាពេលដោយមិនទាន់មានពេលកំណត់នោះអាចកែប្រែទៅជាដីកសិកម្មជាឃ្លាំងជួល សម្រាប់ស្តុកទំនិញដែលកំពុងមានតម្រូវការ ប្រសើរជាងទុកនៅទំនេរ ដោយមិនទាន់ដឹងថាពេលណានឹងអាចអភិវឌ្ឍន៍បាន ។
អ្នកនាងបន្តថា ផ្នែកមួយចំនួននៃវិស័យអចលនទ្រព្យដូចជា ផ្សារទំនើប វាលើសតម្រូវការហើយ ដូច្នេះក្នុងពេលឆាប់នេះ មិនគួរមានការសង់ផ្សារទំនើបបន្ថែមទៀតទេ ។ អ្វីដែលត្រូវធ្វើនោះ គឺត្រូវរកទីផ្សារដើម្បីជួលទីតាំងផ្សារទំនើបដែលមានស្រាប់ ឬធ្វើយ៉ាងណាឱ្យផ្សារទំនើបដែលបានសង់ហើយមានសកម្មភាព ។
យ៉ាងណាក៏ដោយ បើទោះបីជាស្ថានភាពនៃការទិញលក់ដីធ្លីក្នុងរាជធានីភ្នំពេញមិនមានសកម្មភាពខ្លាំងដូចកាលពីឆ្នាំ២០១៩ គ្រាមុនវិបត្តិកូវីដ១៩ក្ដី ប៉ុន្តែបើតាមរបាយការណ៍របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញថា តម្លៃដីតាមបណ្ដាខណ្ឌនានាក្នុងរាជធានីភ្នំពេញ នៅតែមានតម្លៃខ្ពស់ ដោយមិនមានការប្រែប្រួលប៉ុន្មាននោះទេ បើធៀបនឹងមុនពេលមានវិបត្តិ ក្នុងឆ្នាំ២០២០ ។ ជាក់ស្ដែង នៅឆមាសទី១ ឆ្នាំ២០២៣នេះ បើតាមរបាយការណ៍ និងការសិក្សាស្រាវជ្រាវរបស់សមាគមឃើញថាតំបន់នានាក្នុងរាជធានីនៅតែមានតម្លៃល្អដដែល ៕
Account
Security
Favourite Content