សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា Honda និង Nissan បានពិភាក្សាគ្នាអំពីលទ្ធភាពនៃការរួមបញ្ចូលគ្នា ដើម្បីប្រកួតប្រជែងជាមួយក្រុមហ៊ុនផលិតរថយន្តអគ្គិសនី EV នៅលើពិភពលោក ជាពិសេសក្រុមហ៊ុនរបស់ចិនតែម្ដង។
យ៉ាងណាមិញ កិច្ចពិភាក្សានេះកំពុងស្ថិតនៅក្នុងដំណាក់កាលដំបូងនៅឡើយ ហើយមិនមានការធានាថា កិច្ចព្រមព្រៀងនេះនឹងត្រូវបានយល់ព្រមយ៉ាងណានោះទេ។ កាលពីខែមីនា ក្រុមហ៊ុនផលិតរថយន្តជប៉ុនទាំងពីរ Honda និង Nissan បានយល់ព្រមស្វែងរកភាពជាដៃគូយុទ្ធសាស្ត្រសម្រាប់ការផលិតរថយន្តអគ្គិសនី EV។
សារព័ត៌មាន Nikkei បានរាយការណ៍ថា ក្រុមហ៊ុនទាំងពីរកំពុងស្ថិតក្នុងការពិភាក្សាជាបឋមអំពីការច្របាច់បញ្ចូលគ្នា។ Honda និង Nissan បានឆ្លើយតបទៅនឹងព័ត៌មាននេះ ប៉ុន្តែមិនបានផ្តល់ព័ត៌មានលម្អិត ឬពេលវេលាជាក់លាក់ណាមួយដែលកិច្ចព្រមព្រៀងអាចនឹងត្រូវបានអនុម័តនោះទេ។
កាលពីថ្ងៃអង្គារ ក្នុងសប្ដាហ៍នេះ ក្រុមហ៊ុនទាំងពីរបាននិយាយនៅក្នុងសេចក្តីថ្លែងការណ៍មួយថា ដូចអ្វីដែលបានប្រកាសនៅក្នុងខែមីនាឆ្នាំនេះ ក្រុមហ៊ុន Honda និង Nissan កំពុងស្វែងរកលទ្ធភាពផ្សេងៗសម្រាប់កិច្ចសហការគ្នានាពេលអនាគតដោយប្រើប្រាស់កម្លាំងរបស់គ្នាទៅវិញទៅមក។ ប្រសិនបើមានការធ្វើបចុប្បន្នភាពណាមួយ ពួកគេនឹងជូនដំណឹងដល់ភាគីពាក់ព័ន្ធក្នុងពេលវេលាសមស្រប។ ការរួមបញ្ចូលនៃក្រុមហ៊ុនជប៉ុនទាំងពីរនេះអាចកើតឡើង ដោយសារតម្រូវការរថយន្តអគ្គិសនី EV ទូទាំងពិភពលោកយឺតជាងការរំពឹងទុក ហើយក្រុមហ៊ុនផលិតរថយន្តប្រពៃណីកំពុងជួបប្រទះនឹងការប្រកួតប្រជែងខ្លាំងពីក្រុមហ៊ុនផលិតរថយន្តអគ្គិសនីរបស់ចិន។
លោក Shinji Aoyama អនុប្រធានប្រតិបត្តិរបស់ Honda បានលើកឡើង ក្នុងចំណោមជម្រើសជាច្រើន ក្រុមហ៊ុន Honda កំពុងពិចារណាលើការរួមបញ្ចូលគ្នាផ្នែកចងទុនមូលធន ឬ សហការគ្នាបង្កើតជាក្រុមហ៊ុនថ្មីមួយ។
គួរកត់សម្គាល់ថា ក្នុងរយៈពេលប៉ុន្មានឆ្នាំចុងក្រោយនេះ Nissan ដែលធ្លាប់ជាអ្នកនាំមុខគេមួយផ្នែកបច្ចេកវិទ្យា EV បានធ្លាក់ចុះបន្ទាប់ពីម៉ាកយីហោរបស់ចិន ដូចជា BYD មានសន្ទុះខ្លាំងខាងបច្ចេកវិទ្យា និងផលិតរថយន្តមានតម្លៃថោកជាង។ លើសពីនេះ ក្រុមហ៊ុន Honda ក៏រងសម្ពាធផងដែរ បន្ទាប់ពីខ្លួនបានប្រកាសពីផែនការលក់តែរថយន្តគ្មានការបំភាយឧស្ម័ននៅក្នុងទីផ្សារធំៗដូចជា អឺរ៉ុប និងសហរដ្ឋអាមេរិកនៅឆ្នាំ ២០៤០។ ទោះជាយ៉ាងណាក្តី តម្រូវការនៃរថយន្តអគ្គិសនី EV បានចុះខ្សោយ ខណៈដែលតម្លៃប្រេងឥន្ធនៈទាប និងកង្វះកន្លែងសាកថ្មរថយន្តអគ្គិសនី ដែលធ្វើឲ្យការផ្លាស់ប្តូរការប្រើប្រាស់រថយន្តសាំង និងម៉ាស៊ូតទៅជាអគ្គិសនីត្រូវបានរារាំង។
អ្នកជំនាញបានលើកឡើងថា ប្រសិនបើការរួមបញ្ចូលគ្នារវាងក្រុមហ៊ុនទាំងពីរកើតឡើងពិតមែន ទំហំនៃការវិនិយោគនឹងធំជាងមុនដើម្បីប្រកួតប្រជែងជាមួយក្រុមហ៊ុន Tesla និង BYD ហើយការរួមបញ្ចូលគ្នានេះនឹងក្លាយជាក្រុមហ៊ុនផលិតរថយន្តពេញលេញមួយថែមទៀតផង។
យោងតាមរបាយការណ៍ ការចុះហត្ថលេខានេះក៏អាចរួមបញ្ចូលក្រុមហ៊ុន Mitsubishi Motors ផងដែរ។ Mitsubishi Motors ដែលជាក្រុមហ៊ុនផលិតរថយន្តធំទី ៣ របស់ជប៉ុនមានទំនាក់ទំនងដើមទុនជាមួយ Nissan រួចហើយ ហើយត្រូវបានរាយការណ៍ថា ក្រុមហ៊ុននេះបានចូលរួមក្នុងកិច្ចពិភាក្សាបឋមផងដែរ។ ការអភិវឌ្ឍន៍យុទ្ធសាស្រ្តថ្មីៗបានកើតឡើង ដោយសារម៉ាកយីហោជាច្រើនកំពុងប្រឈមមុខនឹងការប្រកួតប្រជែងពីការកើនឡើងនៃផលិតកម្ម EV នៅក្នុងប្រទេសចិន ដែលជាទីផ្សាររថយន្តដ៏ធំបំផុតរបស់ពិភពលោក។ អ្នកប្រើប្រាស់ជនជាតិចិនភាគច្រើនបានផ្លាស់ប្តូរទៅប្រើប្រាស់ម៉ាកយីហោក្នុងស្រុកវិញ ដោយសារពួកគេមើលឃើញពីគុណភាពប្រសើរជាមុន និងមានតម្លៃថោកជាង គួបផ្សំនឹងការលើកទឹកចិត្តពីរដ្ឋាភិបាលផងដែរ៕
Account
Security
Favourite Content