សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ដោយមើលឃើញកសិផលក្នុងស្រុកភាគច្រើនធ្វើការនាំចេញក្នុងទម្រង់ស្រស់ទៅកាន់ទីផ្សារក្រៅប្រទេសនោះ សាស្រ្តាចារ្យមួយរូបដែលមានជំនាញ និងបទពិសោធន៍ខាងកែច្នៃចំណីអាហារ និងផ្លែឈើ នៃសកលវិទ្យាល័យបាត់ដំបង បានរកវិធីសាស្ត្រកែច្នៃម្រេចខ្មែរធម្មជាតិសំឡូតមកធ្វើជាជ្រក់ម្រេចសម្ងួត ដែលជាគ្រឿងផ្សំរសជាតិជំនាន់ថ្មី មានប្រជាប្រិយភាព និងជាផ្នែកមួយជួយដល់ជីវភាពបងប្អូនក្នុងសហគមន៍។
លោក លីម សីហា អ្នកគ្រប់គ្រងទូទៅសិប្បកម្ម ធូបបូអាគ្រីហ្វូដ បានមានប្រសាសន៍ថា ៖
«សិប្បកម្មយើងកំពុងផលិតម្រេចជ្រក់សម្ងួតដែលមានគុណភាព រសជាតិឆ្ងាញ់ ហើយមានបេសកកម្មសំខាន់ៗក្នុងការកែច្នៃកសិផលក្នុងស្រុក កាត់បន្ថយការនាំចេញកសិផលស្រស់ទៅប្រទេសជិតខាង និងបង្កើនការងារជូនប្រជាសហគមន៍ក្រៅពីការដាំដុះផងដែរ»។
លោកបន្ថែមថា ៖
«ចំពោះគុណភាពម្រេចដែលយើងយកមកជ្រក់គឺមិនខ្ចី មិនចាស់ ពោលគឺយើងពនិត្យ និងជ្រើសយកគុណភាពច្បាស់លាស់មួយដើម្បីផលិតម្រេចជ្រក់ដែលមិនផុយពេក និងមិនរឹងពេក ហើយតាមរយៈអាជីវកម្មមួយនេះផងដែរ ក៏បានផ្ដល់នូវការងារបន្ថែមដល់កសិករតាមរយៈដោះដូរកម្លាំងពលកម្មជាមួយប្រាក់កម្រៃក្នុងការបេះផ្លែម្រេចប្រមាណ ៥០០-៦០០រៀលក្នុងមួយគីឡូក្រាម ហើយមួយថ្ងៃគេអាចបេះបានប្រមាណ ៧០-១០០គីឡូក្រាមផងដែរ»។
សម្រាប់ម្រេចជ្រក់សម្ងួត មានតម្លៃ ៤ដុល្លារក្នុងមួយកំប៉ុង ដែលអាចរក្សារទុកបានរយៈពេល ៦ខែ ហើយអាចផលិតបាន ១៥០០ – ១៧០០កំប៉ុងក្នុងមួយខែ។ ដោយឡែកផលិតផលកែច្នៃនេះ អាចទទួលទានបានមិនថាជាមួយបាយឆា គុយទាវ សាច់អាំង ឬសាឡាដជាដើម ព្រោះវាមានរសជាតិហឺរឆ្ងាញ់ និងងាយស្រួលដាក់តាមខ្លួន ជាពិសេសនៅពេលជួបជុំគ្រួសារជាដើម។
ចំពោះដំណើរការក្នុងការផលិតម្រេចជ្រក់នេះផងដែរត្រូវបានអ្នកជំនាញចែកចេញជា២ធំៗ គឺ ទី១ នៅកសិដ្ឋានដែលកសិករត្រូវប្រមូលផលម្រេច បេះយកតែគ្រាប់ វេចខ្ចប់ និងដឹកជញ្ជូនទៅកាន់កន្លែងផលិត។ ទី ២ គឺ នៅកន្លែងផលិតដែលគេត្រូវត្រួតពិនិត្យគុណភាពសមស្របសម្រាប់ការផលិតហើយឬនៅ ទើបធ្វើការលាងសម្អាត និងដាក់ជ្រក់រយៈពេល២សប្ដាហ៍ ហើយដាក់សម្ងួត រួចវេចខ្ចប់ជាការស្រេច។
គួរបញ្ជាក់ដែរថា ការចាប់ផ្ដើមអាជីវកម្មម្រេចជ្រក់ លោក សីហា និងក្រុមការងារបានចំណាយដើមទុនប្រមាណ ២ពាន់ដុល្លារដោយសារខ្សែសង្វាក់ផលិតកម្មម្រេចជ្រក់សម្ងួតនេះមិនត្រូវការសម្ភារផលិតសាំញ៉ាំច្រើននោះទេ ប៉ុន្តែការធ្វើអាជីវកម្មអ្វីមួយចាំបាច់ត្រូវតែមានការរៀបចំខ្លួនឱ្យបានល្អរួចរាល់ ហើយបើមានដៃគូ ត្រូវរកដៃគូណាដែលមានជំនាញផ្សេងៗគ្នា ដើម្បីឱ្យមានគំនិត និងការរៀបចំអាជីវកម្មមានលក្ខណៈពេញលេញ។ អ្វីដែលសំខាន់ជាងនេះទៅទៀត គឺការត្រៀមដើមទុនបម្រុងទុកក្នុងអាជីវកម្ម។
ជាចុងក្រោយ លោក សីហា ក៏បានបង្ហើបពីគម្រោងចង់ពង្រីកអាជីវកម្មមួយនេះឱ្យកាន់តែធំទូលាយនៅលើទីផ្សារក្នុងស្រុក និងអាចមានលទ្ធភាពគ្រប់គ្រាន់ក្នុងផ្គត់ផ្គង់ផលិតផលម្រេចជ្រក់ឱ្យកាន់តែច្រើន ហើយអាចធ្វើការនាំចេញទៅកាន់ទីផ្សារអន្តរជាតិ៕
Account
Security
Favourite Content