សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ក្នុងគោលបំណងជំរុញ និងស្ដារការវិនិយោគនៅក្នុងខេត្តព្រះសីហនុឡើងវិញ រាជរដ្ឋាភិបាលបានដាក់ចេញនូវកម្មវិធីពិសេសដើម្បីជំរុញការវិនិយោគក្នុងខេត្តព្រះសីហនុ ហើយមកដល់បច្ចុប្បន្ននេះមានគម្រោងជាច្រើនបានចាប់ផ្តើមមានសកម្មភាពឡើងវិញ ទាំងការសាងសង់បន្តបញ្ចប់គម្រោង ក៏ដូចជាគម្រោងស្នើសុំវិនិយោគថ្មី ដែលរំពឹងថានឹងអាចធ្វើឱ្យខេត្តព្រះសីហនុមានសកម្មភាពផុសផុលល្អប្រសើរឡើងវិញ ។
ឯកឧត្ត ម៉ាង ស៊ីណេត អភិបាលខេត្តព្រះសីហនុបានមានប្រសាសន៍ថា កម្មវិធីពិសេសជំរុញការវិនិយោគខេត្តព្រះសីហនុ ឆ្នាំ២០២៤ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានដាក់ចេញ មកដល់ពេលនេះ អនុគណៈកម្មការវិនិយោគខេត្តព្រះសីហនុទទួលបានសំណើសុំលើកទឹកចិត្តចំនួន ៩៧គម្រោង គម្រោងទទួលបានលិខិតអនុញ្ញាតជាគោលការណ៍ ៦១គម្រោង គម្រោងដាក់ពាក្យស្នើសុំ តែមិនទទួលបានការឯកភាពចំនួន ៣គម្រោង គម្រោងបានដាក់ពាក្យស្នើសុំ តែពន្យាមាន ៦គម្រោង ។
ឯកឧត្តមបានបន្តថា ក្នុងរយៈពេល ៦ខែដើមឆ្នាំ២០២៤ សម្រាប់វិស័យទេសចរណ៍ ខេត្តព្រះសីហនុទទួលបានភ្ញៀវទេសចរសរុប ២លាន ៨សែននាក់ ក្នុងនោះភ្ញៀវជាតិ ២លាន ៦សែននាក់ និងភ្ញៀវបរទេសជាង ២០ម៉ឺននាក់ បើធៀបនឹង ៦ខែដើមឆ្នាំ២០២៣ មានការកើនឡើង ហើយភ្ញៀវទេសចរមកពីអឺរ៉ុបភាគច្រើនគឺសំដៅទៅកម្សាន្តនៅតំបន់កោះក្នុងក្រុងកោះរ៉ុង (ស្ទូចត្រី មុជទឹកមើលផ្កាថ្ម និងជីវៈចម្រុះបាតសមុទ្រ) ។ ដោយឡែក ចំពោះការដឹកជញ្ជូន រាជរដ្ឋាភិបាលបានកំណត់យកកំពង់ផែក្រុងព្រះសីហនុ ទៅដល់ស្រុកស្ទឹងហាវ ជាតំបន់ឧស្សាហកម្ម និងភស្តុភាកម្ម។
ឯកឧត្តមបានបញ្ជាក់ថា ព្រះសីហនុ ជាខេត្តមានសក្តានុពលសម្រាប់ជំរុញកំណើនសេដ្ឋកិច្ច និងទេសចរណ៍ ។ ខេត្តព្រះសីហនុមានក្រុងចំនួន២ និងស្រុកចំនួន៣ មាន ២៩ឃុំ/សង្កាត់ ស្មើនឹង ១១១ភូមិ ខេត្តមានកោះ៣២ ឆ្នេរសមុទ្រមានប្រវែង ១៧៥គីឡូម៉ែត្រ មានឧទ្យានជាតិលើគោក និងឧទ្យានជាតិបាតសមុទ្រ។
លោក សៅ ហុក ប្រធានក្រុមហ៊ុន KW Cambodia សាខាខេត្តព្រះសីហនុ បានមានប្រសាសន៍ថា ចាប់តាំងពីរាជរដ្ឋាភិបាលបានដាក់ចេញនូវកម្មវិធីពិសេសជំរុញការវិនិយោគខេត្តព្រះសីហនុមក ឃើញថាមានការចាប់អារម្មណ៍ពីសំណាក់អ្នកវិនិយោគច្រើនគួរឱ្យកត់សម្គាល់ ដោយក្នុងនោះម្ចាស់គម្រោងវិនិយោគដែលជាប់គាំងនៅក្នុងខេត្តមួយនេះ បានស្វះស្វែងរកទុនវិនិយោគមកអភិវឌ្ឍន៍គម្រោងរបស់ខ្លួនឡើងវិញ ហើយខ្លះបានបញ្ចប់ទាំងស្រុង ខ្លះទៀតបានពាក់កណ្ដាល និងខ្លះកំពុងរៀបចំនីតិវិធីលើការវិនិយោគរបស់ខ្លួន។
លោកបញ្ជាក់ថា បច្ចុប្បន្ននេះ សកម្មភាពនៃការទិញលក់អចលនទ្រព្យ ដីធ្លី នៅក្នុងខេត្តព្រះសីហនុចាប់ផ្ដើមកម្រើកឡើងវិញបន្តិចហើយបើធៀបទៅនឹងកាលពី ៣ ឆ្នាំមុន ប៉ុន្តែសម្រាប់តម្លៃវិញនៅមិនទាន់ឡើងខ្ពស់នោះទេ ពោលគឺរក្សាតម្លៃថេរដដែល ៕
Account
Security
Favourite Content