សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កណ្ដាល៖ ពីម្ចាស់ដីស្រែ និងដីចម្ការផ្ទាល់ខ្លួនមកជាអ្នកជួលដីគេដើម្បីបន្តមុខរបរកសិកម្ម លោក ជ្រឹន ឡួត កសិករអាយុ ៤៥ឆ្នាំ រស់នៅភូមិព្រៃអ្នកម្ចាស់ ឃុំវិហារសួគ៌ ខេត្តកណ្ដាល បានងាកមកប្រកបរបរដាំឈូកជាង ១០ឆ្នាំមកហើយ ដោយសារមើលឃើញថា ដំណាំនេះអាចផ្តល់ផលច្រើនដង និងមានលទ្ធភាពបង្កើតចំណូលប្រសើរជាងការធ្វើស្រែដែលតម្លៃស្រូវមានការប្រែប្រួល និងទទួលបានប្រាក់ចំណេញតិច។
បច្ចុប្បន្ន លោកបានជួលដីគេចំនួន ១០ហិកតា សម្រាប់ដាំឈូកនៅម្ដុំភូមិដួនហែម ស្រុកខ្សាច់កណ្ដាល ខេត្តកណ្ដាល ដោយបង់ថ្លៃជួល ១០០ដុល្លារក្នុងមួយហិកតា។ លោកបានចាប់ផ្តើមជួលដីនៅតំបន់នេះតាំងពីឆ្នាំ២០២៤ បន្ទាប់ពីគ្រួសារបានលក់ដីស្រែ និងដីចម្ការផ្ទាល់ខ្លួន ដើម្បីយកប្រាក់ទៅព្យាបាលជំងឺកូនប្រុសច្បង។
លោក ជ្រឹន ឡួត បានឱ្យដឹងថា ការជ្រើសរើសដំណាំឈូកជាមុខរបរចម្បង គឺដោយសារដំណាំនេះអាចប្រមូលផលបានពី ៣ ទៅ ៤ដង បន្ទាប់ពីដាំដុះ ខណៈការធ្វើស្រែពឹងផ្អែកខ្លាំងលើតម្លៃស្រូវនៅទីផ្សារ។ ទោះជាយ៉ាងណា ការដាំឈូកក៏ទាមទារការថែទាំច្រើនជាងស្រូវ មានបញ្ហាជំងឺ និងត្រូវយកចិត្តទុកដាក់លើការគ្រប់គ្រងទឹក និងសត្វល្អិតផងដែរ។
លោកបានមានប្រសាសន៍ថា កាលពីមុនគ្រួសារមានដីស្រែ និងដីចម្ការផ្ទាល់ខ្លួន ប៉ុន្តែត្រូវលក់ដើម្បីយកប្រាក់ទៅព្យាបាលកូន។ ចាប់តាំងពីពេលនោះមក លោកនិងភរិយាត្រូវបន្តជួលដីពីគេដើម្បីធ្វើកសិកម្ម ហើយនៅពេលម្ចាស់ដីឈប់ឱ្យជួល ក៏ត្រូវស្វែងរកដីថ្មីដើម្បីបន្តមុខរបរ។
ចំពោះការចំណាយដើមទុន កសិកររូបនេះបានឱ្យដឹងថា ជាទូទៅក្នុងមួយហិកតា លោកប្រើកូនឈូកប្រមាណ ៧.០០០ដើម ខណៈការដាំដុះតាមការអនុវត្តទូទៅអាចប្រើរហូតដល់ ១០.០០០ដើមក្នុងមួយហិកតា។ កូនឈូក ១០០ដើមមានតម្លៃប្រមាណ ១០.០០០រៀល ហើយថ្លៃពលកម្មសម្រាប់ដក និងដាំក៏ត្រូវចំណាយប្រមាណ ១០.០០០រៀលបន្ថែមទៀត ក្នុង ១០០ដើម។
ដូច្នេះ សម្រាប់ការប្រើកូនឈូក ៧.០០០ដើមក្នុងមួយហិកតា ថ្លៃកូនឈូក និងពលកម្មដកដាំអាចមានចំនួនប្រមាណ ១,៤លានរៀល។ ទោះជាយ៉ាងណា លោកមិនចាំបាច់ជួលកម្មករទាំងស្រុងនោះទេ ដោយលោកបានដាំដោយខ្លួនឯងប្រមាណ ៥ហិកតា ដើម្បីកាត់បន្ថយចំណាយលើកម្លាំងពលកម្ម។
តាមបទពិសោធន៍របស់លោក ក្នុងមួយហិកតាអាចប្រមូលផលបានជាមធ្យមចាប់ពី ១តោន ដល់ជាង ១,៣តោន។ បន្ទាប់ពីកាត់កងចំណាយលើជី ថ្នាំ និងកម្លាំងពលកម្មផ្សេងៗ ប្រាក់ចំណេញអាចនៅសល់ប្រមាណ ៥០ម៉ឺន ទៅ ៦០ម៉ឺនរៀលក្នុងមួយហិកតា។
សម្រាប់ការចាប់ផ្តើមដាំដុះក្នុងមួយវគ្គ លោកតែងត្រូវការដើមទុនខ្ចីពីខាងក្រៅប្រមាណ ៦លាន ទៅ ៧លានរៀល ហើយពេលខ្លះអាចឡើងដល់ ១០លានរៀល។ ប្រភពទុនមួយផ្នែកបានមកពីអ្នកទទួលទិញផលិតផលពីលោកផ្ទាល់ ដោយមានការប្រាក់ ៣ម៉ឺនរៀលក្នុងមួយខែ សម្រាប់ប្រាក់កម្ចី ១លានរៀល។ ក្រោយប្រមូលផល និងសងប្រាក់កម្ចីរួច គ្រួសារអាចនៅសល់ប្រាក់ចំណូលសុទ្ធជាង ៣លានរៀលសម្រាប់ផ្គត់ផ្គង់ជីវភាព។
ចំពោះទីផ្សារ គ្រាប់ឈូកដែលហាលស្ងួតអាចលក់បានក្នុងតម្លៃ ៤.០០០ ទៅ ៥.០០០រៀលក្នុងមួយគីឡូក្រាម ខណៈគ្រាប់ឈូកសើមដែលនៅមានសំបកមានតម្លៃប្រមាណ ២.៥០០ ទៅ ៣.០០០រៀលក្នុងមួយគីឡូក្រាម។ ចំណែករយៈពេលដាំដុះ ប្រភេទពូជលូតលាស់លឿនអាចចាប់ផ្តើមប្រមូលផលក្រោយដាំបានប្រមាណ ៣ខែ ហើយពូជខ្លះទៀតត្រូវការពេលយូរជាងនេះបន្តិច។
អ្វីដែលជួយកាត់បន្ថយថ្លៃដើមក្នុងការដាំឈូក គឺក្រោយប្រមូលផលលើកដំបូង កសិករអាចប្រើវិធីព្យួរ ដើម្បីឱ្យដើមឈូកបង្កើតពន្លក និងឫសថ្មី រួចបន្តប្រមូលផលបានច្រើនដង ដោយមិនចាំបាច់ទិញកូនឈូកថ្មីរាល់វគ្គ។ ប៉ុន្តែការប្រើពន្លកចាស់បន្តអាចធ្វើឱ្យទិន្នផល និងគុណភាពថយចុះ បើធៀបនឹងការដាំឡើងវិញដោយប្រើកូនឈូកថ្មី។
ទោះមានលទ្ធភាពបង្កើតចំណូលពីដំណាំឈូកក៏ដោយ កសិកររូបនេះត្រូវប្រឈមនឹងហានិភ័យពីអាកាសធាតុ ដូចជាទឹកជំនន់ និងការខូចខាតដំណាំ ព្រមទាំងតម្រូវការថែទាំជាប្រចាំទាំងយប់ទាំងថ្ងៃ។ ការចំណាយលើការស្រោចទឹក ការការពារសត្វល្អិត និងការបាញ់ថ្នាំ គឺជាកត្តាដែលត្រូវគិតគូរដើម្បីរក្សាទិន្នផល និងប្រាក់ចំណេញ។
សម្រាប់រដូវកាលខាងមុខ លោកមានគម្រោងផ្អាកការដាំឈូកជាបណ្តោះអាសន្នលើផ្ទៃដីភាគច្រើន ដោយងាកមកដាំស្រូវវិញ ដើម្បីធានាស្បៀងសម្រាប់គ្រួសារ និងសម្របតាមស្ថានភាពទីផ្សារ និងអាកាសធាតុ។ លោកនឹងទុកដំណាំឈូកប្រមាណកន្លះហិកតា ទៅមួយហិកតា នៅកន្លែងដែលមានប្រភពទឹកគ្រប់គ្រាន់ ហើយមានគម្រោងរៀបចំដាំឈូកឡើងវិញនៅខែមីនា។
លោកបានឱ្យដឹងថា ទោះបីជាបានបាត់បង់ដីស្រែផ្ទាល់ខ្លួន និងត្រូវពឹងផ្អែកលើការជួលដីគេក៏ដោយ ក៏លោកនៅតែចង់បន្តមុខរបរដាំឈូកនេះនៅថ្ងៃអនាគត ដោយសារតែមានបទពិសោធន៍ និងស្រឡាញ់ការងារកសិកម្មដែលបានប្រឡូកតាំងពីវ័យក្មេង៕
Account
Security
Favourite Content