បរទេស៖ ស្របពេលដែលបណ្តាប្រទេសនៅអាស៊ីអាគ្នេយ៍ជាច្រើនពឹងផ្អែកខ្លាំងលើការនាំចូលថាមពលពីមជ្ឈិមបូព៌ា សូឡាពន្លឺព្រះអាទិត្យអាចជួយទប់ទល់ពីវិបត្តិថាមពលដែលកំពុងកើតមានឡើងដោយសារសង្គ្រាមរវាងអ៊ីរ៉ង់ ជាមួយសហរដ្ឋអាម៉េរិក រួមគ្នាជាមួយអ៊ីស្រាអែល ដោយអាចជួយសន្សំសំចៃបានរហូតដល់ប្រមាណ ៦៧ពាន់លានដុល្លារ នេះបើយោងតាមការចេញផ្សាយរបស់​ Eco Business។

ប្រភពដដែលបានលើកឡើងថា យោងតាមការវិភាគដោយក្រុមអ្នកជំនាញថាមពល Ember បានឱ្យដឹងថា ប្រសិនបើអាស៊ានប្រើសូឡាពន្លឺព្រះអាទិត្យជំនួសឧស្ម័នធម្មជាតិរាវ (LNG) លើគម្រោងពង្រីកថាមពលអគ្គិសនី នោះវាអាចជួយសន្សំសំចៃតំបន់នេះពីការទិញ LNG បានដល់ទៅ ៦៧ ពាន់លានដុល្លារ។ Ember ធ្លាប់សិក្សាឃើញថា ការដំឡើងថាមពលពន្លឺព្រះអាទិត្យសរុបរបស់អាស៊ានទើបតែមានប្រហែល ២៧ ជីហ្គាវ៉ាត់ប៉ុណ្ណោះ ទាំងដែលជាក់ស្តែងតំបន់នេះមានសក្តានុពលអាចដំឡើងលើសពី ៣០ ០០០ ជីហ្គាវ៉ាត់។ នេះមានន័យថា តំបន់នេះទើបតែដំឡើងបាន ១% ប៉ុណ្ណោះនៃសមត្ថភាពដំឡើងសូឡាសរុប។ ប្រសិនបើអាស៊ានបន្តពឹងផ្អែកខ្លាំងលើការនាំចូលហ្គាសសម្រាប់ដំឡើងថាមពលអគ្គិសនី នោះការចំណាយសរុបអាចប្រហែល ៧១ ពាន់លានដុល្លារក្នុងមួយឆ្នាំ និងអាចកើនឡើងដល់ ១០៩ ពាន់លានដុល្លារ ខណៈពេលដែលការផលិតថាមពលអគ្គិសនីដូចគ្នាពីសូឡាពន្លឺព្រះអាទិត្យនឹងត្រូវចំណាយប្រហែល ៤២ ពាន់លានដុល្លារប៉ុណ្ណោះ។

លោក Muyi Yang អ្នកវិភាគថាមពលជាន់ខ្ពស់ប្រចាំអាស៊ីនៅ Ember បានលើកឡើងថា ៖

«សមត្ថភាពរបស់ប្រេង និងឧស្ម័នគឺធំខ្លាំងណាស់ដោយសារពួកវាគឺជាវត្ថុធាតុដើមដ៏សំខាន់សម្រាប់ទំនើបកម្ម​ ហើយឧស្សាហកម្មរបស់អាស៊ីទាំងមូលពឹងផ្អែកយ៉ាងខ្លាំងលើការនាំចូល។ ដូច្នោះហើយ ការកាត់បន្ថយនៃការពឹងផ្អែកលើវត្ថុធាតុដើមទាំងពីរនេះមិនមែនគ្រាន់តែជាការផ្លាស់ប្តូរថាមពលប៉ុណ្ណោះទេ ប៉ុន្តែជាការផ្លាស់ប្តូរសេដ្ឋកិច្ចយ៉ាងពេញលេញ»។

ការសិក្សានេះកើតឡើងដោយសារការបិទច្រកសមុទ្រ Hormuz និងការផ្អាកផលិតកម្មឧស្ម័នធម្មជាតិរាវ (LNG) នៅប្រទេសកាតា ដែលធ្វើឲ្យការផ្គត់ផ្គង់តឹងតែងជាងមុន ហើយទីផ្សារឥន្ធនៈឡើងថ្លៃនៅទូទាំងអាស៊ី។ មិនត្រឹមតែប៉ុណ្ណោះ ប្រទេសដែលពឹងផ្អែកខ្លាំងលើថាមពលអគ្គិសនីបំប្លែងពីហ្គាស ដូចជា សិង្ហបុរី និងថៃ ជាដើម កំពុងប្រឈមមុខនឹងផលប៉ះពាល់ខ្លាំងបំផុត ខណៈដែលពួកគេទទួលបានការផ្គត់ផ្គង់ LNG ពីប្រទេសកាតា ៤២% និង ២៧% រៀងគ្នានៃចំនួននាំចូលសរុប។ លើសពីនេះ ប្រទេសអាស៊ានទាំងអស់ (លើកលែងតែប្រ៊ុយណេ) ពឹងផ្អែកខ្លាំងលើការនាំចូលប្រេង ជាពិសេសទិញពីតំបន់មជ្ឈិមបូព៌ា។ ដោយឡែក នៅអាស៊ីបូព៌ាវិញ ការនាំចូលប្រេងឆៅរបស់ជប៉ុនពីមជ្ឈិមបូព៌ាមានប្រហែល ៩០% នៃចំនួននាំចូលសរុប ខណៈដែលកូរ៉េខាងត្បូងមានប្រហែល ៧០% ដែលភាគច្រើនត្រូវឆ្លងកាត់ច្រកសមុទ្រ Hormuz៕