បរទេស៖ យោងតាមប្រភពពី Inclusivebusiness.net បានលើកឡើងថា កសិករខ្នាតតូចនៅប្រទេសហ្សំប៊ីប្រឈមនឹងបញ្ហាគ្មានទីផ្សារបើទោះបីជាតម្រូវការពិភពលោកកំពុងកើនឡើងយ៉ាងឆាប់រហ័សទៅលើផលិតផលដែលមានគុណភាពក៏ដោយ ខណៈដែល Good Nature Agro (GNA) កំពុងជួយកសិករខ្នាតតូចនៅប្រទេសហ្សំប៊ី ដើម្បីបង្កើនប្រាក់ចំណូលទ្វេដង និងជំរុញឲ្យមានទីផ្សារសម្រាប់កសិផលដែលបង្កើតបាន។

នៅក្នុងហ្សំប៊ី មានប្រជាជនប្រមាណ ៦០ភាគរយចូលរួមធ្វើកសិកម្ម ប៉ុន្តែដោយសារហេតុផលមួយធ្វើឲ្យការដាំដុះមិនសមស្របនឹងតម្រូវការទីផ្សារ ហើយលទ្ធភាពទទទួលបានទិន្នផលដែលមានគុណភាពនៅមានកម្រិតនៅឡើយ។ ដើម្បីដោះស្រាយបញ្ហានេះ Good Nature Agro (GNA) បានចាប់ផ្តើមជាគម្រោងសាកល្បងតូចមួយនៅក្នុងឆ្នាំ២០១៤ ហើយបានក្លាយជាសហគ្រាសសង្គមស្វែងរកប្រាក់ចំណេញដែលផ្គត់ផ្គង់គ្រាប់ធញ្ញជាតិ គ្រាប់ពូជ និងទំនិញស្រដៀងគ្នាសម្រាប់កសិករហ្សំប៊ី។ ក្រុមហ៊ុននេះត្រូវបានជំរុញដោយពាណិជ្ជកម្មស្ទើរតែទាំងស្រុង ហើយបានរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយប្រាក់ចំណូលរបស់ក្រុមហ៊ុនបានកើនឡើងពី ២,៥ លានដុល្លារនៅឆ្នាំ ២០១៩ ដល់ ៥,៧ លានដុល្លារក្នុងឆ្នាំ២០២១។

ដោយផ្អែកលើតួលេខឆ្នាំ២០២១ ប្រាក់ចំណូលរបស់ក្រុមហ៊ុនប្រហែល ៧៩ ភាគរយបានមកពីការផលិតគ្រាប់ពូជ, ១២ ភាគរយបានមកពីការលក់ទំនិញ ឬ ដំណាំ, និង ៩ ភាគរយពីការផ្តល់ហិរញ្ញប្បទានសម្រាប់កសិករ។ គ្រាប់ធញ្ញជាតិទាំងនោះរួមមាន សណ្តែកសៀង សណ្តែកខៀវ សណ្តែកបារាំងលឿង សណ្ដែកដី សណ្តែកឡេទីជាដើម ត្រូវបានកំណត់ថាជាដំណាំអាទិភាព ព្រោះវាធ្វើឱ្យដីមានជីជាតិឡើងវិញ ជាអាហារូបត្ថម្ភខ្ពស់ និងទទួលបានផលចំណេញច្រើននៅលើទីផ្សារ ដែលមកទល់ពេលនេះ ក្រុមហ៊ុនមានបុគ្គលិកប្រហែល ១៦៥ នាក់ និងធ្វើការជាមួយកសិករជាង ២៦ ០០០ នាក់។

ទន្ទឹមនឹងនេះ ប្រតិបត្តិការស្នូលរបស់ GNA មានកម្មវិធីធំៗចំនួនពីរ គឺកម្មវិធីគ្រាប់ពូជ (គ្រាប់ពូជផលិតកម្ម) និងកម្មវិធីប្រភព (ផលិតកម្មទំនិញ)។ នៅផ្នែកគ្រាប់ពូជនៃអាជីវកម្ម កសិករត្រូវបានផ្តល់ការបណ្តុះបណ្តាល ការផ្តល់ប្រាក់កម្ចី និងទីផ្សារដែលអាចទុកចិត្តបានអំពីគ្រាប់ពូជដែលពួកគេនឹងត្រូវដាំ។ GNA ​ទិញ​គ្រាប់ពូជ​ក្នុង​តម្លៃ​ពិសេស ដែល​បន្ទាប់មក​លក់​ឱ្យ​កសិករ​នៅផ្នែកកម្មវិធីប្រភព។ មុនពេលដាំដំណាំ GNA កំណត់ទំនិញដែក្រុមហ៊ុនទិញត្រូវការ ហើយវាបានក្លាយជាមូលដ្ឋានសម្រាប់អ្នកបង្កាត់គ្រាប់ពូជរបស់ក្រុមហ៊ុននឹងផលិត និងដាំដុះ។ លើសពីនេះ កសិករនៅក្រោមកម្មវិធីប្រភពក៏ទទួលបានការបណ្តុះបណ្តាល និងប្រាក់កម្ចី ហើយក្រុមហ៊ុនធានាទិញផលិត​ផល​ទាំង​អស់​ ដែលបន្ទាប់​មក​នឹងលក់បន្ត​ឱ្យ​ក្រុម​ហ៊ុន​ទិញ។

ជាទូទៅ កសិករត្រូវបានប្រមូលផ្តុំជាក្រុម ហើយត្រូវបានគ្រប់គ្រងដោយពួកភ្នាក់ងារឯកជន (PEA) ដោយេភ្នាក់ងារទាំងនេះត្រូវបានជ្រើសរើសពីក្រុមកសិករ។ ពួកគេត្រូវបានបណ្តុះបណ្តាលដើម្បីជួយសម្រួលដល់ការបណ្តុះបណ្តាលជាប្រចាំសម្រាប់ក្រុមកសិកររបស់ពួកគេ និងផ្តល់ដំបូន្មានដល់កសិករដើម្បីបំពេញតម្រូវការជាក់លាក់ និងការអនុវត្តកសិកម្មកាន់តែប្រសើរជាងមុន។ ប្រហែល ៤៣ ភាគរយនៃភ្នាក់ងារ PEA របស់ក្រុមហ៊ុនគឺជាស្ត្រី ហើយពួកគែប្រើកម្មវិធីមួយហៅថា “Smallholdr” ដើម្បីតាមដានគោលដៅប្រាក់ចំណូលរបស់កសិករ និងការរីកចម្រើនរបស់ពួកគេ។ កាលពីខែមករា ឆ្នាំ ២០២៣ ពួកគេផ្លាស់ប្តូរទៅជាកម្មវិធីថ្មីមួយដែលជាកម្មសិទ្ធិរបស់ GNA ដើម្បីផ្តល់ដំបូន្មានកសិកម្មបន្ថែមទៀត និងជួយសម្រួលដល់ការផ្តល់ឥណទានពីស្ថាប័នហិរញ្ញវត្ថុដោយផ្ទាល់ដល់កសិករ។ មិនត្រឹមតែប៉ុណ្ណោះ កសិករដែលចូលរួមជាមួយ GNA រាយការណ៍ថា ពួកគេរកប្រាក់ចំណូលច្រើនជាង ៣ដងចំណូលពីដំណាំពោត ដោយចំណូលពីមុន ១១៦ ដុល្លារក្នុងមួយហិកតា ប៉ុន្តែឥឡូវកើនឡើងដល់ ៦០០ ដុល្លារក្នុងមួយហិកតា។

ក្រៅពីនេះ ក្រុមហ៊ុនបានផ្តល់ជូនការគាំទ្រដល់កសិករក្នុងទម្រង់ផ្សេងៗគ្នា។ នៅដើមរដូវ កសិករត្រូវបានផ្តល់ការបណ្តុះបណ្តាល និងកម្ចីជាគ្រាប់ពូជតូចៗ ដោយពួកគេបានសងជាគ្រាប់ពូជវិញក្រោយការប្រមូលផល។ កសិករនៅក្នុងកម្មវិធីប្រភពត្រូវបានផ្សារភ្ជាប់ជាមួយស្ថាប័នមីក្រូហិរញ្ញវត្ថុ (MFIs) សម្រាប់ការផ្តល់ហិរញ្ញប្បទានបន្ថែម។ ក្រុមហ៊ុនក៏ផ្តល់ការបណ្តុះបណ្តាលលើប្រធានបទពាក់ព័ន្ធផ្សេងៗទៀតដូចជា ការរក្សាកំណត់ត្រា ចំណេះដឹងផ្នែកហិរញ្ញវត្ថុ និងការធ្វើផែនការហិរញ្ញវត្ថុ។ លើសពីនេះ គ្រួសារកសិករត្រូវបង្កើតផែនការសម្រាប់រយៈពេល ១​ ឆ្នាំទៅ ៥ ឆ្នាំដែលអាចជួយពួកគេតាមដាននូវសមិទ្ធផលដែលបានកំណត់គោលដៅតាមពេលវេលា។ មិនត្រឹមតែប៉ុណ្ណោះ GNA ក៏បានវិនិយោគលើការកែលម្អប្រព័ន្ធទិន្នន័យរបស់ពួកគេ ដើម្បីជួយកសិករ​ក្នុងការ​បង្កើត​ពិន្ទុ​ឥណទាន​កាន់​តែ​ល្អឲ្យមានភាព​ងាយ​ស្រួល​ក្នុង​ការ​ទទួល​បាន​កម្ចី​ពី​ស្ថាប័ន​ហិរញ្ញវត្ថុ (កម្ចី​ចាប់​ផ្តើម​ពី ៣០-៦០ ដុល្លារ ប៉ុន្តែ​អាច​កើន​ឡើង​ដល់ ២ ០០០ ទៅ ៣ ០០០ ដុល្លារ​ប្រសិន​បើ​កសិករអនុវត្តបាន​ល្អ)។

ទាក់ទងទៅនឹងការថែរក្សាបរិស្ថាន GNA ក៏យកចិត្តទុកដាក់លើហ្សែនគ្រាប់ពូជនៅក្នុងកម្មវិធីគ្រាប់ពូជរបស់ពួកគេផងដែរ។ ឥឡូវនេះ ពួកគេកំពុងស្វែងរកពូជដំណាំឆ្លាតវៃតាមអាកាសធាតុដែលអាចទប់ទល់នឹងការធ្វើកសិកម្មក្នុងលក្ខខណ្ឌធ្ងន់ធ្ងរដូចជា គ្រោះរាំងស្ងួតជាដើម ដែលគ្រាប់ពូជនោះជាប្រភេទដែលចំណាយពេលតិចជាង ១៥ ទៅ ៣៥ ថ្ងៃដើម្បីដុះលូតលាស់។ លើសពីនេះ GNA ក៏ផ្តល់តម្លៃ និងវិនិយោគលើការកែលម្អសុខភាពដីផងដែរ ដោយពួកគេកំពុងផលិតជីវឧស្ម័នពីសំបកគ្រាប់សណ្ដែកដី ល្បាយជីដែលមានសារធាតុសរីរាង្គ និងការភ្ជួររាស់ដីសម្រាប់ការកែតម្រូវជាតិអាស៊ីត។ មួយវិញទៀត អាកាសធាតុតាមបច្ចេកវិទ្យាឆ្លាតវៃកំពុងធ្វើឱ្យក្រុមហ៊ុន និងកសិករកាន់តែធន់នឹងអាកាសធាតុ។

ទោះជាយ៉ាងណាក្តី​ GNA ក៏ប្រឈមនឹងញ្ហាប្រឈមសំខាន់ៗផងដែរ។ សម្រាប់កសិករខ្នាតតូច ការគ្រប់គ្រងលំហូរសាច់ប្រាក់គឺជាបញ្ហាប្រឈមដ៏សំខាន់មួយជាពិសេសក្នុងអំឡុងពេលរដូវទាប។ ដើម្បីដោះស្រាយបញ្ហានេះ GNA ផ្តល់នូវប្រាក់កម្ចី ឬ ការទូទាត់មុនការប្រមូលផល ដែលកសិករអាចប្រើប្រាស់សម្រាប់ការចំណាយផ្សេងៗក្នុងរដូវទាប។ នៅពេលជិតប្រមូលផល ពួកគេសងប្រាក់វិញដោយគ្មានការប្រាក់ ហើយកសិករអាចពន្យារពេលរហូតដល់មួយខែមុនរដូវបន្ទាប់ថែមទៀតផង។ កាលពីបង្កើតគម្រោងនេះដំបូង GNA ​ប្រឈម​គឺ​ក្នុង​ការ​កសាង​ទំនុក​ចិត្ត​ជាមួយ​សហគមន៍ ហើយហេដ្ឋារចនាសម្ព័ន្ធក្នុងតំបន់ខ្លះអាចមានកម្រិតជាពិសេសផ្នែកបច្ចេកវិទ្យា។ ដើម្បីដោះស្រាយបញ្ហានេះ ក្រុមហ៊ុនបានចាប់ដៃគូជាមួយអ្នកផ្តល់សេវាទូរស័ព្ទ។ ក្រៅពីនេះ GNA ប្រឈមនឹងបញ្ហាផ្សេងៗដូចជា ការរាតត្បាតបានពន្យឺតដំណើរការជាច្រើន និងរារាំងការដឹកជញ្ជូន, បញ្ហាអាកាសធាតុ, និងជំងឺរុក្ខជាតិបានគំរាមកំហែងដល់ដំណាំ និងផលិតភាពផងដែរ។

យ៉ាងណាមិញ GNA គឺជាករណីដែលបង្ហាញថា ទោះបីជាសហគ្រាសទនេះមានទំហំតូចក៏ដោយ ប៉ុន្តែពួកគេអាច​ធ្វើ​ការ​ជាមួយ​កសិករ​ខ្នាតតូច តាមរយៈការច្នែប្រឌិត បច្ចេកវិទ្យា និងបច្ចេកទេសថ្មីៗ រួមទាំងបង្កើតផលប្រយោជន៍ដល់សេដ្ឋកិច្ចសង្គមផងដែរ។ ដូច្នោះហើយ រដ្ឋាភិបាលអាចពិចារណាបង្កើតវេទិកាសម្រាប់សហគ្រាសធុនតូច និងមធ្យម ដែលធ្វើការជាមួយអ្នកចំណូលទាប ឬ កសិករជាមូលដ្ឋាន ដើម្បីសិក្សាពីបទពិសោធន៍អាជីវកម្មរបស់ពួកគេ និងស្វែងរកឱកាសដែលអាចរវិនិយោគបាន៕