សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបើកកិច្ចប្រជុំពិភាក្សាមួយដើម្បីរៀបចំផែនការធានាប្រភពទឹកដែលចាំបាច់សម្រាប់ផលិតកម្មទឹកស្អាតនៅទូទាំងប្រទេស និងកាត់បន្ថយការរំខានដល់ការផ្គត់ផ្គង់ទឹកស្អាតនៅចុងរដូវប្រាំងខាងមុខ។
កិច្ចប្រជុំកាលពីពាក់កណ្តាលសប្តាហ៍នេះ ត្រូវបានធ្វើឡើងក្រោមវត្តមានឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមានការចូលរួមពីថ្នាក់ដឹកនាំក្រសួង និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយប្រធានក្រុមប្រឹក្សាភិបាល និងតំណាងរដ្ឋាករទឹក ប្រតិបត្តិករទឹកស្អាតឯកជន និងសមាគមអ្នកផ្គត់ផ្គង់ទឹកស្អាតកម្ពុជា។
ឯកឧត្តម ហែម វណ្ណឌី បានលើកឡើងថា៖
«យើងត្រូវប្រកាន់យកអភិក្រមដែលមានវិធានច្បាស់លាស់ ដើម្បីកំណត់តំបន់អាចមានហានិភ័យប្រភពទឹក មុននឹងបញ្ហាខ្វះទឹកអាចឈានចូលមកដល់ដោយផ្លាស់ប្តូរវិធីសាស្ត្រពីការដោះស្រាយបញ្ហាមួយករណីម្តងៗ។ ការផ្លាស់ប្តូរជាយុទ្ធសាស្ត្រនេះគឺដើម្បីបង្កើតយន្តការផ្លូវការទៀងទាត់ និងជាសមូហភាពមួយ ដើម្បីដោះស្រាយបញ្ហាប្រភពទឹកសម្រាប់និរន្តរភាពសេវាផ្គត់ផ្គង់ទឹកស្អាត»។
ឯកឧត្តមបានរំលេចអំពីហានិភ័យដែលបង្កដោយការអស់ទឹកពីប្រភពទឹកក្នុងករណីភាពរាំងស្ងួតអូសបន្លាយរយៈពេលវែង ព្រមទាំងការប្រជែងក្នុងការប្រើប្រាស់ទឹកសម្រាប់គោលបំណងផ្សេងៗ។ ឯកឧត្តមរដ្ឋមន្ត្រីក៏បានលើកឡើងពីភាពចាំបាច់នៃកិច្ចសហការរវាងរដ្ឋាករទឹក ប្រតិបត្តិករទឹកស្អាតឯកជន មន្ទីរពាក់ព័ន្ធក្រោមរដ្ឋបាលខេត្ត និងអាជ្ញាធរមូលដ្ឋាន ដើម្បីធានាការប្រើប្រាស់ប្រភពទឹកប្រកបដោយប្រសិទ្ធភាព និងនិរន្តរភាព និងជួយគ្នាដោះស្រាយពេលមានវិបត្តិ។
ក្នុងកិច្ចប្រជុំនេះ វិស័យឯកជនបានរាយការណ៍ពីការធ្លាក់ចុះបរិមាណទឹកសម្រាប់ការផលិតទឹកស្អាត ដោយប្រតិបត្តិករខ្លះបានស្នើជីកស្រះទឹកបន្ថែម និងស្តារប្រភពទឹកដែលមានស្រាប់ និងស្នើសុំការផ្តល់ប្រភពទឹកបន្ថែមសម្រាប់តែការផ្គត់ផ្គង់ទឹកស្អាតដើម្បីធានាការផ្គត់ផ្គង់ទឹកស្អាតរបស់ខ្លួនបានពេញមួយឆ្នាំ។
ឯកឧត្តម ហែម វណ្ណឌី បានជំរុញឱ្យភាគីពាក់ព័ន្ធទាំងអស់យកចិត្តទុកដាក់ខ្ពស់លើបញ្ហាប្រភពទឹកដោយប្រកាន់ស្មារតីសហការគ្នា ព្រមទាំងបានស្នើឱ្យរដ្ឋាករទឹក និងប្រតិបត្តិករទឹកស្អាតឯកជនធំៗដែលអាចនៅសល់សមត្ថភាពផលិតទឹកលើស ជួយគាំទ្រ និងលក់ទឹកដុំដល់ប្រតិបត្តិករតូចៗ ដែលនឹងជួបប្រទះការខ្វះទឹក។
ឯកឧត្តមក៏បានណែនាំឱ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជិតស្និទ្ធជាមួយប្រតិបត្តិករទឹកស្អាតឯកជនក្នុងខេត្ត ដើម្បីវាយតម្លៃបញ្ហាប្រឈមទាំងនេះដោយភាពបុរេសកម្ម ដោយស្នើដំណោះស្រាយជាក់លាក់ចំពោះការធានាប្រភពទឹក និងកាត់បន្ថយការរំខានដល់សេវាទឹកស្អាតក្នុងភូមិសាស្ត្រនៃខេត្តនីមួយៗ។ ឯកឧត្តមរដ្ឋមន្ត្រីក៏បានបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការអនុវត្តយុទ្ធសាស្ត្រអភិវឌ្ឍន៍រយៈពេលវែង ដែលរួមមានការវិនិយោគសំខាន់ៗលើហេដ្ឋារចនាសម្ព័ន្ធទឹកស្អាត ដោយផ្តោតលើការបង្កើនភាពធន់នឹងអាកាសធាតុ និងនិរន្តរភាពប្រភពទឹកសម្រាប់ការផ្គត់ផ្គង់ទឹកស្អាតជូនដល់ប្រជាពលរដ្ឋជាច្រើនជំនាន់ទៅមុខទៀត។ ក្រសួងក៏បានកំពុងគិតគូរអំពីវិធានការជាអន្តរវិស័យ ដើម្បីសម្រេចនូវការប្រើប្រាស់ទឹកដោយសន្សំសំចៃក្នុងគោលដៅធានាប្រសិទ្ធភាព និងស័ក្តិសិទ្ធិភាពនៃវិស័យទឹកស្អាត៕
Account
Security
Favourite Content