បរទេស៖ យោងតាមប្រភពព័ត៌មានពី Yahoo!News បានរាយការណ៍ថា ទីក្រុងប៉េកាំងបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ពាក់ព័ន្ធនឹងការសម្រេចចិត្តរបស់សហភាពអឺរ៉ុបដែលបានដំឡើងពន្ធលើរថយន្តអគ្គិសនីនាំចូលពីប្រទេសចិន។

កាលពីថ្ងៃអង្គារក្នុងសប្ដាហ៍នេះ សហភាពអឺរ៉ុបបានអនុម័តលើការដំឡើងពន្ធរហូតដល់ ៣៥ ភាគរយលើរថយន្តអគ្កិសនីនាំចូលពីចិនបន្ទាប់ពីពួកគេស៊ើបអង្កេតរកឃើញថា ការឧបត្ថម្ភធនរបស់រដ្ឋចិនកំពុងប៉ះពាល់ដល់ក្រុមហ៊ុនផលិតរថយន្តរបស់អឺរ៉ុប។ ការដំឡើងពន្ធ​នឹង​មានអត្រាលើសពី ​១០ ​ភាគរយនៃអត្រា​បច្ចុប្បន្ន​លើ​ការ​នាំ​ចូល​រថយន្ត​អគ្គិសនី​ពី​ប្រទេស​ចិន។ ការសម្រេចចិត្តនេះបានក្លាយជាច្បាប់បន្ទាប់ពីសហភាពអឺរ៉ុបបានបោះពុម្ពផ្សាយកំណត់ត្រាផ្លូវការរបស់ខ្លួនកាលពីថ្ងៃអង្គារ ហើយការអនុម័តនេះនឹងចូលជាធរមានចាប់ពីថ្ងៃពុធ។ ការដាក់ពន្ធនេះនឹងមានរយៈពេល ៥ឆ្នាំ ដោយក្រុមហ៊ុនលក់រថយន្ត EVs ដ៏ធំបំផុតរបស់ចិន Geely ប្រឈមមុខនឹងការបង់ពន្ធ ១៨,៨ ភាគរយ ខណៈដែលក្រុមហ៊ុន SAIC នឹងទទួលរងផលប៉ះពាល់ខ្ពស់បំផុតនៅ ៣៥,៣ ភាគរយ។ មិនត្រឹមតែប៉ុណ្ណោះ អត្រាពន្ធផ្សេងៗក៏ត្រូវបានអនុវត្តផងដែរចំពោះយានយន្តបរទេសដែលផលិតនៅក្នុងប្រទេសចិនរួមមាន Tesla ដែលប្រឈមនឹងពន្ធ ៧,៨ ភាគរយ។

ប្រធានពាណិជ្ជកម្មសហភាពអឺរ៉ុប លោក Valdis Dombrovskis បានលើកឡើងថា តាមរយៈការអនុម័តវិធានការសមាមាត្រ និងគោលដៅទាំងនេះបន្ទាប់ពីការស៊ើបអង្កេតយ៉ាងម៉ត់ចត់ ពួកគេកំពុងការពារមូលដ្ឋានឧស្សាហកម្មអឺរ៉ុប និងការអនុវត្តទីផ្សារដោយយុត្តិធម៌។ សហភាពអឺរ៉ុប​ស្វាគមន៍​ការ​ប្រកួត​ប្រជែងរួម​ទាំង​វិស័យ​រថយន្ត​អគ្គិសនីផងដែរ ប៉ុន្តែ​ត្រូវគាំទ្រ​ដោយយុត្តិធម៌​។ យ៉ាងណាមិញ ការផ្លាស់ប្តូរនេះបានប្រឈមមុខនឹងការប្រឆាំងពីអាល្លឺម៉ង់ និងហុងគ្រី ដែលភ័យខ្លាចបង្កការខឹងសម្បារដល់ទីក្រុងប៉េកាំង និងអាចបង្កើតជាសង្រ្គាមពាណិជ្ជកម្ម។ សមាគមឧស្សាហកម្មរថយន្តរបស់អាល្លឺម៉ង់បានព្រមានអំពីការដំឡើងពន្ធអាចបង្កើនហានិភ័យនៃជម្លោះពាណិជ្ជកម្មធំជាងនេះ ខណៈពេលដែលក្រុមពាណិជ្ជកម្មចិនបានរិះគន់ពីការសម្រេចចិត្ត និងអំពាវនាវឱ្យមានការជជែករវាងភាគីទាំងពីរ។ ក្រុមហ៊ុនផលិតរថយន្តធំៗរបស់អឺរ៉ុបរួមមាន ក្រុមហ៊ុនអាល្លឺម៉ង់ Volkswagen auto titan បានរិះគន់វិធីសាស្រ្តរបស់សហភាពអឺរ៉ុបមួយនេះ និងបានជំរុញឱ្យទីក្រុងប្រ៊ូសែលដោះស្រាយបញ្ហាតាមរយៈការពិភាក្សាគ្នា។

យ៉ាងណាក៏ដោយ បើទោះបីជាការដំឡើងពន្ធគយមិនត្រូវបានគាំទ្រពីរដ្ឋសមាជិកទាំងអស់ ២៧ របស់សហភាពអឺរ៉ុបក៏ដោយ ប៉ុន្តែនៅក្នុងការបោះឆ្នោតកាលពីដើមខែនេះ រដ្ឋសមាជិកប្រឆាំងមិនមានចំនួនគ្រប់គ្រាន់ក្នុងការរារាំងការសម្រេចចិត្តនេះទេ ដោយសារវាតម្រូវឱ្យមានរដ្ឋគាំទ្រយ៉ាងហោចណាស់ ១៥ ដែលតំណាងឱ្យ ៦៥ ភាគរយនៃចំនួនប្រជាជននៃប្លុកនេះ។ សហភាពអឺរ៉ុបបានចាប់ផ្តើមការស៊ើបអង្កេតនេះក្នុងគោលបំណងការពារឧស្សាហកម្មរថយន្តរបស់ខ្លួនដែលមានបុគ្គលិកប្រហែល ១៤ លាននាក់។ ​រដ្ឋមន្ត្រីហិរញ្ញវត្ថុបារាំង លោក Antoine Armand បាននិយាយនៅក្នុងសេចក្តីថ្លែងការណ៍មួយថា សហភាពអឺរ៉ុបកំពុងធ្វើការសម្រេចចិត្តដ៏សំខាន់មួយដើម្បីការពារផលប្រយោជន៍ពាណិជ្ជកម្មរបស់តំបន់ ហើយឧស្សាហកម្មរថយន្តរបស់ពួកគេត្រូវការការគាំទ្រច្រើនជាងពេលណាៗទាំងអស់។

ជាការឆ្លើយតប ចិនបានប្រឆាំងនឹងការសម្រេចចិត្តនេះ និងមិនយល់ព្រមលើការដំឡើងពន្ធគយរបស់សហភាពអឺរ៉ុបនោះទេ ព្រមទាំងបានដាក់ពាក្យបណ្ដឹងក្រោមយន្តការដោះស្រាយជម្លោះរបស់អង្គការពាណិជ្ជកម្មពិភពលោក (WTO) ថែមទៀតផង។ ក្រសួងពាណិជ្ជកម្មរបស់ទីក្រុងប៉េកាំងបាននិយាយថា ចិននឹងចាត់វិធានការចាំបាច់ទាំងអស់ដើម្បីការពារនូវសិទ្ធិ និងផលប្រយោជន៍ស្របច្បាប់របស់ក្រុមហ៊ុនចិនយ៉ាងម៉ឺងម៉ាត់។ មិនត្រឹមតែប៉ុណ្ណោះ សភាពាណិជ្ជកម្មចិនប្រចាំសហភាពអឺរ៉ុបបានជំរុញឱ្យទីក្រុងប្រ៊ូសែល និងទីក្រុងប៉េកាំងពន្លឿនកិច្ចពិភាក្សាស្តីពីការបង្កើតតម្លៃអប្បបរមា ដើម្បីលុបបំបាត់ពន្ធគយទាំងនេះ។

ក្រៅពីការដំឡើងពន្ធលើរថយន្តអគ្គិសនីចិន ទីក្រុងប្រ៊ូសែលក៏បានស៊ើបអង្កេតការឧបត្ថម្ភធនរបស់ចិនសម្រាប់បន្ទះស្រូបពន្លឺព្រះអាទិត្យ និងទួរប៊ីនខ្យល់ផងដែរ។ សហភាពអឺរ៉ុបអាចប្រឈមមុខនឹងការសងសឹករបស់ចិន ដោយទីក្រុងប៉េកាំងលើកឡើងថា ខ្លួននឹងដាក់ពន្ធបណ្តោះអាសន្នលើស្រាកូញ៉ាក់អឺរ៉ុប។ គេកំពុងព្រួយបារម្ភថា ភាពតានតឹងពាណិជ្ជកម្មរវាងចិន និងសហភាពអឺរ៉ុបអាចនឹងកាន់តែក្តៅគគុក ខណៈដែលកាណាដា និងសហរដ្ឋអាមេរិកក៏បានដាក់ពន្ធ ១០០ ភាគរយលើការនាំចូលរថយន្តអគ្គិសនីរបស់ចិនផងដែរ៕