សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ថ្មីៗនេះ ប្រទេសរុស្ស៊ី និងប្រទេសចិន ត្រូវបានកាសែតបរទេសអះអាងថា បានឈានទៅដល់កិច្ចព្រមព្រៀងរវាងគ្នាក្នុងការសាងសង់រោងចក្រនុយក្លេអ៊ែរដ៏ទំនើប និងស្វ័យប្រវត្តិមួយនៅលើភពព្រះចន្ទ ខណៈដែលអាម៉េរិកក៏ទើបតែបានប្រកាសអំពីផែនការសាងសង់មូលដ្ឋានលើទីអវកាសមួយដែលនឹងអាចឃ្លាំមើលភពនេះដូចគ្នាដែរ។
នៅក្នុងព័ត៌មានលំអិតស្តីអំពីកិច្ចសហប្រតិបត្តិការគ្នានេះបានបញ្ជាក់ថា ម៉ាស៊ីនរ៉េអាក់ទ័ររបស់រុស្ស៊ីនឹងត្រូវប្រើប្រាស់សម្រាប់ផ្គត់ផ្គង់ថាមពលដ៏សំខាន់សម្រាប់ស្ថានីយស្រាវជ្រាវទីអវកាសថ្មីហៅកាត់ថា ILRS (International Lunar Research Station) ក៏ជាការដឹកនាំរួមគ្នាដោយចិន និងរុស្ស៊ី ផងដែរ។ តាមផែនការ ស្ថានីយអវកាសថ្មីនេះនឹងអាចបញ្ចប់ការសាងសង់ និងដំណើរការជាផ្លូវការនៅក្នុងឆ្នាំ២០៣៦។
មុននេះបន្តិចគេក៏បានដឹងដែរថា អង្គការណាសាបានប្រកាសអំពីផែនការថវិកាថ្មីឆ្នាំ២០២៦ក្នុងការកសាងស្ថានីយអវកាសរបស់ខ្លួនសម្រាប់ឃ្លាំមើលភពព្រះចន្ទទាំងមូល។
ប្រធានទីភ្នាក់ងារស្រាវជ្រាវអវកាសរុស្ស៊ី Roscosmos លោក Borisov បានថ្លែងប្រាប់ទៅកាន់បណ្តាញសារព័ត៌មានរដ្ឋ TASS ថា ការសាងសង់រោងចក្រនុយក្លេអ៊ែររបស់ចិន និងរុស្ស៊ី នឹងដំណើរការដោយប្រព័ន្ធស្វ័យប្រវត្តិ និងមិនមានវត្តមានរបស់មនុស្សនោះទេ ហើយបើទោះបីជាមិនអាចបញ្ជាក់ច្បាស់ក្តី ប៉ុន្តែលោក Borisov អះអាងថាបច្ចេកវិទ្យាសាងសង់ទាំងនោះគឺបានត្រៀមរួចរាល់ទៅហើយ។
ដោយឡែក ថ្មីៗចុងក្រោយនេះ កាលពីថ្ងៃទី៨ ខែឧសភា Roscosmos ក៏បានប្រកាសបន្ថែមទៀតថា រោងចក្រនេះនឹងប្រើប្រាស់ជាមូលដ្ឋានសំខាន់ជួយគាំទ្រដល់ប្រតិបត្តិការស្រាវជ្រាវ និងសាកល្បងបច្ចេកវិទ្យានានាដែលអាចប្រើប្រាស់សម្រាប់បេសកកម្មរបស់ស្ថានីយ ILRS និងអាចឈានទៅដល់លទ្ធភាពនៃការបញ្ជូនមនុស្សទៅចូលរួមប្រតិបត្តិការនាពេលអនាគត។
សម្រាប់កម្មវិធីស្រាវជ្រាវអវកាសដោយមនុស្សនៃស្ថានីយថ្មីនេះនឹងមានទីតាំងស្ថិតនៅភាគខាងត្បូងនៃប៉ូលភព ហើយមកទល់ពេលនេះវាបានទាក់ទាញប្រទេសដែលនឹងចូលរួមប្រមាណជា១៧មកហើយ រួមមានទាំង អេហ្ស៊ីប ប៉ាគីស្ថាន វេណេស៊ុយអេឡា ថៃ និងអាហ្វ្រិកខាងត្បូង។
គួរឲ្យដឹងដែរថា ដើម្បីបង្កើនទំនុកចិត្តសម្រាប់កម្មវិធីស្រាវជ្រាវអវកាសដោយយានអវកាសនោះ ចិន បានត្រៀមផែនការក្នុងការបញ្ជូនមនុស្សជាលើកដំបូងទៅកាន់ទីតាំងលើភពព្រះចន្ទនៅក្នុងបេសកកម្ម Chang’e-8 ដែលនឹងធ្វើឡើងនៅឆ្នាំ២០២៨ខាងមុខនេះ៕
Account
Security
Favourite Content