ស្ថិតនៅក្នុងជីវិតរស់នៅប្រចាំថ្ងៃរបស់មនុស្សគ្រប់គ្នានាពេលបច្ចុប្បន្ននេះ គ្មានអ្នកណាម្នាក់អាចគេចផុតពីការប្រើប្រាស់ដោយផ្ទាល់ ឬប្រយោលជាមួយនឹងបច្ចេកវិទ្យា AI នោះឡើយ រាប់ចាប់តាំងពីទូរស័ព្ទដៃ កំព្យូទ័រ និងសំភារៈប្រើប្រាស់ក្នុងគេហដ្ឋាន ក៏ដូចជានៅកន្លែងការងារផងដែរ។ ប៉ុន្តែក្នុងពេលជាមួយគ្នានេះ ទោះបីជាវាបានបង្កភាពងាយស្រួល ចំណេញពេលវេលាពិតមែន ប៉ុន្តែចន្លោះប្រហោង និងបញ្ហាប្រឈមតែងតែកើតមានឡើងនៅក្នុងទំនោរថ្មីនេះ ខណៈដែលសកម្មភាពទាំងនោះអាចមានរូបរាងច្រើនប្រភេទ ច្រើនសណ្ឋានហើយជាទូទៅយើងហៅវាថាជាឧក្រិដ្ឋកម្មអនឡាញ ឬ Cybercrime ។

តើអ្នកដឹងទេថា បច្ចេកវិទ្យា AI បាន និងកំពុងបន្តចាក់ចូលជ្រៅទៅក្នុងសកម្មភាពសេដ្ឋកិច្ចពិភពលោក ហើយតាមរយៈ AI នេះ នឹងអាចក្លាយទៅជាចំណែកដ៏ធំសម្បើមនៃសេដ្ឋកិច្ចសកលនៅត្រឹមឆ្នាំ២០៣០ ឬក្នុងទំហំដល់ទៅ ១៥,៧ទ្រីលានដុល្លារ។

ក្នុងពេលដំណាលគ្នានេះ ពិភពលោកមិនគួររំលងបញ្ហាដែលអាចបណ្តាលមកពីសកម្មភាពអនឡាញដែលនឹងអាចពាក់ព័ន្ធទៅនឹងបច្ចេកវិទ្យា AI នេះនោះទេ ខណៈដែលច្បាប់គ្រប់គ្រង AI ហាក់ដូចជានៅយឺតយ៉ាវប្រៀបធៀបទៅនឹងការរីកចម្រើន។

ឧក្រិដ្ឋកម្មអនឡាញ ឬ Cybercrime ដែលយើងមិនសូវចាប់អារម្មណ៍កាលពីប៉ុន្មានទសវត្សរ៍មុននោះ ពេលនេះកំពុងបង្កក្តីព្រួយបារម្ភយ៉ាងខ្លាំងទៅដល់រដ្ឋាភិបាល និងអង្គភាពស្ថាប័នពិភពលោក ដោយសារតែជាក់ស្តែងជារៀងរាល់ឆ្នាំការខាតបង់ប្រាក់ដោយសារ Cybercrime អាចមានទៅដល់រាប់សិបទ្រីលានដុល្លារ។

គិតត្រឹមឆ្នាំ២០២១កន្លងទៅ ពិភពលោកបានខាតបង់គិតជាទឹកប្រាក់ដល់ទៅ ៦ទ្រីលានដុល្លារ ដោយសារសកម្មភាពខុសច្បាប់មួយចំនួនដែលកើតមានជាបន្តបន្ទាប់ ហើយប្រសិនបើគេគណនាចំនួននៃការខាងតបង់នេះទៅជាសេដ្ឋកិច្ចវិញ វាមានទំហំស្មើទៅនឹងប្រទេសទី៣ ដែលមានសេដ្ឋកិច្ចធំជាងគេបំផុតលើពិភពលោកបន្ទាប់ពីអាមេរិក និងចិន។

កាន់តែគួរខ្លាចក្នុងរយៈពេលនេះ ពិភពលោកនឹងមិនអាចទប់ស្កាត់វិបត្តិនេះឲ្យមានប្រសិទ្ធភាពនៅឡើយ ដោយសារតែអ្នកជំនាញលើផ្នែកសន្តិសុខអនឡាញជាច្រើនបានធ្វើការព្យាករណ៍ថា ពិភពលោកនឹងប្រឈមមុខទៅនឹងការខាតបង់ជាបន្តបន្ទាប់រយៈពេល៥ឆ្នាំខាងមុខនេះ ពោលគឺប្រមាណជា១៥ភាគរយនៃអត្រាកើនឡើងជារៀងរាល់ឆ្នាំ ឬទៅដល់ ១០,៥ទ្រីលានដុល្លារនៅត្រឹមឆ្នាំ២០២៥ ធៀបទៅនឹងទំហំដែលធ្លាប់មានត្រឹមតែ ៣ទ្រីលានដុល្លារកាលពីឆ្នាំ២០១៥។

គួរឲ្យដឹងដែរថា គេអាចគណនាពីទំហំនៃការខាតបង់ដោយសារ Cybercrime បានតាមរយៈការខូចខាត និងការបំផ្លិចបំផ្លាញទិន្នន័យ ទំហំទឹកប្រាក់ដែលពួកឧក្រិដ្ឋជនលួចបានតាមគណនេយ្យធនាគារ ការបាត់បង់ផលិតភាព ការលួចកម្មសិទ្ធិបញ្ញា ការលួចទិន្នន័យផ្ទាល់ខ្លួន និងហិរញ្ញវត្ថុ ការកេងបន្លំ ការក្លែងបន្លំ ការរំខានក្រោយការវាយប្រហារចំពោះដំណើរការធម្មតានៃអាជីវកម្ម ការស៊ើបអង្កេតកោសល្យវិច្ច័យ ការស្ដារឡើងវិញ និងការលុបការលួចចូលទិន្នន័យ និងប្រព័ន្ធ ព្រមទាំងការខូចខាតកេរ្តិ៍ឈ្មោះជាដើមផងដែរ៕